កំពង់ស្ពឺ ៖ ចៅក្រមសាលាដំបូង ខេត្តកំពង់ស្ពឺ បានចាប់ឃុំខ្លួនជនជាប់សង្ស័យម្នាក់ ដាក់ក្នុងពន្ធនាគាជាលើកទី២ បន្ទាប់ពីជននោះ ត្រូវបានតុលាការដោះលេងឱ្យនៅក្រៅឃុំជាបណ្តោះអាសន្នកាលពី២ខែមុន ដែលជាប់ចោទក្នុងករណីសមគំនិតធ្វើអំពើឃាតកម្ម ប៉ុន្តែដោយសមត្ថកិច្ចរកមិនឃើញពីកំហុសឆ្គង ដើម្បីដាក់បន្ទុកក៍ ដោះលេងស្រាប់តែពេលនេះត្រូវចាប់ខ្លួនសារជាថ្មី ដោយគ្មានមូលហេតុ ទើបបណ្តាលឱ្យមានប្រតិកម្ម ហើយរឿងរ៉ាវនេះអាចមកពីទំនាស់ផ្ទៃ ក្នុងរបស់មន្ត្រីតុលាកា ដែលកាន់សំណុំរឿងនេះ អំពីបញ្ហាផលប្រយោជន៍ ។
ជនជាប់សង្ស័យ ដែលត្រូវបានចាប់ខ្លួន ដាក់ពន្ធនាគា ខេត្តកំពង់ស្ពឺ លើក២ ស្ថិតក្នុងស្ថានភាពមិនប្រក្រតីនោះ មានឈ្មោះមាស ប្រុស ភេទ ប្រុស អាយុ ៥៤ ឆ្នាំមានទីលំនៅភូមិទី៣ ឃុំត្រែងត្រយឹង ស្រុកភ្នំស្រួច ខេត្តកំពង់ស្ពឺ ត្រូវបានចាប់ខ្លួនម្តងទៀត កាលពីថ្ងៃទី០៧ ខែកក្តដា ឆ្នាំ២០១៤ នៅក្នុងបរិវេន សាលាដំបូង ខេត្តកំពង់ស្ពឺ ខណៈពេលលោកចៅក្រម កោះហៅឱ្យមកបង្ហាញមុខ ចំពោះសមត្ថតុលាកា ទៅតាម ផ្លូវច្បាប់ ប៉ុន្តែត្រូវឃាត់ដោយនគរបាលតែម្តង ។ បន្ទាបើពីការចាប់ខ្លួនភ្លាមៗ បណ្តាលឱ្យមានប្រតិកម្មពីអ្នកច្បាប់មួយចំនួន ព្រមទាំងក្រុមគ្រួសារជនជាប់សង្ស័យផងដែរ ព្រោះខុសទាំងស្រុងតាមនិតិវិធីច្បាប់ ដោយសារគាត់មិនមានបទល្មើសផ្សេងៗឡើយ ហើយក៍បានបំពេញកាព្វកិច្ចតាមផ្លូវច្បាប់ស្រមតាមគោលការមន្ត្រីតុលាកាផងដែរ ។
យោងតាមដីការបង្គាប់ឱ្យដោះលេង លេខ៣៩ ចុះថ្ងៃទី២៣ ខែឧសភា ឆ្នាំ២០១៤ ដែលចេញដោយលោកតូង ពុធ្ធារ៉ា ចៅស៊ើបសួរ និងលោកសឿ ឡងឌី ព្រះរាជអាជ្ញារង អមសាលាដំបូង ខេត្តកំពង់ស្ពឺ បានសម្រេចដោះលេង ជនជាប់ចោទឈ្មោះមាស ប្រុស អាយុ ៥៤ឆ្នាំ រស់នៅភូមិ-ឃុំខាងលើឱ្យនៅក្រៅឃុំជាបណ្តោះអាសន្ន ដែលជាប់ចោទសមគំនិត ក្នុងអំពើឃាតកម្ម កាលពីថ្ងៃទី៣០ ខែមេសា ឆ្នាំ២០១៤ ត្រង់ចំណុចភូមិទី៣ ឃុំត្រែងត្រយឹង ស្រុកភ្នំស្រួច លើជនរងគ្រោះឈ្មោះនាង វ៉ាន់ជាង ភេទប្រុស អាយុ ៤៨ ឆ្នាំរស់នៅភូមិ-ឃុំជាមួយគ្នា ។
ការដោះលេងជនជាប់ចោទ ឈ្មោះ មាស ប្រុស ដោយសារតែសមត្ថកិច្ចរកមិនឃើញមានភស្តតាង ដើម្បីដាក់បន្ទុក ព្រោះក្នុងមុន និងពេលកើតហេតុ គាត់មិនបាននៅចំណុចនោះទេ ហើយក៍អត់បានដឹងឮរឿងនេះដែរ ប៉ុន្តែក្រោយដោះលេងឱ្យក្រៅឃុំជាបណ្តោះអាសន្ន បានរយៈពេល២ខែ ក៍ត្រូវឃាត់ខ្លួនលើកទី២តែម្តង ។ សូមរំលឹកថា កាលពីថ្ងៃទី០៣ ខែឧសភា ឆ្នាំ២០១៤កន្លងមកនេះ កើតមានករណីអំពើឃាតកម្មមួយ នៅភូមិទី៣ ឃុំត្រែងត្រយឹង ឆ្នាំ២០១៤ ដែលបង្ករឡើង ដោយឈ្មោះមាស ប្រាជ្ញ ហៅវ៉ាង ភេទ ប្រុស អាយុ ១៩ឆ្នាំ ត្រូវជាកូនបង្កើតរបស់ឈ្មោះមាស ប្រុស បានកាប់នឹងពូថៅទៅលើជនរងគ្រោះឈ្មោះនាង វ៉ាន់ជាង ភេទប្រុស អាយុ ៤៨ឆ្នាំបណ្តាលឱ្យស្លាប់ ។
បន្ទាប់ពីកើតហេតុជនប្រព្រឹត្តបានរត់គេចខ្លួនបាត់ ហើយសមត្ថកិច្ច ឃាត់ខ្លួនមនុស្សចំនួន ៣ នាក់មកធ្វើការសាកសួរ ទី១ឈ្មោះទុយ ប៉ិច អាយុ ៤៤ឆ្នាំជាម្តាយ ទី២ឈ្មោះមាស រិត ភេទប្រុស ត្រូវប្អូន និងទី៣ឈ្មើមាស ប្រុស ត្រូវជាឪពុកជនដៃដល់ ដើម្បីធ្វើការស្រាវជ្រាវឱ្យបានល្អិតល្អន់ រួចក៍សាងសំណុំរឿងបញ្ជូន ទៅកាន់ព្រះរាជអាជ្ញាសាលាដំបូងខេត្ត ដោយបានសន្និដ្ឋានថាឈ្មោះមាស ប្រាជ្ញ ពិតជាបានប្រព្រឹត្ត អំពើឃាតកម្មដោយចេតនា ប្រើពូថៅកាប់លើឈ្មោះនាង វ៉ាន់ជាងប្រាកដមែន ហើយឈ្មោះទុយ ប៉ិច និងឈ្មោះមាស រឹតបានរួមដំណើរជាមួយនៅកន្លែងកើតហេតុ និងឈ្មោះមាស ប្រុស ត្រូវជាឪពុកមិនស្ថិតនៅកន្លងនោះឡើយ ។
មន្ត្រីអ្នកច្បាប់ម្នាក់បាននិយាយថា បើតាមផ្លូវច្បាប់នៅពេលចៅក្រមស៊ើបសួរ រកមិនឃើញមានកំហុសដើម្បីដាក់បន្ទុកលើជនជាប់ចោទ គឺត្រូវដោះលេងឱ្យនៅក្រៅឃុំជាបណ្តោះអាសន្ន ប៉ុន្តែត្រូវមានកាព្វកិច្ចតាមផ្លូវច្បាប់ដូចជា៖ ទី១ មិនអនុញ្ញាតិឱ្យផ្លាសើប្តូរទីលំនៅឬចេញទៅក្រៅប្រទេសទេ ទី២ត្រូវបង្ហាញមុខនៅប៉ូលិសក្នុងរយៈពេលមួយខែម្តង ទី៣ ត្រូវចូលខ្លួនមកតុលាកាពេលមានដីការកោះហៅ ហើយករណីអនុវត្តចំពោះជនជាប់ចោទដែល គ្មានបទល្មើសផ្សេងៗទៀត ប៉ុន្តែដូចរឿងខាងលើនេះ លោកចៅក្រមដូចជាធ្វើខុសនឹងនិតិវិធីច្បាប់ជ្រុលពេកហើយ ។
ប្រភពដែលស្និតនឹងតុលាកាបានបង្ហើបប្រាប់ថា ករណីខាងលើស្ថិត ក្នុងសំណុំរឿងលេខ៩៤៥ ចុះថ្ងៃទី០២ ខែឧសភា ឆ្នាំ២០១៤ របស់ព្រះរាជអាជ្ញា អមសាលាដំបូង ខេត្តកំពង់ស្ពឺ ហើយពាក់រឿងដោះលេងឱ្យជនជាប់សង្ស័យឈ្មោះមាស ប្រុសឱ្យនៅក្រៅឃុំជាបណ្តោះអាសន្នលេខ៣៩ ចុះថ្ងៃទី២៣ ខែឧសភា ឆ្នាំ២០១៤នោះ គឺមានការឯកភាពគ្នារបស់ចៅក្រមស៊ើបសួរ និងដំណាងអយ្យកា ប៉ុន្តែពេលចាប់ខ្លួនលើកទី២គ្មានការចូលរួមពីអយ្យកាទេ ហើយបញ្ហានេះដំណាងអយ្យការ បានប្តឹងទៅសាលាឧទ្ធណ៍ ជំទាស់នឹងនិតិវិធីលោកចៅក្រមតូង ពុទ្ធារ៉ា ដែលបានអនុវត្តន៍ផ្ទុយពីនិតិវិធីច្បាប់ ។
ប្រភពបន្តថា រឿងហេតុនេះផ្តើមចេញពីបញ្ហាទំនាស់ផលប្រយោជន៍គ្នា ព្រោះល្បីថាសាច់ញាតិ ជនជាប់ចោទចំណាយប្រាក់អស់ជាច្រើនជាថ្នូរនឹងការដោះលេងនៅក្រៅឃុំបណ្តោះអាសន្ន ប៉ុន្តែប្រាក់ដែលទទួលបានតិចតូចបំផុត ។ លោកតូង ពុទ្ធា ចៅក្រមស៊ើបសួរ សាលាដំបូង ខេត្តកំពង់ស្ពឺ បានប្រាប់អ្នកយកព័ត៌មានឱ្យដឹង នៅរសៀលថ្ងៃទី២៣ ខែកក្តដា ឆ្នាំ២០១៤នេះថា ករណីនេះលោកមិនអាចធ្វើអត្ថាធិបាយបានទេ ព្រោះជារឿងសំងាត់របស់តុលាកា ហើយសំណុំរឿងនេះក៍កំពុងតែអនុវត្តន៍តាមផ្លូវតុលាកា ក្រៅពីនោះមិនអាចរាប់ប្រាប់អ្នកសាសែតបានឡើយ ។ ចំពោះលោកសឿ ឡងឌី ព្រះរាជអាជ្ញារង អមសាលាដំបូង ខេត្តកំពង់ស្ពឺ ដែលកាន់សំណុំរឿងនេះ មិនអាចសុំការបំភ្លឺជុំវិញ រឿងអាស្រូវមួយនេះបានទេ នៅល្ងាចម្សិលមិញដោយសារគាត់ប្រាប់ថា កំពុងតែជាប់រវុល ៕
