ឧត្តរមានជ័យ. ប្រេងសាំង ម៉ាស៊ូត ដឹកតាមរថយន្តធុនយក្សពីថៃ មកកម្ពុជា ឆ្លងកាត់តាមច្រកអន្តរជាអូរស្មាច់ ក្រោមច្បាប់អនុញ្ញាតពីក្រសួងសេដ្ឋកិច្ច និងហិរញ្ញវត្ថុ របស់អាជ្ញាធរខេត្តឧត្តរមានជ័យ សំរាប់តម្រូវការឱ្យប្រើប្រាស់នៅក្នុងខេត្ត ក៏ប៉ុន្តែគេឃើញមានរថយន្តតូចៗដឹកបន្តពីទីតាំងស្តុកចែកចាយ ដឹកបន្តទៅតាមបណ្តាលខេត្តផ្សេងៗ។ លោក រ៉ែម ផល្លាវី ប្រធានគណៈកម្មការត្រួតពិនិត្យស្នាក់ការច្រកអន្តរជាតិអូរស្មាច់បានឱ្យដឹងនៅល្ងាចថ្ងៃទី២១ ខែកក្កដា ឆ្នាំ២០១៤នេះឱ្យដឹងថា ប្រេងសាំង និងប្រេងម៉ាស៊ូត ដែលនាំចូលពីប្រទេសថៃ ឆ្លងកាត់តាមច្រកអូរស្មាច់ គឺមានច្បាប់អនុញ្ញាតត្រឹមត្រូវពីក្រសួងសេដ្ឋកិច្ច និងហិរញ្ញវត្ថុ ដែលអាជ្ញាធរខេត្តបានស្នើរសុំ នាំចូលមកប្រើប្រាស់តាមតម្រូវការនៅក្នុងខេត្ត ។
ក៏ប៉ុន្តែជារៀងរាល់ថ្ងៃចំពោះសកម្មភាពរថយន្តដឹកប្រេងសាំង និងប្រេងម៉ាស៊ូត ក្នុងនោះរួមទាំងឧស្ម័នហ្គាស ដែលឆ្លងកាត់ច្រកអូរស្មាច់ យកមកស្តុកទុកក្នុងឃ្លាំង នៅក្នុងក្រុងសំរោង ខេត្តឧត្តរមានជ័យ រួចដឹកចែកចាយបន្តទៅតាមបណ្តាលស្រុកនានា នៅក្នុងខេត្តឧត្តរមានជ័យ តែផ្ទុយទៅវិញទំនិញឧស្ម័នចំហេះទាំងនេះ ត្រូវបានគេដឹកបន្តទៅចែកចាយទៅតាមខេត្តផ្សេងៗដូចជា ខេត្តព្រះវិហារ ខេត្តសៀមរាប ខេត្តបន្ទាយមានជ័យ និងរហូតដល់ខេត្តកំពង់ធំ។ 
ទោះបីការនាំចូលប្រេងសាំង ប្រេងម៉ាស៊ូត និងឧស្ម័នហ្គាស ពីប្រទេសថៃ មកកម្ពុជា ដោយមានការបង់ពន្ធឱ្យ គយត្រឹមត្រូវក្តី តែចំពោះការចែកចាយបន្តរបស់ឃ្លាំងស្តុកឧស្ម័នចំហេះទាំងនោះនៅក្នុងក្រុងសំរោង ដែលជ្រកក្រោមសញ្ញាច្បាប់របស់ក្រសួងសេដ្ឋកិច្ចនិងហិរញ្ញវត្ថុ អនុគ្រោះដល់តម្រូវការប្រើប្រាស់ក្នុងខេត្ត តែទំនិញឧស្ម័នចំហេះទាំងនោះ ត្រូវបានគេលួចដឹកទៅកាន់ទីផ្សារខេត្តផ្សេងៗ ធ្វើឱ្យប៉ះពាល់ដល់តំលៃទីផ្សាររបស់ក្រុមហ៊ុនឯកជននាំប្រេងសាំង ប្រេងម៉ាស៊ូត និងហ្គាស ដែលបានបង់ពន្ធចូលថវិការជាតិផងដែរ។
ឃ្លាំងស្តុកឧស្ម័នចំហេះនៅក្រុងសំរោង ខេត្តឧត្តរមានជ័យ សំរាប់ផ្គត់ផ្គង់ប្រើប្រាស់របស់ខេត្ត ដែលការនាំចូលទំនិញឧស្ម័នចំហេះខាងលើនេះ ពីប្រទេសថៃ មកកម្ពុជា ដែលក្នុងមួយថ្ងៃៗ ប្រេងដឹកតាមប្រភេទរថយន្តធុន យក្ស ហើយក្នុងមួយរថយន្តផ្ទុកប្រេងចាប់ពី ៣ម៉ឺនលីតឡើងទៅ ក្នុងនោះរថយន្តដឹកហ្គាស ត្រូវបានគេដឹកម្តងៗ គឺរាប់សិបធុងឯណោះ។
