ខេត្តកំពង់ធំ៖ ក្រោមការយកចិត្តទុកដាក់ របស់ថ្នាក់ដឹកនាំខេត្តកំពង់ធំ មកលើថ្នាក់ក្រោមជាតិ និងចុះជួយដល់មូលដ្ឋានជាប់ជាប្រចាំ ដើម្បីរួមសុខរួមទុក្ខជាមួយប្រជាពលរដ្ឋ ក្នុងពេលជួបប្រទះនូវផលលំបាក ឬគ្រោះមហន្តរាយធម្មជាតិ ជាពិសេសនៅក្នុងរដូវវស្សា គ្រោះទឹកជំនន់តែងតែគំរាមគំហែង ដល់ជីវភាពរស់ នៅរបស់បងប្អូនប្រជាពលរដ្ឋក្នុងខេត្តកំពង់ធំ ។
ជាក់ស្តែងឯកឧត្តម គង់ វិមាន អភិបាលរងខេត្តកំពង់ធំ អនុប្រធានក្រុមការងារចុះជួយស្រុកស្ទោង ព្រមទាំងថ្នាក់ដឹកនាំស្រុកស្ទោង បានអញ្ជើញចុះត្រួត ពិនិត្យទឹកហូរផ្តាច់ផ្លូវលំ មួយកន្លែង ស្ថិននៅចំនុច ភូមិថ្មី ឃុំ ប្រឡាយ ស្រុកស្ទោង ខេត្តកំពង់ធំ នៅចំនុច សាងសង់ស្ពានបេតុង មួយកន្លែងដែលកំពុងតែសាង់សង់ បាន៨០ភាគរយ ដែលមានទំហំ៤គុណ៦ ម៉ែត្រ ក៏ត្រូវបានវាយប្រហារដោយទឹក ភ្លៀងបង្ករជាទឹកជំនន់ វា
យបំបាក់ត្រង់ចំនុចគល់ស្ពានទាំងសងខាង បណ្តាលឲ្យរាំងស្ទះការធ្វើដំណើរ ក្នុងការ ចរាចរទៅមក ព្រមទាំងបង្ករផលព្រួយបារម្ភណ៍ដល់ប្រជាពលរដ្ឋ ។ 
សកម្មភាពការចុះជួយរំដោះភាពទុក្ខលំបាក របស់ប្រជាពលរដ្ឋ ឯកឧត្តម គង់ វិមាន បានចំណាយថវិការផ្ទាល់សម្រាប់ការឧបត្ថម្ភដល់ កំលាំងពលកម្មដែលបានជួយទប់ស្កាត់ ទឹកនៅចំនុចធ្វើស្ពានហើយឲ្យបញ្ឈប់នូវការយកលុយពីបងប្អូនប្រជាពលរដ្ឋ នេះជាពិសេស ដោយសារតែទឹកមានកំលាំងខ្លាំង ទើបទទួលបានការជួយពីក្រុមហ៊ុនចិនធ្វើថ្នល់ នាំយកគ្រឿងចក្រអ៊ិចស្កា មកកាយដីទប់ចំនុចដាច់រហូតបានធ្វើឲ្យប្រជាពលរដ្ឋ អាចធ្វើដំណើរទៅមកបានសម្រាប់កង់និងម៉ូតូ និងបន្ត ដាក់ដីបន្ថែមដើម្បីឲ្យរថយន្ត គោយន្ត ឆ្លងកាត់បាន ។
តាមការឲ្យដឹងពីលោក កៅ សុផុន មេឃុំប្រឡាយ បានឲ្យដឹងថា ថវិការសាងសង់ស្ពាន ព្រមទាំងដីចាក់ផ្លូវលំគ្រោះ ក្រហម និងដាក់លូចំនួន២កន្លែង គឺជាថវិការរបស់មូលនិធិឃុំ ប្រឡាយដែលត្រូវបានចំណាយ១០៣,៣៨៩.០២៩រៀល សម្រាប់សាងសង់ស្ថាបនាផ្លូវ ពីចំនុចភូមិ ថ្មី ឆ្ពោះទៅ ភូមិតាទ្រា ,ភូមិស្រែតាម៉ែន លូសារាយ ,ស្រែក្រសាំង ដែលបានដេញថ្លៃនៅឆ្នាំ២០១៣ ។
ប្រភពពត៌មានរិះគន់ពីប្រជាពលរដ្ឋយ៉ាងធ្ងន់ធ្ងរ ទៅលើគ្រោងដេញថ្លៃមូលនិធិឃុំ ព្រមទាំងបទដ្ឋានក្នុងការដេញថ្លៃមូលនិធិ ដោយសារតែការដេញថ្លៃ មានការចុះភាគរយតិចតួចស្ទើរតែពុំបានចុះ ជាហេតុធ្វើឲ្យឃុំពុំមានថវិការ នៅសេសសល់ សម្រាប់ក្នុងការ ប្រើប្រាស់ ឬជួសជុលការិយាល័យ សម្ភារៈផ្សេងៗ ដែលត្រូវបានរងការចោទប្រកាន់ ទៅលើប្រធានគម្រោង ដែលគេជឿថាពិតជាមានភាពមិនប្រកតី ក្នុងនោះដែរប្រជាពលរដ្ឋច្រើនបានសំណូមពរដល់ គម្រោងមូលនិធិឃុំ ធ្វើការត្រួតពិនិត្យជាថ្មី នូវប្រព័ន្ឋរំដោះទឹក ដូចជាស្ពាន លូ និងផ្លូវលំ ដោយសារតែបច្ចុប្បន្ន ប្រជាពលរដ្ឋមានកំណើនកើនឡើង មានលទ្ធភាពក្នុងការទិញគ្រឿង យន្ត គ្រឿងចក្រ រថយន្តតូចធំ សម្រាប់បំរើការក្នុងវិស័យកសិកម្ម ឬឧស្សាហកម្ម ដែលជាហេតុបង្ករឲ្យមានផល ប៉ះពាល់ជាច្រើន ដូចជាស្ពាន លូរំដោះទឹក ភាគច្រើនមានទំហំតូចជាងផ្លូវ បង្ករផលលំបាកដល់ការចរាចណ៍ ក្នុងការដឹកជញ្ជូនកសិផលផ្សេងៗ។ 
ឯកឧត្តម គង់ វិមាន អភិបាលរងខេត្តកំពង់ធំ បានសំណូមពរ ឲ្យលោក ចាន់ អ្នកម៉ៅការសាងសង់ស្ពាន ឲ្យពង្រឹងនូវគុណភាពស្ពាន ឲ្យមានភាពមាំមួន តាមស្តង់ដា និងមានគុណភាព ក្នុងការប្រើប្រាស់បានយូរអង្វែង ចៀសវាងការសាងសង់ឲ្យរួចតែពីដៃ គ្មានគុណភាពបណ្តាលឲ្យខាតបង់ពេលវេលា និងបាត់បង់ថវិកាឃុំដោយអាសារបង់ ជាចុងក្រោយឯកឧត្តម គង់ វិមាន អនុប្រធានក្រុមការងារថ្នាក់ខេត្ត ចុះជួយស្រុកស្ទោង បានអំពាវនាវ ដល់បងប្អូនប្រជាពលរដ្ឋ មានការប្រុងប្រយ័ត្ន ថែរក្សាកូនចៅ និងសត្វពាហនៈ ដំណាំកសិកម្ម ព្រមទាំងសម្ភារៈផ្សេងៗការពារដោយ កុំឲ្យមានការខូចខាត ដោយសារទឹកជំនន់ ព្រមទាំងថែរក្សាសុខភាពអានាម័យ កូនចៅការពារកើតជំងឺរាក ដែលវាអាចមកតាមទឹកជំនន់។
