ព្រះវិហារ កាលពី ព្រឹកថ្ងៃអាទិត្យ ១១រោច ខែពិសាខ ឆ្នាំជូត ទោស័ក ព.ស.២៥៦៤ ត្រូវនឹងថ្ងៃទី១៧ ខែ ឧសភា ឆ្នាំ២០២០ នេះ លោក ប៉ែន ជឹង ប្រធានអនុសាខាកាកបាទក្រហមកម្ពុជាស្រុក និងក្រុមការងារបានចុះសួរសុខទុក្ខ និងនាំយកអំណោយមនុស្សធម៌ទៅចែកជូនលោកយាយចាស់ជរាក្រីក្រមានចៅៗតូចៗនៅក្នុងបន្ទុកចំនួន ០១គ្រួសារ ឈ្មោះ ហែម ផល្លា ភេទស្រី អាយុ ៦៨ឆ្នាំ មានចៅៗតូចៗចំនួន ០៣នាក់ ស្រី ០២នាក់ រស់នៅភូមិគូលែនត្បូង ឃុំគូលែនត្បូង ស្រុកគូលែន ខេត្តព្រះវិហារ ។
នៅក្នុងឱកាសនោះដែរ លោកប្រធានអនុសាខាកាកបាទ ក្រហមកម្ពុជា ស្រុកគូលែន បានពាំនាំនូវប្រសាសន៍ផ្តាំផ្ញើសាកសួរសុខទុក្ខពីសំណាក់ សម្តេចកិត្តិព្រឹទ្ធបណ្ឌិត ប៊ុន រ៉ានី ហ៊ុនសែន ប្រធានកាក បាទក្រហមកម្ពុជា ដែលសម្តេចតែងតែគិតគូរពីសុខទុក្ខរបស់បងប្អូនជានិច្ច ពោលគឺទីណាមានការលំបាកទីនោះមានកាកបាទក្រហមកម្ពុជា និងបានផ្តាំ ផ្ញើរអោយបងប្អូនដែលមានវត្តមាននៅទីនោះត្រូវមានអនាម័យ និងលាងសម្អាតដៃជាមួយសាប៊ូឱ្យបានជាប់ជាប្រចាំចូលរួមការពារ ទប់ស្កាត់មេរោគ កូវីដ១៩ និងមេរោគផ្សេងៗទាំងអស់គ្នា ។
សម្ភារផ្តល់ជូនរួមមាន៖ អង្ករ ២៥គីឡូក្រាម មី ១កេស ត្រីខ ១យួរ ទឹកស៊ីអ៉ីវ ១យួរ កញ្ចប់ឃីតមុងភួយ ក្រម៉ា សារ៉ុង ១កញ្ចប់ និង ថវិកាចំនួន ៩០.០០០៛ ។
ដោយសែមឡុំ
