ខេត្តកែប៖ស្ថិតក្នុងភូមិសាស្ត្រឃុំអង្កោល ស្រុកដំណាក់ចង្អើរ ខេត្តកែប អស់ប្រមាណជាង១០ខ្នង ហើយគ្រោះមហន្តរាយនេះបានកើតឡើងបន្ទាប់ពីមានភ្លៀងធ្លាក់រយៈពេល៣ថ្ងៃបន្តបន្ទាប់គ្នា ប៉ុន្តែមិនបណ្តាលឲ្យរងគ្រោះដល់អាយុជិវិតមនុស្សឬសត្វឡើយ។ គ្រោះមហន្តរាយនេះបានកើតឡើងបន្តបន្ទាប់គ្នាចាប់តាំងពីថ្ងៃទី១៦រហូតដល់ថ្ងៃទី១៩ខែកក្កដា ឆ្នាំ២០១៤ខណៈដែលមានភ្លៀងធ្លាក់លាយឡំនឹងខ្យល់បោកបក់ដ៏ខ្លាំងក្លាទាំងយប់ទាំងថ្ងៃនោះ។
តាមរបាយការណ៍ដែលទទួលបានពីក្រុមអាជ្ញាធរគ្រប់គ្រងគ្រោះមហន្តរាយនេះបានឲ្យដឹងថា លំនៅដ្ឋានដែលកំពុងប្រឈមនឹងខ្យល់កន្ទ្រាក់ភាគច្រើនស្ថិតតាមតំបន់ក្បែរមាត់សមុទ្រ ដូចជាភូមិអំពែង ភូមិព្រែកតានេន ក្នុងឃុំអង្កោល ស្រុកដំណាក់ចង្អើរ ហើយតំបន់ខាងលើតែងតែជួបបញ្ហាខ្យល់ព្យុះ ខ្យល់កន្ទ្រាក់ជាញឹកញាប់ដែលជាកក្តាមួយបង្កផលលំបាកដល់ការរស់នៅរបស់ប្រជាពលរដ្ឋផងដែរ ពិសេសធ្វើឲ្យពួកគាត់ប្រឈមនឹងកង្វះទីជម្រក។
ក្រៅពីនោះគ្រោះមហន្តរាយផ្តើមពីធម្មជាតិនេះដែរក៏ជាបញ្ហាមួយបានធ្វើឲ្យអាជ្ញាធរគ្រប់លំដាប់ថ្នាក់មានក្តីកង្វល់ហើយក៏មានភាពមមាញឹកក្នុងការផ្តល់ជំនួយសង្គ្រោះផងដែរ។អាជ្ញាធរដែនដីបានបញ្ជាក់ថា ក្នុងថ្ងៃទី១៦ខែកក្កដាឆ្នាំ២០១៤ ខ្យល់កន្ទ្រាក់បានបំផ្លាញលំនៅដ្ឋានប្រជាពលរដ្ឋអស់៩ខ្នងស្ថិតក្នុងភូមិកោះសោម ឃុំអង្កោល ស្រុកដំណាក់ចង្អើរ ហើយនៅថ្ងៃទី១៩ខែកក្កដា ខ្យល់ព្យុះបានបំផ្លាញផ្ទះប្រជាពលរដ្ឋអស់តែ២ខ្នងទៀតស្ថិតក្នុងភូមិអំពែង ឃុំអង្កោល ស្រុកដំណាក់ចង្អើរ ដែលបញ្ហាខ្យល់កន្ទ្រាក់នេះបានកើតឡើងបន្តបន្ទាប់គ្នាថែមទាំងមានសន្ទុះខ្លាំងគួរឲ្យភ័យខ្លាចបំផុត។
ជាមួយគ្នានេះដែរ អាជ្ញាធរខេត្ត គឺលោកកែន សត្ថា ក្រោយពីបានទទួលរបាយការណ៍ ស្តីគ្រោះមហន្តរាយនេះ លោកក៏បានដឹកនាំសការីពាំនាំនូវជំនួយសង្គ្រោះ មានគ្រឿងឯបភោគនិងគ្រឿងបរិភោគរួមទាំងសម្ភារៈមួយចំនួនយកទៅចែកជូនដល់ប្រជាពលរដ្ឋដែលកំពុងរងគ្រោះដោយសារខ្យល់កន្ទ្រាក់ចំនួន១១គ្រួសារភ្លាមៗផងដែរ។
សូមបញ្ជាក់ថា ភូមិសាស្ត្រនៃឃុំអង្កោល ស្រុកដំណាក់ចង្អើរ កន្លងមកតែងតែជួបប្រទះនូវបញ្ហាប្រឈមនឹងគ្រោះធម្មជាតិ ដូចជាគ្រោះទឹកជំនន់និងគ្រោះមហន្តរាយដោយសារខ្យល់ព្យុះ ខ្យល់កន្ទ្រាក់ស្ទើគ្រប់រដូវកាល ហើយជារៀងរាល់ឆ្នាំអ្នករស់នៅក្នុងតំបន់ខាងលើតែងតែជួបបញ្ហាលំបាកព្រោះតែកក្តាគ្រោះមហន្តរាយដោយសារធម្មជាតិនេះ។ទន្ទឹមនឹងករណីប្រឈមគេសង្កេតឃើញអាជ្ញាធរគ្រប់លំដាប់ថ្នាក់ក៏មានការមមាញឹកចុះជួយដល់អ្នករងគ្រោះគ្រប់កាលៈទេសៈផងដែរ៕
