សៀមរាប៖ នៅថ្ងៃទី២៥ ខែកក្កដា ឆ្នាំ២០១៤ វេលាម៉ោង១៧:០០Pm មន្ត្រីបរិស្ថានបឹងពែរឈ្មោះ គង់ សុធា ប្រធានស្នាក់ការជំរកសត្វព្រៃបឹងពែរ សង្កាត់ខ្វាវ បានជួលឈ្មោះ គិន លាង (ហៅឡេវ) ភេទប្រុស អាយុ៣៤ឆ្នាំ ជាប្រជាពលរដ្ឋរស់នៅភូមិខ្វាវ ឃុំខ្វាវ ស្រុកជីក្រែង ខេត្តសៀមរាប។
អោយអារឈើនឹងម៉ាស៊ីនត្រង់ស៊ីន័រ តាមសម្តីរបស់អ្នកស្រីថា ជាប្រពន្ធជនរងគ្រោះនិយាយថា៖ លោក គង់ សុធា អោយប្តីរបស់គាត់អារឈើដោយអោយឈ្នួលស្រាបៀរឆ្មាខ្មៅចំនួន ១០កំប៉ុង តែគាត់មិនព្រមអោយអារទេ ព្រោះប្តីរបស់គាត់ត្រូវទៅបាចជីស្រូវឯស្រែ។ ទោះបីជាយ៉ាងណា លោក គង់ សុធា លួងលោមប្តីរបស់អ្នកស្រីអោយអារឈើខានតែបាន។អ្នកស្រីបញ្ជាក់ទៀតថាប្តីរបស់គាត់បានសម្រេចចិត្តអារឈើបេងមុខកាត់ ១.៣ម៉ែត្រជុំ ចំនួន២ដុំ អោយមន្ត្រីបរិស្ថានឈ្មោះខាងលើដោយមិនព្រមស្តាប់អ្នកស្រីជាប្រពន្ធ។
ប្តីរបស់អ្នកស្រីបានអាររួច ១ដុំហើយបានបន្តអារ១ដុំទៀតដោយមិនទាន់ទាំងបានផឹកស្រាឈ្នួលផងស្រាប់តែមានឧបទ្ទវហេតុកើតឡើងដោយម៉ាស៊ីនត្រង់ស៊ីន័រ លោតឡើងលើអារកខ្លួនឯង ភ្លាមៗនោះ អ្នកជិតខាងក៏បានបញ្ជួនជនរងគ្រោះទៅមន្ទីរពេទ្យបង្អែកឃុំខ្វាវ តែត្រូវបានស្លាប់ដោយពុំអាចសង្គ្រោះទាន់ ។ ចំណែកមន្ត្រីបរិស្ថាន បានរត់គេចខ្លួនបាត់ស្រម៉ោលតែម្តង។ ដោយឃើញហេតុការដូចនេះ ប្រពន្ធជនរងគ្រោះបានដាក់ពាក្យបណ្តឹងទៅប៉ុស្តិ៍នគរបាលរដ្ឋបាលឃុំខ្វាវ ដើម្បីដោះស្រាយទៅតាមផ្លូវច្បាប់ ចំណែកឯសាកសពជនរងគ្រោះត្រូវបានញាតិមិត្តដឹកយកទៅគេហដ្ឋានដើម្បីធ្វើបុណ្យតាមប្រពៃណី។ ស្រុកជីក្រែង (ដោយ រៀម រិទ្ធី) 
