កំពង់ចាម: ដេីម្បីចូលរួមទប់ស្កាត់ការឆ្លងរីករាលដាលនៃជំងឺកូវីដ១៩ នាព្រឹកថ្ងៃទី២២ ខែឧសភា ឆ្នាំ២០២០នេះ ក្រោមពាក្យស្លោកកម្ពុជា ចិន រួមចិត្ដរួមកម្លាំងគ្នា ជួយគ្នាទៅវិញទៅមក ក្រុមហ៊ុនហេងហ៊ីគ្រុប បានឧបត្ថម្ភម៉ាស ចំនួន២ម៉ឺន ជូនដល់រដ្ឋបាលខេត្តកំពង់ចាម សម្រាប់បម្រើក្នុងយុទ្ធនាការផ្សព្វផ្សាយសារអប់រំអំពីវិធានការបង្ការទប់ស្កាត់ការឆ្លងរីករាលដាលនៃជំងឺកូវីដ១៩ និងសម្រាប់ធ្វើការចែកជូនបងប្អូនប្រជាពលរដ្ឋ ដែលមកលម្ហែកាយកម្សាន្ត នៅសួនស្មៅមុខសាលាខេត្តកំពង់ចាម ក្រោមការណែនាំរបស់ឯកឧត្ដម អ៊ុន ចាន់ដា អភិបាលខេត្តកំពង់ចាម ។គួរបញ្ជាក់ផងដែរថា ក្រោយពីមានការព្យាបាលអ្នកជម្ងឺកូវីដ-១៩ ជាសះស្បើយ នៅកម្ពុជា រដ្ឋបាលខេត្តកំពង់ចាម សង្កេតឃើញថា ប្រជាពលរដ្ឋមិនមានការភ័យខ្លាច និងបាត់បង់ការប្រុងប្រយ័ត្នចំពោះ ជម្ងឺកូវីដ-១៩ ហើយនៅតាមភោជនីយដ្ឋាន អាហារដ្ឋាន ទីផ្សារ មីនីម៉ាត និងចំណតរថយន្តមួយចំនួនខ្វះការប្រុងប្រយ័ត្ន ទាំងម្ចាស់ភោជនីយដ្ឋាន អាជីវករ ម្ចាស់រថយន្ត និងភ្ញៀវ ដោយពុំបានអនុវត្តតាមការណែនាំរបស់ក្រសួងសុខាភិបាល និងអង្គការសុខភាពពិភពលោកឡេីយ។ ដូច្នេះ ដើម្បីចូលរួមបង្ការ និងទប់ស្កាត់ ការរីករាលដាល នៃជម្ងឺកូវីដ-១៩ ឲ្យកាន់តែ មានប្រសិទ្ធភាពខ្ពស់ថែមទៀតនោះ រដ្ឋបាលខេត្តកំពង់ចាម សូមអំពាវនាវដល់ម្ចាស់ភោជនីយដ្ឋាន អាហារដ្ឋាន គណៈអាជីវករ ម្ចាស់មីនីម៉ាត ម្ចាស់ម៉ាត ម្ចាស់ចំណតរថយន្តក្រុង ចំណតរថយន្ត ម្ចាស់រថយន្តឈ្នួល ទាំងអស់ ត្រូវបន្តការប្រុងប្រយ័ត្ន និងគោរពឲ្យបានត្រឹមត្រូវតាមការណែនាំរបស់ក្រសួងសុខាភិបាល ស្តីពីផែនការទប់ស្កាត់ការឆ្លងរីករាលដាល នៃជម្ងឺកូវីដ-១៩ ៕
