(កំពង់ធំ)៖ អាសូរ!បុរសម្នាក់បានស្លាប់បាត់បង់ជីវិតនៅហ្នឹងកន្លែងដោយសារ ឆ្លងចរន្តអគ្គិសនីពីម៉ូទ័របូមទឹក នៅស្ថានីយ៍ទឹកស្អាតមួយកន្លែងក្នុងស្រុកស្ទោង បង្ករអោយមានការភ្ញាក់ផ្អើលមួយកាលពីវេលាម៉ោង ១៣ និង ៥៦នាទីរសៀលថ្ងៃទី០៣ ខែមេសា ឆ្នាំ២០២០ មានមនុស្សស្លាប់ ដោយសារឆ្លងចរន្តអគ្គិសនី នៅភូមិស្វាយអៀ ឃុំចំណាក្រោម ស្រុកស្ទោង ខេត្តកំពង់ធំ។
សពជនរងគ្រោះឈ្មោះ នឹង ភិន ភេទប្រុស អាយុ ២៩ឆ្នាំ ជនជាតិខ្មែរ នៅភូមិស្វាយអៀ ឃុំចំណាក្រោម ស្រុកស្ទោង ខេត្តកំពង់ធំ។
តាមការបំភ្លឺពីឈ្មោះ កុសល ពិសី ភេទ ប្រុស អាយុ ២០ឆ្នាំ ជនជាតិខ្មែរ នៅភូមិសណ្តាន់ ឃុំចំណាក្រោម ស្រុកស្ទោងបានបញ្ជាក់ថា៖ នៅថ្ងៃទី ០៣ ខែមេសា ឆ្នាំ ២០២០ វេលាម៉ោង ប្រហែល ០៨ និង ០០នាទីព្រឹក ខ្លួន និង ឈ្មោះ នឹង ភិន ដែលជាជនរងគ្រោះ បានទៅធ្វើការនៅស្ថានីយ៍ទឹកស្អាត នៅភូមិស្វាយអៀ ជាមួយគ្នា ប៉ុន្តែម៉ូទ័របូមទឹកចូលអំពូលយូវី ដើម្បីចេញទឹកស្អាតខូច បូមមិនកើតក៏ត្រឡប់មកផ្ទះរៀងៗខ្លួន។ លុះដល់ម៉ោងប្រហែល ១៣ និង ០៥នាទី ខ្លួនបានជិះម៉ូរ៉ឺម៉កចេញពីផ្ទះទៅហៅ ឈ្មោះ នឹង ភិន ដើម្បីធ្វើការបន្ត ប៉ុន្តែបានជួបម្តាយគាត់ប្រាប់ថា ឈ្មោះ ភិន បានទៅស្ថានីយ៍ទឹកមុនហើយ។ 
បន្ទាប់មកខ្លួនបានជិះម៉ូតូទៅស្ថានីយ៍ទឹក ពេលទៅដល់បានឃើញឈ្មោះ នឹង ភិន ដេកក្បែរម៉ូទ័របូមទឹក និងមានស្នាមតខ្សែរភ្លើងថ្មីៗហើយបារ៉ែតក៏ពុំបានបិទដែរ ខ្លួនបានអង្រួនហៅតែមិនឆ្លើយខ្លួនក៏បានរត់ទៅឪពុកម្តាយបង្កើតរបស់ឈ្មោះ ភិន មក មើលនិងបានដឹកយកទៅមន្ទីរពេទ្យបង្អែកស្ទោង តែគ្រូពេទ្យប្រាប់ថាស្លាប់បាត់ហើយ ក៏ដឹកត្រឡប់មកផ្ទះវិញ។
ទទួលបានព័ត៌មានភ្លាម កម្លាំងជំនាញសមត្ថកិច្ចនគរបាលស្រុកស្ទោង សហការជាមួយអាជ្ញាធរមូលដ្ឋាន ភូមិ ឃុំចុះដល់កន្លែងកើតហេតុដើម្បីពិនិត្យ ។ តាមការពិនិត្យ សព ឃើញថាមានស្លាកស្នាម ខ្លោចរបកស្បែកលើគល់ក្រចកមេដៃឆ្វេងមួយកន្លែង ក្រៅពីនេះពុំមានស្លាកស្នាមអ្វីទេ។
ទើបធ្វើការសន្និដ្ឋានថា៖ ជនរងគ្រោះស្លាប់បណ្តាលមកពីឆ្លងចរន្តអគ្គិសនីឆក់ស្លាប់។
ក្រោយពីបានពិនិត្យចប់សព្វគ្រប់រួចហើយយើងបានធ្វើកំណត់ហេតុប្រគល់សពជនរងគ្រោះ អោយទៅឈ្មោះ ជា នឹង អាយុ ៥៥ឆ្នាំ ត្រូវជាឪពុកបង្កើតសពយកទៅធ្វើបុណ្យតាមប្រពៃណី៕
