កំពង់ឆ្នាំង៖ រថយន្តតូរីសដឹកឈើប្រណិត២គ្រឿង ត្រូវសមត្ថកិច្ចបង្ក្រាបនៅកន្លែង២ខុសគ្នា នៅយប់ថ្ងៃទី១៨ និងទៀបភ្លឺថ្ងៃទី១៩ ខែកុម្ភៈ ឆ្នាំ២០១៤។ ករណីទី១បង្ក្រាបនៅក្នុងស្រុកបរិបូរណ៍ និងករណីទី២បង្ក្រាបនៅក្នុងស្រុកកំពង់ត្រឡាច ឈើប្រណិតទាំង២រថយន្តនេះមានចំនួន៦៨ដុំស្មើនិង៤,០២០ម៉ែត្រគូប។ សមត្ថកិច្ចបានអោយដឹងថា៖ការបង្ក្រាបលើកទី១បានធ្វើឡើងនៅវេលាម៉ោង១០និង២០នាទីយប់ថ្ងៃទី១៨ នៅលើផ្លូវជាតិលេខ៥ ស្ថិតនៅក្នុងភូមិផ្សារ ឃុំផ្សារ ស្រុកបរិបូរណ៍ រថយន្តដឹកឈើប្រណិតម៉ាកហ៊ីយ៉ាន់ដាយ ពណ៌ទឹកប៊ិច អត់ស្លាកលេខបានបើកចេញពីភូមិក្តុល ឃុំក្រាំងស្គារ ស្រុកទឹកផុស។
ពេលដឹកឈើប្រណិតប្រភេទនាងនួនពេញរថយន្តដែលមានចំនួន៤១ដុំ ចេញមកដល់ចំណុចខាងលើត្រូវបានសមត្ថកិច្ចចំរុះស្ទាក់ចាប់បាន ក្នុងពេលនោះដែរអ្នកបើកបរបានដកសោររថយន្តចុះរត់គេចខ្លួនបាត់។ លោកព្រះរាជអាជ្ញាខេត្តបានបញ្ជារអោយសមត្ថកិច្ចរដ្ឋបាលព្រៃឈើផ្នែកកំពង់ឆ្នាំងសណ្តោងយករថយន្តនេះមកដល់ខ័ណ្ឌនៅម៉ោង១២និង៣០នាទីយប់។ព្រឹកថ្ងៃទី១៩ សមត្ថកិច្ចចំរុះវាស់ឈើទាំង៤១ដុំឃើញមានចំនួន២,១០៩ម៉ែត្រគូប។
ករណីទី២រថយន្តម៉ាកហ៊ីយ៉ាន់ដាយពណ៌ទឹកប្រាក់ដឹកឈើប្រណិតប្រភេទនាងនួនមួយគ្រឿង បានបើកធ្លាក់ផ្លូវជាតិជាប់ផុងទៅមុខលែងរួចនៅវេលាម៉ោង៤និង៣០នាទីទៀបភ្លឺថ្ងៃទី១៩ នៅចំណុចភូមិផ្សារត្រាច ឃុំលង្វែក ស្រុកកំពង់ត្រឡាច។នាយរងផ្នែករដ្ឋបាលព្រៃឈើកំពង់ត្រឡាចបានអោយដឹងថា៖ នៅវេលាម៉ោង៥និង១៥នាទី សមត្ថកិច្ចលោកមានគ្នា៣នាក់បានទៅដល់កន្លែងកើតហេតុ ពុំឃើញមានអ្នកណានៅកន្លែងនោះឡើយ ហើយបានរាប់ឈើមានចំនួន២៧ដុំ ហើយដឹកឈើប្រណិតនោះមករក្សាទុកនៅផ្នែករដ្ឋបាលព្រៃឈើកំពង់ត្រឡាច និងបានវាស់វែងឃើញមានចំនួន១,៩១១ម៉ែត្រគូប និងបានកសាងសំណុំរឿងតាមនីតិវិធី។
ដោយឡែកមន្ត្រីនគរបាលមូលដ្ឋានបានអោយដឹងថា៖ ឈើប្រណិតនៅក្នុងរថយន្តខាងលើនេះមានចំនួន៣៤ដុំ ដែលក្នុងពេលរាប់នោះមានមន្ត្រីប៉ុស្តិ៍រដ្ឋបាលស្វាយនិងមន្ត្រីផ្នែករដ្ឋបាលព្រៃឈើកំពង់ត្រឡាច។ ដូចច្នេះករណីបាត់ឈើនាងនួនចំនួន៧ដុំ មិនដឹងថាអ្នកណាជាអ្នកលួចយកនោះទេ ។
ប្រភពព័ត៌មានមួយទៀតបានអោយដឹងថាៈ ២ថ្ងៃមុននេះរថយន្តដឹកឈើប្រណិត៥ គ្រឿងបានឆ្លងសាឡាងកំពង់ដរ ភូមិកំពង់ប្រាសាទ ឃុំកោះថ្កូវ ស្រុកកំពង់ត្រឡាច ឆ្ពោះទៅលក់ក្នុងខេត្តកំពង់ចាម ដែលគេដឹងថាមានអ្នកជូនផ្លូវទៀតផង។ករណីនេះសូមសមត្ថកិច្ចមេត្តាជ្រាប និងចាត់ការអោយមានប្រសិទ្ធិភាពផង ព្រោះគេដឹងថាក្នុង១យប់ៗមានរថយន្តដឹកឈើឆ្លងកាត់ខេត្តរាប់សិបគ្រឿង តែការបង្ក្រាបរបស់សមត្ថកិច្ចគឺបានតិចតួចនៅឡើយ៕ 
