ត្បូងឃ្មុំ: ឯកឧត្ដម ខាន់ ខុន ទីប្រឹក្សាក្រសួងធម្មកានិងសាសនា និងជាថ្នាក់ដឹកនាំសមាគមបេសកកម្មដំណឹងល្អ បានអញ្ជើញនាំយកអំណោយមនុស្សធម៌ជាស្បៀងអាហារ ចែកជូនបងប្អូនប្រជាពលរដ្ឋ ដែលជួបការលំបាកក្នុងជីវភាព ចំនួន១០០គ្រួសារ នៅក្នុងឃុំទន្លេបិទ ស្រុកត្បូងឃ្មុំ ដែលបានធ្វើឡើងនាព្រឹកថ្ងៃទី០១ ខែឧសភា ឆ្នាំ២០២០ ក្រោមវត្តមានឯកឧត្ដម ហេង ចេង ទីប្រឹក្សាក្រសួងធម្មកានិងសាសនា និងព្រឹទ្ធបូជាចារ្យ សរ ពលះ ប្រធានសម្របសម្រួលបេសកកម្ម នៃប្រិយសម្ព័ន្ធគ្រិស្តបរិស័ទកម្ពុជា ដោយមានការអញ្ជើញចូលរួមពីឯកឧត្តម តេង ប៊ុណ្ណា អភិបាលរងខេត្តត្បូងឃ្មុំ និងថ្នាក់ដឹកនាំ មន្ត្រីរាជការ ជាច្រើនរូបផងដែរ។
ឯកឧត្តម តេង ប៊ុណ្ណា អភិបាលរងខេត្តត្បូងឃ្មុំ បានថ្លែងអរគុណចំពោះ ថ្នាក់ដឹកនាំសមាគមបេសកកម្មដំណឹងល្អ ឯកឧត្ដម ខាន់ ខុន ទីប្រឹក្សាក្រសួងធម្មកានិងសាសនា ដែលបានចូលរួមចំណែកជាមួយរាជរដ្ឋាភិបាល ក្នុងការគិតគូរពីសុខទុក្ខរបស់បងប្អូនប្រជាពលរដ្ឋ ដែលជួបការលំបាកក្នុងជីវភាព ហើយបានបរិច្ចាគថវិកាផ្ទាល់ខ្លួនសម្រាប់ជំនួយនាឱកាសនេះ ក៏ដូចជាការជួយជាអណ្តូងទឹកប្រើប្រាស់ ជូនដល់បងប្អូនប្រជាពលរដ្ឋ នាពេលកន្លងមក ដោយមិនប្រកាន់សាសនា ឬនិន្នាការនយោបាយអ្វីឡើយ។ 
ថ្លែងសំណេះសំណាលនាឱកាសនោះដែរ ឯកឧត្តម ខាន់ ខុន បានរំលឹកអំពីប្រវត្តិជូរចត់ ពីអតីតកាល ហើយបានអរគុណដល់សន្តិភាព ដែលបានផ្ដល់ឱកាសឲ្យឯកឧត្ដម សិក្សារៀនសូត្រ រហូតទទួលបានភាពជោគជ័យ និងមានមុខរបរ តួនាទី ការងារ ដែលអាចត្រលប់មកជួយប្រជាពលរដ្ឋ ក្នុងស្រុកភូមិកំណើតរបស់ខ្លួនបានជាបន្តបន្ទាប់ ហើយក៏សូមឲ្យប្រជាពលរដ្ឋ ចូលរួមថែរក្សាសុខសន្តិភាព ឲ្យបានគង់វង្ស ដេីម្បីអនាគតដល់កូនចៅជំនាន់ក្រោយៗផងដែរ។ 
ជាមួយគ្នានោះ គណៈអធិបតី ក៏បានក្រេីនរំលឹក ដល់បងប្អូនប្រជាពលរដ្ឋ សូមឲ្យបន្តអនុវត្តគម្លាតសុវត្ថិភាពបុគ្គល និងគម្លាតសុវត្ថិភាពសង្គម និងប្រេីប្រាស់ម៉ាស់នៅពេលចាំបាច់ ឲ្យបានគ្រប់ៗគ្នា។ ព្រោះវីរុសជំងឺកូវីដ-១៩ មិនទាន់ទៅណាឆ្ងាយពីយេីងនៅឡេីយទេ ហេីយបេីយេីងធ្វេសប្រហែសនោះ នឹងមានហានិភ័យខ្ពស់ណាស់ ក្នុងការចម្លងវីរុសនេះ ពីបុគ្គលម្នាក់ទៅបុគ្គលម្នាក់ទៀត ដែលនឹងអាចធ្លាក់ចូលទៅសភាពធ្ងន់ធ្ងរជាមិនខាន។
គួរបញ្ជាក់ផងដែរថា អំណោយដែលបានប្រគល់ជូនក្នុង១គ្រួសារៗ ត្រូវទទួលបាន អង្ករ០១បេ ស្មើនឹង១៥គីឡូក្រាម មី១៥កញ្ចប់ ត្រីខ១យួរ ទឹកត្រី០១ដប និងអាហារបំប៉ន១០កញ្ចប់ ផងដែរ ៕
