ព្រះវិហារ៖ គ្រោះថ្នាក់ចរាចរណ៍មួយបានកើតឡើងតាមបណ្តោយផ្លូវជាតិលេខ៦២ពីទីរួមខេត្តឆ្ពោះទៅកាន់តំបន់ប្រាសាទព្រះវិហារត្រង់ចន្លោះបង្គោលគីឡូម៉ែតលេខ១៤១និង១៤២ ស្ថិតក្នុងភូមិសាស្ត្រភូមិបាក់កាំ ឃុំឈានមុខ ស្រុកត្បែងមានជ័យ ខេត្តព្រះវិហារ កាលពីរសៀលថ្ងៃទី២៣ ខែសីហា ឆ្នាំ២០២០ ។
លោកវរសេនីយ៍ទោ រិទ្ធ សូណា អធិការនគរបាលស្រុកត្បែងមានជ័យ បានឱ្យដឹងថា នៅមុនកើតហេតុគេបានឃើញរថយន្តម៉ាកតូយ៉ូតា ពណ៌ទឹកប្រាក់ ១គ្រឿងពាក់ស្លាកលេខភ្នំពេញ 2z.75.12 បើកបរក្នុងល្បឿនលឿន។ លុះមកដល់កន្លែងកើតហេតុ ក៏បានបើកវ៉ាជែងរថយន្តខាងមុខ តែដោយល្បឿនលឿនបានរេចង្កួតធ្លាក់ផ្លូវបណ្តាលឱ្យក្រឡាប់ជាច្រើនត្រឡប់ ។
លោកអធិការស្រុកបានបន្តថាៈករណីគ្រោះថ្នាក់ចរាចរណ៍នេះគឺបានបណ្តាលឱ្យមានមនុស្សប្រុសស្រីស្លាប់២នាក់និងរបួសធ្ងន់ស្រាលចំនួន៥នាក់។ក្នុងនោះជនរងគ្រោះទី១,ឈ្មោះណាល់ផានិតភេទប្រុសអាយុ១២ឆ្នាំស្លាប់ភ្លាមៗ។ទី២,ឈ្មោះស្រីនិចភេទស្រីអាយុ២៥ឆ្នាំស្លាប់ក្រោយបញ្ជូនដល់មន្ទីរពេទ្យ។
ទី៣,ឈ្មោះម៉ៅសិលាភេទស្រីរងរបួសធ្ងន់ទី៤ឈ្មោះម៉ៅរិទ្ធយុងភេទប្រុសរងរបួសធ្ងន់ទី៥,ឈ្មោះស្រីសៅភេទប្រុសអាយុ២១ឆ្នាំរងរបួសទី៦,ឈ្មោះម៉ុចមឿងភេទស្រីអាយុ៦២ឆ្នាំរងរបួសធ្ងន់ទី៧,ឈ្មោះលឿនភេទប្រុស៦៣ឆ្នាំរងរបួសធ្ងន់។ជនរងគ្រោះទាំងអស់នៅភូមិបរិបូរឃុំត្បែងពីរស្រុកគូលែនខេត្តព្រះវិហារ៕
