ឧត្តរមានជ័យៈ អាជ្ញាធរខេត្តឧត្តរមានជ័យ ប្រគល់ប័ណ្ណកម្មសិទ្ធដីធ្លីជូនប្រជាពលរដ្ឋស្រុកអន្លង់វែង ។ឯកឧត្តម ស ថាវី អភិបាលខេត្តឧត្តរមានជ័យ ព្រមទាំងមន្ត្រីគ្រប់ស្ថាប័នក្នុងខេត្តបានអញ្ជើញចុះចែកប័ណ្ណកម្មសិទ្ធដីធ្លីជូនប្រជាពលរដ្ឋក្នុងស្រុកអន្លង់វែងនេះចំនួន២លើកហើយ គឺលើកទី១ នៅថ្ងៃទី១៨ ខែឧសភា ឆ្នាំ២០១៣ មានចំនួន២ភូមិ គឺភូមិថ្មី និងភូមិអូស្រឡៅ ឃុំថ្លាត បានចំនួន៤៤០ប័ណ្ណ ដែលមានទំហំដី១,៤០២.២៧ហិកតា ស្មើនិង៣៤៨គ្រួសារ ។ 
លើកទី២គឺនៅថ្ងៃទី២២ ខែកក្កដា ២០១៤ នៅក្នុងសាលាស្រុកអន្លង់វែង ប្រជាពលរដ្ឋចំនួន៣ភូមិគឺ១ភូមិជប់តាមោគ និងភូមិស្រឡៅស្រោង នៃឃុំលំទង និងភូមិទួលគ្រួស នៃឃុំថ្លាត ដែលមានចំនួន៣០៤៤ប័ណ្ណ ទំហំដី១១,៣៩១ហិកតា(១ម៉ឺន១ពាន់៣៩១ហិកតា) ស្មើនិង២៥០៣គ្រួសារ ។ លោក ហែន បាគគង់ ប្រធានសូរិយោដីខេត្តឧត្តរមានជ័យបានលើកឡើងថា ដំណើរការនៃការធ្វើប័ណ្ណកម្មសីទ្ធជូនប្រជាពលរដ្ឋគឺធ្វើជាបន្តរបន្ទាប់ និងចែកជូនជាបន្តរបន្ទាប់គ្រប់ៗគ្នា ដោយគ្រាន់តែបានមុននិងក្រោយតែប៉ុណ្ណោះ ។
ចំពោះប័ណ្ណកម្មសិទ្ធដែលចែកជូនលើកទី២នេះ ដែលមានចំនួន៣,០៤៤ប័ណ្ណរួមមានៈ -ទ្រព្យរួមប្តីប្រពន្ធមាន ២,០៦៩ ប័ណ្ណ -ទ្រព្យខាងប្តី ១០១ ប័ណ្ណ -ទ្រព្យខាងប្រពន្ធ ២៩៣ ប័ណ្ណ -ទ្រព្យនៅលីវ ៥៨១ ប័ណ្ណ ចំពោះប្រជាពលរដ្ឋដែលមិនទាន់បានទទួលប័ណ្ណកម្មសិទ្ធនេះ គឺអាជ្ញាធរខេត្តនិងរៀបចំចែកជូនជាបន្តរលើក្រោយទៀត ។ 
ក្នុងឱកាសនោះដែរឯកឧត្តម ស ថាវី អភិបាលខេត្តបានមានប្រសាសន៍ផ្តាំផ្ញើរចំពោះប្រជាពលរដ្ឋក្នុងស្រុកអន្លង់វែងទាំងអស់ នៅពេលបានប័ណ្ណកម្មសិទ្ធហើយត្រូវចេះប្រើប្រាស់អោយត្រូវនិងតម្រូវការ និងអោយមានផលប្រយោជន៍ក្នុងគ្រួសារ ព្រោះការចែកប័ណ្ណនេះគឺមានតែម្តងទេ ប័ណ្ណនេះគឺជាអាយុជីវិតរបស់យើងហើយ ។ ចំពោះប្រជាពលរដ្ឋដែលតែងតែដើរកាប់ទន្ទ្រានដីព្រៃអានាធិបតេយ្យកន្លងមក ចាប់ពីពេលនេះតទៅពួកគាត់មិនអាចដើកាប់ទន្ទ្រានដីព្រៃដោយអនាធិបតេយ្យបានទៀតនោះទេ ពីព្រោះនិងអាចផ្តន្ទាទោសតាមច្បាប់ ៕
