កំពង់ចាម: សង្វៀនប្រជល់មាន់ និងអាប៉ោង បេីកដំណេីរការដោយលួចលាក់មួយកន្លែង ស្ថិតនៅក្នុងភូមិរវាង ឃុំខ្នុរដំបង ស្រុកជេីងព្រៃ ត្រូវសមត្ថកិច្ចខេត្តកំពង់ចាមឆ្មក់ធ្វើការបង្ក្រាប កាលពីរសៀលថ្ងៃទី១៧ ខែឧសភា ឆ្នាំ២០២០ ដោយឃាត់ខ្លួនក្រុមអ្នកញៀនល្បែង១០នាក់ ព្រមទាំងដកហូតបានម៉ូតូ១៣គ្រឿង រថយន្ត៤គ្រឿង រួមនឹងវុត្ថុតាងមួយចំនួនផងដែរ។
គួរបញ្ជាក់ផងដែរថា ក្នុងប្រតិបត្តិការនេះ ត្រូវបានធ្វើឡើង បន្ទាប់ពីមានបទបញ្ជា របស់គណៈបញ្ជាការឯកភាពខេត្តកំពង់ចាម កម្លាំងសមត្ថកិច្ចចម្រុះ ដឹកនាំដោយលោកវរសេនីយ៍ឯក ថាញ់ សុខវ៉ុន នាយការិយាល័យព្រហ្មទណ្ឌកម្រិតស្រាល នៃស្នងការដ្ឋាននគរបាលខេត្តកំពង់ចាម សហការជាមួយកម្លាំងអធិការដ្ឋាននគរបាលស្រុកជេីងព្រៃ 
ដឹកនាំដោយលោកវរសេនីយ៍ទោ កាំង គីមហុង អធិការរងស្រុកជេីងព្រៃ និងប៉ុស្តិ៍នគរបាលរដ្ឋបាលខ្នុរដំបង ព្រមទាំងមានការសម្របសម្រួលពីលោក សុធា ពិសិដ្ឋ ព្រះរាជអាជ្ញារង អមសាលាដំបូងខេត្តកំពង់ចាម បានចុះបង្ក្រាបទីតាំងលួចជល់មាន់មួយកន្លែង នៅចំណុចដីវាលកប់ខ្មោច ស្ថិតក្នុងភូមិរវាង ឃុំខ្នុរដំបង ស្រុកជើងព្រៃ ខេត្តកំពង់ចាម ហេីយឈានទៅដល់ឃាត់ខ្លួនបានជនសង្ស័យចំនួន១០នាក់ 
ព្រមទាំងដកហូតបាននូវវត្ថុតាងរួមមាន ម៉ូតូចំនួន១៣គ្រឿង រថយន្ត០៤គ្រឿង មាន់ជល់ចំនួន០២ក្បាល(ងាប់) កន្ត្រក់ដាក់មាន់ចំនួន០២ ស្គត់រុំខ្នាយមាន់មួយចំនួន(ប្រើរួច) កញ្ចក់សំរាប់បាំងមាន់ចំនួន០១ ប្រាក់ដុល្លារចំនួន១,០០០ដុល្លារ (មួយពាន់ដុល្លារ) ប្រាក់រៀលចំនួន៣,៥១០,០០០រៀល (បីលានហាសិបមួយមុឺនរៀល) ធុងក្លាស្សេចំនួន០១ និងហាន់តោសម្រាប់លេងអាប៉ោងចំនួន០១ ផងដែរ។ 
ចំពោះជនសង្ស័យ និងវត្ថុតាងខាងលើ ត្រូវបានបញ្ជូនទៅស្នងការដ្ឋានរបស់ខេត្តកំពង់ចាម ដើម្បីកសាងសំណុំរឿងតាមនីតិវិធីច្បាប់ ៕
