ខេត្តពោធិ៍សាត់៖ កម្លាំងជំនាញព្រហ្មទណ្ឌ នៃអធិការដ្ឋានស្រុកក្រគរ ប៉ុស្តិ៍នគរបាលរដ្ឋបាលក្បាលត្រាច សហការចុះអនុវត្តបណ្ដឹងរបស់ជនរងគ្រោះ ពាក់ព័ន្ធករណីលួច ។ករណីឃាត់ខ្លួនជនសង្ស័យពាក់ព័ន្ធលួចខាងលើ ធ្វើឡើងនារសៀលថ្ងៃសៅរ៍ ១រោច ខែជេស្ឋ ឆ្នាំជូត ទោស័ក ព.ស ២៥៦៤ ត្រូវនឹងថ្ងៃទី៦ ខែឧសភា ឆ្នាំ២០២០ ស្ថិតក្នុងភូមិប៉បុិត ឃុំអន្លង់ត្នោត ស្រុកក្រគរ ខេត្តពោធិ៍សាត់ ។នគរបាលប៉ុស្តិ៍រដ្ឋបាលក្បាលត្រាចប្រាប់ថា ជនសង្ស័យត្រូវបានកម្លាំងនាំខ្លួនឈ្មោះ សុខ តុលា ហៅរិទ្ធ ភេទប្រុស អាយុ ៣៣ឆ្នាំ ជនជាតិខ្មែរ បច្ចុប្បន្ន រស់នៅភូមិប៉បុិត ឃុំអន្លង់ត្នោត ស្រុកក្រគរ ខេត្តពោធិ៍សាត់ ជនសង្ស័យ(សុខ តុលា ហៅរិទ្ធ) បានធ្វើសកម្មភាពកាលពីវេលាម៉ោង៩ និង៣០នាទីព្រឹក ថ្ងៃទី១ ខែឧសភា ឆ្នាំ២០២០ កន្លងទៅ ។
នគរបាលប៉ុស្តិ៍ខាងលើបន្តថា ជនសង្ស័យ និងជនរងគ្រោះជាមនុស្សស្គាល់គ្នា នៅវេលាខាងលើជនសង្ស័យ(សុខ តុលា ហៅរិទ្ធ) បានជិះម៉ូតូឌុបមកផ្ទះជនរងគ្រោះឈ្មោះ សន វ៉ាន់ធឿន ខណៈនោះជនរងគ្រោះ(សន វ៉ាន់ធឿន)មិននៅផ្ទះនោះទេ ដោយកូនស្រីនៅខាងក្រោយផ្ទះ ជនសង្ស័យទំនងឃើញឲ្យល្អ លួចយកម៉ូតូ ១គ្រឿងម៉ាក SUZUKI X SOLO ១២៥CC ពាក់ស្លាកលេខ ភ្នំពេញ 1BM 8681 ជិះយកទៅបាត់ ។
នគរបាលប៉ុស្តិ៍ដដែលបន្តទៀតថា បន្ទាប់កូនស្រីទូរស័ព្ទប្រាប់អំពីរឿងរ៉ាវភ្លាម ខ្លួន(សន វ៉ាន់ធឿន)បានមកដាក់ពាក្យបណ្ដឹងនៅអធិការដ្ឋាននគរបាលស្រុកក្រគរ ជនសង្ស័យបានសារភាព និងកំពុងបំពេញសំណុំបែបបទ នៅអធិការដ្ឋាននគរបាលស្រុកក្រគរ ៕
