ខេត្តស្ទឹងត្រែង៖រថយន្តមួយគ្រឿងបោះពួយយ៉ាងលឿន ទៅបុក និងគោយន្តកន្ត្រៃយ៉ាងពេញទំហឹង បណ្តាលឲ្យអ្នកជិះរួមដំណើរជាមួយគ្នានៅលើគោយន្តកន្ត្រៃនោះ បានរងរបួសធ្ងន់ និងស្រាលចំនួន០៩នាក់ ខណៈបើកបរទិសបញ្ច្រាស់គ្នា ។ហេតុការណ៍គ្រោះថ្នាក់ចរាចរណ៍នេះ បានកើតឡើងកាលពីវេលាម៉ោង១៧ និង៥០នាទី ក្នុងថ្ងៃទី១៤ ខែឧសភា ឆ្នាំ២០២០ ស្ថិតនៅចំណុចផ្លូវលំ ស្ថិតក្នុងភូមិកាំងចាម ឃុំកាំងចាម ស្រុកថាឡាបរិវ៉ាត់ ខេត្តស្ទឹង
ត្រែង។សមត្ថកិច្ចបានឲ្យដឹងថា:អ្នកជិះរួមដំណើរលើគោយន្តកន្ត្រៃសរុបទាំងអស់មានចំនួន១៣នាក់ ចំណែកអ្នករងរបួសធ្ងន់ និងស្រាលមានចំនួន០៩នាក់ ដោយឡែកអ្នករងរបួសធ្ងន់ចំនួន០៤នាក់ និងរបួសស្រាលចំនួន០៥នាក់ ។ សមត្ថកិច្ចបានបញ្ជាក់ថា អ្នកបើកបររថយន្តមានឈ្មោះ ព្រីង ពិសិដ្ឋ ភេទប្រុស អាយុ៣៧ឆ្នាំ មុនរបរជាអាជីវករ មានទីលំនៅរាជធានីភ្នំពេញ ។ បើកបររថយន្តម៉ាកMazda ពណ៌ត្រាវ ពាក់ស្លាកលេខភ្នំពេញ 2AZ 1057 បើកបរក្នុងទិសដៅ ពីលិចទៅកើត បានបុកជាមួយគោយន្តកន្ត្រៃ ម៉ាកគូបូតា ពណ៌ក្រហម បើក
បរក្នុងទិសដៅ បញ្ច្រាស់គ្នា ពីកើតទៅលិច ។ ហើយអ្នកបើកបរ គោយន្តមានឈ្មោះប៉ាង ព្រឹត្ត ភេទប្រុស អាយុ២៩ឆ្នាំ មុខរបរកសិករ មានទីលំនៅ ស្ថិតនៅក្នុងភូមិកើតហេតុខាងលើ ។
សូមបញ្ជាក់ថា: រថយន្តដែលបង្កគ្រោះថ្នាក់ខាងលើនោះ រងការខូចខាតមួយកំណាត់ខាងមុខ ចំណែកគោយន្តកន្ត្រៃមានការខូចខាតតែបន្តិចបន្តួចប៉ុណ្ណោះ រីឯមនុស្សដែលជិះនៅលើគោយន្តបានរងរបួសទាំងធ្ងន់ និងស្រាលចំនួន០៩នាក់ ក្រោយពេលកើតហេតុ ត្រូវបានដឹកបញ្ជូនយកទៅសង្គ្រោះនៅឯមន្ទីរពេទ្យបង្អែកស្ទឹងត្រែងខេត្ត ។ ចំណែករថយន្តបង្ក និងគោយន្តរងគ្រោះ ត្រូវបានសមត្ថកិច្ចមូលដ្ឋានរក្សាទុក រង់ចាំម្ចាស់ដោះស្រាយតាមផ្លូវច្បាប់ ៕
