សៀមរាប៖ ផ្លូវក្រាលគ្រួសក្រហមមួយខ្សែមានប្រវែង ៣៩៥០០ម៉ែត្រលាតសន្ធឹងចេញពីទីរួមស្រុកជីក្រែងឆ្ពោះទៅកាន់ភូមិខ្វាវ ឃុំខ្វាវស្រុកជីក្រែង ខេត្តសៀមរាប។មួយខ្សែនេះមានសារះសំខាន់ខ្លាំងណាស់ចំពោះប្រជាពលរដ្ឋក្នុងការដឹកទំនិញចេញចូលពីផ្សារកំពង់ក្តីទៅឃុំខ្វាវ ព្រមទាំងសិស្សានុសិស្សធ្វើដំណើរដោយជិះកង់ ឫ ជិះម៉ូតូទៅសិក្សា ។ 
ផ្លូវថ្នល់មួយនេះត្រូវខូចខាតយ៉ាងធ្ងន់ធ្ងរដោយសារទឹកជំនន់កាលពីឆ្នាំ២០១៣កន្លងទៅ ។ ប៉ុន្តែត្រូវបានជួសជុលឡើងវិញដោយកងវិស្វកម្មរបស់ក្រសួងការពារជាតិ ព្រមទាំងកាត់ផ្លូវជាច្រើនកន្លែងដើម្បីធ្វើស្ពានសំរាប់ឲ្យទឹកហូរជៀសវាងទឹកស្ទះនាំឲ្យខូចផ្លូវតទៅទៀត ។ រហូតមកដល់ពេលនេះស្ពានជាច្រើនកន្លែងមិនទាន់ធ្វើរួច ជាពិសេសស្ពានដែលមានចន្លោះពីភូមិស្រោងទៅភូមិព្រះធាតុ ។ យោងតាមសំដីរបស់ប្រជាពលរដ្ឋជាច្រើនអ្នកបាននិយាយថា៖ ពួកគាត់ពេលនេះកំពុងតែមានបញ្ហាប្រឈមមុខទាំងសេដ្ឋកិច្ច ទាំងសុខភាពដោយសារតែការធ្វើស្ពានមានការយឺតយាវមិនអាចធ្វើចរាចរណ៍ឆ្លងកាត់បាន ។
លោកហ៊ុន សំណាងមេការធ្វើស្ពានបានឲ្យអ្នកយកព័ត៌មានយើងដឹងថា ការយឺតយាវនេះពុំមែនមកពីខ្វះថវិកាទេ គឺមកពីរកកម្មករពុំបានព្រោះរដូវនេះគឺជារដូវដកស្ទូង ។ លោកកុញ ហ៊តមេឃុំខ្វាវប្រាប់អ្នកសារពត៌ថា៖ អាជ្ញាធរឃុំឯកភាពជាមួយអជ្ញាធរស្រុកសហការជាមួយកងវិស្វកម្មក្រសួងការពារជាតិសុំសំរួលជាមួយប្រជាពលរដ្ឋចំនួន៥គ្រួសារដែលមានដីស្រែជាប់នឹងផ្លូវដែលស្ពានធ្វើពុំទាន់រួចដោយសំរួលជាថវិកាដើម្បីធ្វើផ្លូវវាងបណ្តោះអាសន្នសំរាប់ឲ្យប្រជាពលរដ្ឋធ្វើចរាចរណ៍បានស្រួលក្នុងរដូវវស្សានេះ ផងដែរ ។
តែឥឡូវនេះផ្លូវនេះត្រូវបានទឹកជំនន់លេបត្របាក់យកអស់ទាំងស្រុងហើយដោយសារតែផ្លូវនេះចាក់ដីទាបជាងផ្លូវចាស់ហើយគ្មានលូទៀតផង។ ចំពោះប្រជាពលរដ្ឋក្នុងឃុំខ្វាវទាំងមូលមានការព្រួយបារម្មណ៏យ៉ាងខ្លាំង ព្រោះគ្មានផ្លួវធ្វើចរាចរណ៍ពីឃុំខ្វាវមកទីរួមស្រុកជីក្រែងបើមានការចាំបាច់ ។ រីឯគ្រូពេទ្យនៅមជ្ឈមណ្ឌលឃុំខ្វាវបានប្រាប់អ្នកយកព័ត៌មានយើងថា៖ លោកមានការព្រួយបារម្មណ៏យ៉ាងខ្លាំង បើសិនជាមានអ្នកជំងឺធ្ងន់ធ្ងរដែលនៅមណ្ឌលរបស់លោកមិនអាចសង្គ្រោះបាន លោកមិនដឹងជាមានមធ្យោបាយណាបញ្ជូនអ្នកជំងឺទៅសង្គ្រោះនៅមជ្ឈមណ្ឌលសុខភាពកំពង់ក្តីឡើយ ។
ក្នុងថ្ងៃទី២០ ខែកក្កដាឆ្នាំ២០១៤យើងឃើញអ្នកធ្វើដំណើរមានការកកស្ទះជាច្រើននៅចុងភូមិស្រោងខាងជើង នឹង ចុងភូមិព្រះធាតុខាងត្បូងចន្លោះផ្លូវដែលធ្វើស្ពានពុំទាន់រួច ពេលនោះត្រូវបានប្រជាពលរដ្ឋធ្វើក្បូនចម្លងអ្នកធ្វើដំណើរ ចាប់ពីម៉ោង៧.០០ព្រឹករហូតដល់ម៉ោង១១ថ្ងៃត្រង់តំលៃក្នុងមនុស្សម្នាក់និងម៉ូតូមួយគ្រឿង៦០០០រៀល។ ចាប់ពីម៉ោង១១ថ្ងៃរហូតដល់ម៉ោង៦ល្ងាចតំលៃមនុស្សម្នាក់និងម៉ូតូមួយគ្រឿងតំលៃ១០០០០រៀល ។ ដោយ លោក ព្រំ សុខា
