ម៉ិកស៊ិកូៈ ក្រុមប៉ូលិសម៉ិកស៊ិកបានបើកប្រតិបត្តិការជួយសង្គ្រោះមនុស្ស៦០៧នាក់ ក្នុងនោះមានកុមារភាគច្រើនពីក្នុងមណ្ឌលប្រមូលផ្តុំដ៏អាថ៌កំបាំងមួយនៅប្រទេសម៉ិកស៊ិក។ នេះបើតាមវេបសាយបរទេសកាលពីថ្ងៃទី១៧ កក្កដា ២០១៤។ លោកអគ្គមេធាវី Jesus Murillo បាននិយាយថា ក្រុមប៉ូលិស និងយោធា បានឆ្មក់ចូលក្នុងជំរំនៃ មណ្ឌលដ៏អាថ៌កំបាំងមួយដែលត្រូវបានគេស្គាល់ថា ជាមហាគ្រួសារ "La Gran Familia" (The Big Family) នៅទីក្រុង Zamora កាលពីថ្ងៃអង្គារ បន្ទាប់ពីទទួលពាក្យបណ្តឹងយ៉ាងហោចណាស់៥០ ដែលនាំឲ្យឈានដល់ប្រតិបត្តិការនេះ។ 
ជំរំនៃមណ្ឌលដ៏អាថ៌កំបាំងមួយនេះស្ថិតនៅភាគខាងលិចខេត្ត Michoacan គ្រប់គ្រងដោយប្រធានឈ្មោះ Rosa Verduzco ដែលពេលនេះ លោកស្រីនិងបុគ្គលិក៨នាក់ទៀតត្រូវបានសាកសួរផងដែរ។ បន្ទាប់ពីបើកប្រតិបត្តិការឆ្មក់ចូលរំដោះសង្គ្រោះមនុស្សទីនោះ តួលេខត្រូវបានគេរាយការណ៍ឲ្យដឹងថា មានក្មេងប្រុសចំនួន 278 boys, ក្មេងស្រីចំនួន 174 girls និងមនុស្សពេញវ័យ 138 adults ក្រៅពីនោះជាមនុស្សចាស់ វ័យចាប់ពីអាយុ៤០ឡើងទៅក៏មាន។ 
លោកអគ្គមេធាវី Jesus Murillo បានបន្តថា យើងរកឃើញកុមារប្រមាណ៥០០នាក់ រស់នៅក្នុងលក្ខខណ្ឌអាក្រក់ ហើយមានបណ្តឹងឪពុកម្តាយជាច្រើនបានប្តឹងថាពួកគេមិនអាចយកកូនចៅរបស់ពួកគេត្រឡប់ទៅផ្ទះវិញបន្ទាប់ពីមើលឃើញការរំលោភបំពាននានា។ ឪពុកម្តាយក្មេងមួយចំនួនបានរៀបរាប់ដំណើររឿងនៃការរំលោភបំពាននៅមណ្ឌលម៉ិកស៊ិក ថាពួកគេកំពុងរស់នៅជាមួយសត្វកណ្តុរ សត្វល្អិត ហើយត្រូវប្រធានមណ្ឌលនេះ និងបុគ្គលិក៨នាក់ផ្សេងទៀតបង្ខំឲ្យដេកលើកម្រាលឥដ្ឋ កន្លែងមិនសមរម្យ និងបង្ខំឲ្យសុំទានតាមដងផ្លូវ ព្រមទាំងមានការរំលោភបំពានផ្លូវភេទជាដើម៕ ហង្ស សុមុនី
