ខេត្តព្រះវិហារ កាលពីរសៀលថ្ងៃទី២២ ខែកក្កដា ឆ្នាំ២០១៤សិក្ខាកាមចំនួន១២០នាក់មកពីមន្ទីរសាធារណៈការ និងដឹកជញ្ជូននៅទូទាំង២៤ខេត្តក្រុង ដឹកនាំដោយឯកឧត្តម មាស ម៉ូនីការ អនុរដ្ឋលេខាធិការក្រសួងសាធារណៈការ និងដឹកជញ្ជូន និងឯកឧត្តម គឹម សាន់ ប្រធាននាយកដ្ឋានបុគ្គលិក នឹងធនធានមនុស្សមកពីក្រសួងសាធារណៈការនឹងដឹកជញ្ជូនចុះធ្វើកម្មសិក្សាអំពីរបៀបធ្វើលូ និងថែទាំជួសជុលផ្លូវជាតិនៅទូទាំងខេត្តព្រះវិហារមានរយៈពេល២ថ្ងៃគឺចាប់ពីថ្ងៃទី២២ ដល់ថ្ងៃទី២៣ ខែកក្កដា ឆ្នាំ២០១៤នេះ ។
ឯកឧត្តម មាស ម៉ូនីការ និងឯកឧត្តម គឹម សាន់ រួមទាំងសិក្ខាកាមទាំងអស់បានចុះត្រួតពិនិត្យមើលអំពីលក្ខណៈបច្ចេកទេស និងរបៀបធ្វើលូនៅក្នុងសំណង់ការដ្ឋានធ្វើលូរបស់មន្ទីរសាធារណៈការ និងដឹកជញ្ជូនខេត្តព្រះវិហារ ។ លោក សំ លាងទ្រី ប្រធានមន្ទីរសាធារណៈការ និងដឹកជញ្ជូនខេត្តបានបកស្រាយអំពីរបៀបធ្វើលូ ដោយតំណាងសិក្ខាកាមបានចោទសួរទៅលោកថាៈ តើត្រូវធ្វើរបៀបណាដើម្បីឲ្យលូមានគុណភាពល្អទៅតាមស្តង់ដា និងលក្ខណៈបច្ចេកទេសត្រឹមត្រូវ ហើយលោកក៍បានបង្ហាញឲ្យដឹងថាៈ ដើម្បីផលិតលូឲ្យមានគុណភាពល្អយើង
ត្រូវយកថ្ម ស៊ីម៉ង និងខ្សាច់យកទៅពិសោធន៍ដើម្បីឲ្យដឹងថាតើត្រូវលាយកំរិតណាឲ្យស៊ីគ្នាល្អ បន្ទាប់មកយកទៅចាក់ក្នុងពុម្ពទុករយៈពេល២ថ្ងៃទើបដោះពុម្ពយកលូចេញមកប្រើប្រាស់នៅល្ងាចថ្ងៃដដែល បន្ទាប់ពីធ្វើបទបង្ហាញហើយសិក្ខាកាមទាំងអស់បានទៅចូលរួមទទួលទានបាយសាមគ្គីនៅមន្ទីរសាធារណៈការ និងដឹកជញ្ជូនខេត្តដោយមានវត្តមានឯកឧត្តម អ៊ុំ ម៉ារ៉ា អភិបាលនៃគណៈអភិបាលខេត្តព្រះវិហារចូលរួមសំណេះសំណាលដោយឯកឧត្តមបានជំរាបជូនភ្ញៀវសិក្ខាកាមទាំងអស់ផងដែរថាៈ ខេត្តព្រះវិហារមានសក្តានុពលលើវិស័យចំនួន ៣សំខាន់ៗ
គឺវិស័យទេសចរណ៍ វិស័យធនធានធម្មជាតិ និងវិស័យកសិកម្ម ក្រោមកិច្ចដឹកនាំដ៍ឈ្លាសវៃរបស់សម្តេចតេជោ សែន បានផ្តល់អាទិភាពផ្លូវគមនាគមន៍ដែលជាសសៃឈាមនៃសេដ្ឋកិច្ចជាតិរបស់យើង ។ នាព្រឹកថ្ងៃបន្ទាប់ទី២៣ ខែកក្កដា ឆ្នាំ២០១៤នេះដែរសិក្ខាកាមទាំងអស់បានធ្វើការបន្តដំណើរចុះត្រួតពិនិត្យអំពីរបៀបថែទាំ និងជួសជុលផ្លូវលេខ៦២ដែលរងនូវការខូចខាតមួយចំនួន ដូចជាស្នាមប្រះ បែកសំបុកមាន់ជាដើម ។ លោកប្រធានមន្ទីរសាធារណៈការ និងដឹកជញ្ជូនខេត្ត សំ លាងទ្រី បានធ្វើបទបង្ហាញថាៈ បើមានស្នាមប្រះ បែកសំបុកមាន់នោះយើងត្រូវតែធ្វើការជួសជុលឲ្យទាន់ពេលវេលា បើពុំនោះទេផ្លូវអាចខូចខាតកាន់តែធ្ងនធ្ងរបន្ថែមទៀត ។
លោកក៍បានបន្ថែមទៀតថាៈ យើងបានកត់សំគាល់ឃើញថានៅផ្លូវនៅក្នុងខេត្តព្រះវិហារទាំងមូលនៅចំណុចដែលកោងពុំមានការពង្រីកគឺដោយសារនៅទីនេះពុំមានឡានបើកបរឆ្លងកាត់ច្រើននោះទេ ហើយឡានដែលឆ្លងកាត់គឺពុំមានឡានដែលមានលក្ខណៈវែងដែលពិបាកក្នុងការបត់បែនផងដែរ ។ បន្ទាប់ពីចុះធ្វើកម្មសិក្សាតាមបណ្តោយផ្លូវជាតិលេខ៦២រួចមក សិក្ឋាកាមទាំងអស់ក៍បន្តដំណើរទៅខេត្តឧត្តរមានជ័យ បាត់ដំបង និងខេត្តប៉ៃលិនបន្តទៀត ។
