ចោរឆក់២នាក់ ត្រូវកម្លាំងនគរបាលប៉ុស្តិ៍ទន្លេបាសាក់ស្ទាក់ចាប់បានភ្លាមៗ ខណៈពួកគេឆក់ទូរស័ព្ទពីបុរសម្នាក់បានសម្រេច

ភ្នំពេញ៖ កម្លាំងនគរបាលប៉ុស្តិ៍ទន្លេបាសាក់ សហការជាមួយនឹងបងប្អូនប្រជាពលរដ្ឋ បានធ្វើការ​ចាប់​ឃាត់​​ខ្លួនជនសង្ស័យ២នាក់ នៅចំណុចផ្លូវសុធារស ជិតប៊ុលឌិញ ខណៈ ពួកគេបានដើរ​ធ្វើសកម្មភាព​ យក​ទូរស័ព្ទដៃម៉ាក​អាយហ្វូនហ្វាយ ពីបុរសម្នាក់បានសម្រេច កាលពីវេលាម៉ោង ១៧នឹង ៣០នាទី​

ល្ងាច​​ថ្ងៃទី ២០ ខែកក្កដា ឆ្នាំ ២០១៤ ។

        យោងតាមប្រភពព័ត៌មានពីសមត្ថកិច្ចមូលដ្ឋានបានឲ្យដឹងថាៈ ជនសង្ស័យទាំង២នាក់ ដែល បានឃាត់​ខ្លួនខាងលើមានឈ្មោះ ម៉ក់ សុខសម្បត្តិ ភេទប្រុស អាយុ ១៩ឆ្នាំ. ទី២ ឈ្មោះ គង់ វីណា ភេទប្រុស​ ​អាយុ១៩ឆ្នាំ ។ អ្នកទាំង២ មានមុខរបរមិនពិតប្រាកដ មានទីលំនៅផ្ទះជួល ផ្លូវលំ ភូមិ០២ សង្កាត់ទន្លេបាសាក់ ខណ្ឌចំការមន ។ ចំណែកបុរសជាម្ចាស់ទូរស័ព្ទមានឈ្មោះ លីបន់ ណារ៉ា អាយុ១៩ឆ្នាំ ជានិស្សិត ស្នាក់នៅផ្ទះលេខ ៥៣E ផ្លូវលេខ១៣៤សង្កាត់វាលវង់ ខណ្ឌ៧មករា។

ប្រ​ភព​ដដែលបន្ត​ថា៖ មុនដំបូងជនរងគ្រោះ បានបើករថយន្តមួយគ្រឿង​មកឈប់ផ្លូវសុធារស់​ជិតខារ៉ាអូខេអិចធូរ ដើម្បីរកនារីៗ ។ ភ្លាមៗនោះ ជនសង្ស័យទាំង២នាក់ បានស្ទុះមកសួរនាំជនរង​គ្រោះ​ថា តើលោកចង់បាននារីមែន ? ដោយស្របទៅនឹងចំណង់ចំណូលចិត្ត របស់និស្សិតទាំងពីររូប​ផង​នោះ ជនរងគ្រោះ​ក៏ឆ្លើយ ដោយមិនបង្អង់ថា ​ចង់បាន ។ ភ្លាមនោះ​ ក្រុមជនសង្ស័យ​ប្រើ​ល្បិច​សុំ​ ទូរ​ស័ព្ទ​ ម៉ាកអាយហ្វូនហ្វាយ របស់ជនរងគ្រោះដើម្បីហៅទៅនារីៗឲ្យមកជួប ។ ពេលទទួលបានទូរ​ស័ព្ទហើយ ​ជនសង្ស័យបាននាំគ្នារត់គេចខ្លួន ប៉ុន្តែត្រូវជនរងគ្រោះបើករថយន្ត  ដេញតាមបង្កឲ្យមាន​ភ្ញាក់​ផ្អើលដល់ប្រជាពលរដ្ឋ និងសមត្ថកិច្ចមូលដ្ឋាន ជួយអន្តរាគមន៍​ឃាត់ខ្លួន​បានជនសង្ស័យ​ទាំង២នាក់ ហើយយកទៅកាន់ទីស្នាក់ការនគរបាលប៉ុស្តិ៍ ដើម្បីធ្វើការសាកសួរព័ត៌មាន ។

        ដោយយោងតាមពាក្យបណ្តឹងរបស់បុរសម្ចាស់ទូរស័ព្ទ និងសម្តីសាក្សីនៅកន្លែងកើតហេតុនោះ សមត្ថកិច្ច បានសម្រេចបានបញ្ជូនខ្លួនជនសង្ស័យទាំង២នាក់ ​ទៅឃុំបណ្តោះអាសន្ន នៅអធិការដ្ឋាន នគរ បាលខណ្ឌចំការមន រង់ចាំសាកសួរបន្ត នឹងរង់ចាំផ្តុំសំណុំរឿងបញ្ជូនទៅសាលា ដំបូងរាជធានី ភ្នំ ពេញ ផ្តន្ទាទោសតាមផ្លូវច្បាប់ ៕​ ម៉ែន ប៊ុនធី