(បាត់ដំបង)៖នារសៀលថ្ងៃទី ២១ ខែ មេសា ឆ្នាំ២០២០ វេលាម៉ោង ១៥:២០នាទីស្ថិតនៅត្រង់ចំណុចភូមិស្លាកែត សង្កាត់ស្លាកែត ក្រុងបាត់ដំបង ខេត្តបាត់ដំបង ។កម្លាំងក្រុមអន្តរាគមន៍ បង្ការ បង្ក្រាប បានសហការជាមួយកម្លាំងនគរបាលស្រុកសង្កែ ចុះប្រតិបត្តិការបង្ក្រាបករណី លួចមានស្ថានទម្ងន់ទោស ( ឆក់កាបូប ) មួយករណីដែលកំពុងប្រព្រឹត្តជាក់ស្តែង។
លោកវរសេនីយ៏ទោ ឈឿង គឹម សុង ប្រធានការិយាល័យព្រហ្មទ័ណ្ឌកំរិតស្រាលនៃស្នងការខេត្តបានឲ្យដឹងនៅថ្ងៃទី២២ខែមេសាឆ្នាំ២០២០ថា ដោយយោងទៅតាមការចង្អុលបង្ហាញពីលោកឧត្តមសេនីយ៏ទោ អ៊ូច សុខុនក៏ដូចជាលោកឧត្តមសេនីយ៏ត្រីជេត វណ្ណនី ស្នងការរងចុះបញ្ជាផ្ទាល់នឹងបន្តស្រាវជ្រាវរហូតឈានដល់ការឃាត់ខ្លួនជនសង្ស័យ ០១ នាក់ ឈ្មោះ ឡឹប ការស៊ីម ភេទប្រុស អាយុ ២១ឆ្នាំ មានទីលំនៅភូមិស្លាកែត សង្កាត់ស្លាកែត ក្រុងបាត់ដំបង ខេត្តបាត់ដំបង ។
លោកនាយការិយាល័យដដែលបានបញ្ជាក់បន្ថែមថាជនសង្ស័យខាងលើរួមជាមួយបក្សពួកម្នាក់ទៀតដែលកំពុងរត់គេចខ្លួន បានធ្វើសកម្មភាពឆក់យកកាបូបរបស់ជនរងគ្រោះ ឈ្មោះ ឯក សារានី ភេទស្រី អាយុ ៤៥ឆ្នាំ មានទីលំនៅភូមិអូសទូក ឃុំកំពង់ព្រៀង ស្រុកសង្កែ ខេត្តបាត់ដំបង នៅចំណុចលើផ្លូវជាតិលេខ៥ ស្ថិតក្នុងភូមិអន្លង់វិល ឃុំអន្លង់វិល ស្រុកសង្កែ ខេត្តបាត់ដំបង នៅវេលាម៉ោង ០៨:២០នាទី ថ្ងៃទី ២១ ខែមេសា ឆ្នាំ២០២០ ខណៈពេលជនរងគ្រោះកំពុងជិះម៉ូតូនៅលើដងផ្លូវ។
វត្ថុតាងដកហូតរួមមាន ៖
១/ប្រាក់ខ្មែរចំនួន ១៦០,០០០រៀល ( មួយសែនប្រាំមួយម៉ឺនរៀល )
២/កាបូបស្ពាយពណ៌ខ្មៅ ០១
៣/អត្តសញ្ញាណប័ណ្ណសញ្ជាតិខ្មែរចំនួន ០២សន្លឹក
៤/កាតអេធីអឹម ០១សន្លឹក
៥/អាវយឺតដៃខ្លីពណ៌ខ្មៅដែលជនសង្ស័យធ្វើសកម្មភាព ០១
៦/ម៉ូតូម៉ាក ស៊ូស៊ូគី ណិច ពណ៌ទឹកប្រាក់ ពាក់ស្លាកលេខ បាត់ដំបង 1AK 3192 ជនសង្ស័យជិះធ្វើសកម្មភាព ។
បច្ចុប្បន្នជនសង្ស័យរួមទាំងវត្ថុតាងត្រូវបានកម្លាំងការិយាល័យនគរបាលព្រហ្មទណ្ឌកម្រិតស្រាលកំពុងតែធ្វើកំណត់រួចកសាងសំណុំរឿងដើម្បីបញ្ជូនទៅសាលាដំបូងខេត្តបាត់ដំបងចាត់ការតាមនីតិវិធីច្បាប់។
