កំពង់ឆ្នាំង៖ស្ត្រីមានផ្ទៃពោះជិតគ្រប់ខែម្នាក់បានស្លាប់នៅតាមផ្លូវនៅពេលក្រុមគ្រួសារដឹករូបនាងទៅកាន់មន្ទីរពេទ្យខេត្ត បន្ទាប់ពីរូបនាងដើរផុងជើងនិងប្រហោងក្ការនៅលើផ្ទះដួលបោកក្បាលពេញទំហឹងនិងជញ្ជាំង។ករណីគ្រោះថ្នាក់នេះបានកើតឡើងនៅវេលាម៉ោង ២យប់ ថ្ងៃទី ២០ ខែកក្កដា ឆ្នាំ២០១៤នៅក្នុងភូមិ ត្រពាំងស្បូវ ឃុំស្រែថ្មី ស្រុករលាប្អៀរ ខេត្តកំពង់ឆ្នាំង។ 
ក្រុមគ្រួសារស្ដ្រីរងគ្រោះបានអោយដឹងថា៖ជនរងគ្រោះមានឈ្មោះ លឿន ឡុន អាយុ៤០ឆ្នាំ រូបនាងមានផ្ទៃពោះជាង៩ខែហើយ កន្លងមកនាងធ្លាប់មានផ្ទៃពោះចំនួន៣ដង ប៉ុន្ដែកូនទាំងនោះមិនដែលគ្រប់ខែកើតមកទេគឺបានរលូតស្លាប់ទាំងអស់។ចំណែកប្ដីរបស់នាងឈ្មោះ មាស ចាន់ណា អាយុ៣១ឆ្នាំ មានមុខរបរជាកសិករដែលបានរៀបការជាមួយគ្នាជាង៤ឆ្នាំហើយ។ មុនពេលកើតហេតុរូបនាងបានក្រោកពីដំណេកទៅនោម នៅពេលដើរលើផ្ទះក៍បានផុងជើងនិងក្ដារក្រាលផ្ទះដែលប្រេះបែកជាពីបណ្ដាលអោយរូបនាងដួលទាំងជំហរបោកក្បាលនិងជញ្ជាំងផ្ទះពេញទំហឹងសន្លប់បាត់មាត់រហូត ភ្លាមៗនោះដែរក្រុមគ្រួសារក៍បានដឹកនាងតាមរ៉ឺម៉កម៉ូតូយកទៅសង្គ្រោះនៅមន្ទីរពេទ្យខេត្ត។
ប៉ុន្តែពេលទៅដល់មន្ទីរពេទ្យខេត្តគ្រូពេទ្យបានប្រាប់ថារូបនាងបានស្លាប់ទៅហើយ បន្ទាប់មកក្រុមគ្រួសារបានដឹកសពនាងត្រឡប់មកផ្ទះវិញដើម្បីធ្វើបុណ្យទៀនតាមប្រពៃណី។ គ្រោះថ្នាក់ដែលបណ្ដាលអោយនាងស្លាប់គឺជាឧប្បត្តិហេតុមួយ ប៉ុន្តែនេះក៍ជាការធ្វេសប្រហែសរបស់ប្ដីដែលមិនបានវាយដែកគោលក្ការក្រាលផ្ទះដែលបែកជាពីនោះអោយជាប់ទើបប្រពន្ធផុងជើងដួលស្លាប់បែបនេះ។
ម្យ៉ាងទៀតករណីដែលប្រពន្ធបានរលូតកូនរហូតដល់ទៅ៣ដងជាបន្តបន្ទាបនោះ ក៍ជាការធ្វេសប្រហែសរបស់ក្រុមគ្រួសារផងដែរ ព្រោះថាពេលនាងមានផ្ទៃពោះមិនបានជំរុញអោយរូបនាងអោយទៅពិនិត្យផ្ទៃពោះនៅមណ្ឌលសុខភាពឬមន្ទីរពេទ្យ ទើបបណ្តាលអោយទារកក្នុងផ្ទៃរលូតស្លាប់ជាបន្តបន្ទាបបែបនេះ។ ករណីខាងលើនេះ ជាសារមួយដល់ស្ត្រីមានផ្ទៃពោះគ្រប់រូបពិចារណា និងត្រូវភ្ញាក់រលឹកដោយខ្លួនឯង ដើម្បីថែរក្សាកូនក្នុងផ្ទៃអោយមានសុខភាពល្អនិងនភពេលឆ្លងទន្លេបង្កើតកូនមកដោយសុវត្តិភាព និងបានសុខសប្បាយដល់រូបម្តាយនិងកូន៕
