កំពង់ចាម: រថយន្តសណ្តោងរីម៉កមួយគ្រឿង ត្រូវបានអគ្គីភ័យឆាបឆេះ ខណៈពេលបេីកបរនៅលើផ្លូវសាធារណៈ ហើយជាន់ហ្វ្រាំងផ្ញុច បន្ទាប់ពីវាក់នឹងរថយន្ត១គ្រឿង ដែលបានបង្អង់ល្បឿនបត់ឆ្វេង ហេតុការណ៍នេះបានកើតមានឡើង កាលពីវេលាម៉ោង១១និង២០នាទីព្រឹក ថ្ងៃទី១១ ខែឧសភា ឆ្នាំ២០២០ នៅលើកំណាត់ផ្លូវជាតិលេខ៦ ត្រង់ចំណុចមុខមន្ទីរពេទ្យស្រុកបាធាយ ស្ថិតក្នុងភូមិបាធាយ ឃុំបាធាយ ស្រុកបាធាយ ខេត្តកំពង់ចាម ។
លោកវរសេនីយ៍ឯក សំ ណាល់ អធិការនគរបាលស្រុកបាធាយ បានឲ្យដឹងថា ករណីគ្រោះអគ្គីភ័យនេះបានកេីតមានឡេីង បន្ទាប់ពីរថយន្ត១គ្រឿង ម៉ាកហុីណូពណ៌ស ពាក់ស្លាកលេខ កំពង់ចាម3A8193 បើកបរដោយឈ្មោះ អ៊ុន សុផាត ភេទប្រុស អាយុ២៩ឆ្នាំ មានទីលំនៅបច្ចុប្បន្ន ភូមិឬស្សីវាលឃុំកក់ ស្រុកបរសេដ្ឋ ខេត្តកំពង់ស្ពឺ មានទិសដៅពីជើងទៅត្បូង លុះមកដល់ត្រង់ចំណុចកេីតហេតុខាងលើ បានវាក់នឹងកូនរថយន្តដែលបង្អង់ល្បឿនបត់ឆ្វេង ហើយក៏បានជាន់ហ្វាំងផ្ញុច ពេលនោះ សឺមីរឺម៉កបានរុញបត់ក្បាល ប៉ះនឹងពីដុងប្រេងចំនួន៣កាន ដែលដាក់នៅខាងក្រោកាប៊ីន បណ្តាលឲ្យធ្លាយឆាបឆេះសន្ធោសន្ធៅឡេីងតែម្តង។
ក្រោយពេលកើតហេតុភ្លាម លោកឧត្តមេសនីយ៍ទោ ឯមកុសល ស្នងការនគរបាលខេត្តកំពង់ចាម បានបញ្ជាឲ្យលោកវរសេនីយ៍ឯក សំ ណាល់ អធិការនគរបាលស្រុកបាធាយ ដឹកនាំកម្លាំងចេញរថយន្តពន្លត់អគ្គីភ័យ ចំនួន០២គ្រឿង អន្តរាគមន៍ពន្លត់ទាន់ពេល ដោយប្រើប្រាស់ទឹកអស់ចំនួន០៣រថយន្ត ៕
