ខេត្តកណ្តាល៖ ផ្ទៃបឹងបួរ ព្រែក អូរ ទន្លេ ដីរាស្ត្រ ដីរដ្ឋ ដីព្រៃលិចទឹកដែលស្ថិតក្នុងអតីតដែនឡូត៏នេសាទនានាទូទាំងខេត្តកណ្តាល បច្ចុប្បន្ននេះត្រូវបានប្រជាពលរដ្ឋរាយការណ៍អោយដឹងថា ស្ទើរតែខ្លាយជាកម្មសិទ្ធិផ្តាច់មុខរបស់ពួកឈ្មួញមានអំណាចអស់ទៅហើយ ដែលពួកគាត់បានសម្តែងនូវការព្រួយបារម្ភយ៉ាងខ្លាំងទៅពេលអនាគត ព្រោះខ្លាចបាត់អាជីពប្រកបមុខរបរធ្វើការនេសាទ និងធ្វើស្រែចំការ ។ ប្រជាពលរដ្ឋបញ្ជាក់ថា ក្នុងចុងឆ្នាំ២០១៣ ដើមឆ្នាំ២០១៤នេះ ក្រោយពីការបោះឆ្នោតថ្នាក់ជាតិរួចមក ពួកឈ្មួញក្រាស់ៗមានលោកឧកញ៉ា ឯកឧត្តម លោកជំទាវ ល្បីៗឈ្មោះបោះសំលេងមួយចំនួន ចាប់ផ្តើមបញ្ចេញគ្រឿងចក្រទន្ទ្រានយកដីព្រៃលិចលិចទឹក យ៉ាងសំខាន់នោះអាណាធិបត្យេបំផុតស្ទើរទូទាំងស្រុកនៅក្នុងខេត្តកណ្តាល ចំពោះអាជ្ញាធរដែនដី និងក្រសួងជំនាញ ពិសេសរដ្ឋបាលជលផល ដែលមានតួនាទីការពារដីព្រៃលិចទឺកទាំងនោះ ហាក់ដូចបន្ធូរដៃហើយនាំគ្នារុញទូកទៅបណ្តោយទឹកតែម្តង ។
ការទន្ទ្រានយកដីព្រៃលិចទឹកយ៉ាងអាណាធិបតេយ្យមាននៅស្រុកមួយចំនួនក្នុងខេត្តកណ្តាល ដូចជា ស្រុកមុខកំពូល ខ្សាច់កណ្តាល ល្វាឯម កៀនស្វាយ លើកដែក កោះធំ ហើយខ្លាំងក្លាជាងគេគឺនៅស្រុកស្អាង និងស្រុកកណ្តាលស្ទឹង ពីសំណាក់លោកថៅកែធំៗដែលកំពុងមានអំណាចនិងទឹកប្រាក់ដ៏មហាសាល ៕ ប្រភពីប្រជាពលរដ្ឋស្រុកកៀនស្វាយ ស្រុកលើកដែក បានអោយដឹងថា ផ្ទៃដីព្រៃលិចទឹករាប់ពាន់ហិកតានៅចំណុចប្រសប់ស្រុកស្អាង កៀនស្វាយ លើកដែក ខាងលើប្រឡាយយាយបូរ ត្រូវបានក្រុមហ៊ុន ឡោក ហួរ ធ្វើការទន្ទ្រានហុំព័ទ្ធលើកជាទំនប់យកអស់ហើយ ពួកគាត់មិនដឹងថា ក្រុមហ៊ុននោះមានច្បាប់យ៉ាងណាទេ ប៉ុន្តែពួកគាត់ដឹងថា ជាដីបឹងរបស់រដ្ឋ ហើយពលរដ្ឋអាស្រ័យទៅលើបឹងបួរទាំងនោះរាប់ទស្សវត្សមកហើយ ។
ប្រភពពីប្រជាពលរដ្ឋឃុំពោធិបាន ស្រុកកោះធំ បានអោយដឹងថា ផ្ទៃដីព្រៃលិចទឹករាប់ពាន់ហិកតាត្រង់ចំណុចទួលព្រះយូហឹង ខាងកើតវត្តទួលរាជា ត្រង់ចំណុចប្រសប់ភូមិសាស្ត្រស្រុកកោះធំ និងស្រុកស្អាង ត្រូវបានឯកឧត្តមផ្កាយ៣យោធាអង្គរក្ស កំពុងឈូសឆាយហុំព័ទ្ធយកធ្វើជាកម្មសិទ្ធផ្តាច់មុខអស់ហើយដែរ ។ ប្រភពពីប្រជាពលរដ្ឋភូមិលេខ៣ ឃុំប្រាសាទ ស្រុកស្អាង បានរាយការណ៍អោយដឹងថា ដីព្រៃលិចទឹកក្នុងអតីតឡូត៏នេសាទលេខ៤ ៥ ចាប់ពីករទល់អូរសន្តៃ អន្លង់ត្រែងទឹក អូរកោះទង់រហូតដល់អុរតាបែខាងត្បូងវត្តប្រាសាទ ដល់ព្រំប្រទល់ឡូត៏នេសាទលេខ៦ ស្រុកលើកដែក និងឡូត៏លេខ៧ ស្រុកកោះធំក៏ត្រូវបានពួកឈ្មួញទន្ទ្រាននិងកាន់កាប់យកអស់ហើយដែរ ដោយក្រោមលេសអោយឈ្មួញកណ្តាល (ពួកគួកជេរ) ដើរបំផុសពលរដ្ឋល្ងិតល្ងង់ផ្តិតមេដៃលក់អោយក្រុមហ៊ុនពួកគេដែលដំបូងជាលុយកក់សិន គឺមួយគ្រួសារ៣០ដុល្លាសិន ។ ពលរដ្ឋបន្តថា ក្នុងនោះមេបំផុសបំផុលគឺជាមេសហគមន៍ ឃុំប្រាសាទឈ្មោះចាន់ ផល្លី ជាមេខ្លោងជាអ្នកដើរចែកលុយកក់យ៉ាងអាណាធិបតេយ្យមិនខ្លាចញញើតនិងអាជ្ញាធរទេ បើទោះបីអាជ្ញាធរហាមឃាត់យ៉ងណាក៏ដោយ ។ 
ប្រភពច្បាប់ការមួយពីពលរដ្ឋឃុំត្រើយស្លាបានអោយដឹងថា ដីបឹងនៅចំណុចអូរតាអាំ អូរប៉ុក ក្នុងអតីតឡូត៏លេខ៤ ប្រមាណជិត៣០០ហិកតា ត្រូវបានក្រុមហ៊ុនលោកប៊ុន ច័ន្ទគ្រឹស្នា លើកទំនប់ហុំព័ទ្ធរួចរាល់ហើយជាការស្រេចនៅក្នុងដើមខែកក្កដា ឆ្នាំ២០១៤នេះ ករណីនេះក្រុមការងារក្រុមហ៊ុនលោកប៊ុន ច័ន្ទគ្រឹស្នា អះអាងថា មានច្បាប់ត្រឹមត្រូវពីក្រសួង ជំនាញរដ្ឋបាលជលផល ចំណុចនេះពលរដ្ឋមិនយល់ទេ ហេតុអ្វីថ្នាក់លើចេញច្បាប់អោយបំផ្លាញដីព្រៃលិចទឹកដែលជាជម្រកដ៏សំខាន់សំរាប់មច្ឆាជាតិជ្រកនៅពងកូនបែបនេះ? ។ ពលរដ្ឋឃុំត្រើយស្លាបានបន្តទៀតថា ផ្ទៃដីនៅខាងកើតអាងពាមសូរ (ភូមិយួន) តំបន់នប្រឡាយលេខ៧៥ អតីតឡូត៏នេសាទលេខ៤ ជិត២០០ហិកតា ក៏ត្រូវបានឈ្មោះ ចឹម គឺជាមេភូមិទួលក្តី (លេខ៩) និងឈ្មោះហុក សំបូរ ឈ្មោះយុង សារ៉ាន់ជាមេការធំឃុបឃិតគ្នាលក់ដីរដ្ឋ និងដីរាស្ត្រមួយចំនួនអោយទៅឈ្មួញ ឈ្មោះហ៊ុន ហៀ ហើយហ៊ុន ហៀ លើកទំនប់រួចរាល់ថ្មីៗមកនេះ ប៉ុន្តែត្រូវបានជលផលខណ្ឌកណ្តាល ចុះចាប់គ្រឿងចក្របាន៣គ្រឿង រួចអោយឈូសឆាយលក់ប្រឡាយដែលជីកហើយនោះវិញ និងពិន័យជាប្រាក់ចូលថវិការរដ្ឋចំនួន១០លានរៀល ។
ពលរដ្ឋភូមិព្រែកតាតិន ឃុំស្វាយប្រទាល បានអោយដឹងថា ដីព្រៃលិចទឹកក្នុងឡូត៏លេខ៣ ចាប់ពីព្រំប្រទល់ស្រុកកៀនស្វាយ រហូតដល់ខ្នងអាងយុវជនជាង២០០ហិកតា ត្រូវបានលោកឧកញ៉ាកែវ សាន្ត កាន់កាប់អស់កាលយូរឆ្នាំមកហើយ បច្ចុប្បន្នគាត់លក់តែត្រីធម្មជាតិតាមប្រឡាយអោយទៅឈ្មោះគឹម ពេញអធិការរងស្រុកស្អាង រាប់ម៉ឺនដុល្លាក្នុងមួយឆ្នាំៗ លោកគឹម ពេញ កាន់កាប់នេសាទដោយឧបករណ៍ល្មើសច្បាប់បូមពង្រីងបឹងឆក់យ៉ាងអាណាធិបតេយ្យ គ្មានអោយប្រជារាស្ត្រណាម្នាក់ចូលទៅនេសាទត្រី ឬច្រូតស្មៅគោ ឬបេះត្រកួនអោយជ្រូកស៊ីបានឡើយ ។ ប្រជាពលរដ្ឋភូមិលេខ៣ ព្រែកយូហឹង ឃុំត្រើយស្លាបានអោយដឹងទៀតថា ដីបឹងចាប់ពីចុងព្រែកព្រះយូហឹង រហូតដល់ខ្នងអាងយុវជនខាងត្បូង ក្នុងឡូត៏នេសាទលេខ៣ពីមុន ក៏ត្រូវស្ត្រីឈ្មោះ ច្រេង សៀក រស់នៅភូមិលេខ៣ឈូសឆាយនិងទន្ទ្រានយកក្នុងពេលថ្មីៗនេះដែរ ។ ប្រភពពីប្រជាពលរដ្ឋឃុំក្រាំងយ៉ូវ បានប្រាប់អោយដឹងថា ដីអតីតឡូត៏នេសាទលេខ១ ចំណុចបឹងធំ បឹងស្លាបទា រាប់រយហិកតាត្រូវបានក្រុមហ៊ុនកុក អាន កំពុងលើកទំនប់ហុំព័ទ្ធយកស្ទើររួចរាល់ហើយដែរ ។
តាមសេចក្តីរាយការណ៍ពីប្រជាពលរដ្ឋភូមិតានូ ឃុំស្អាងភ្នំបានអោយដឹងថា ដីព្រៃលិចទឹករាប់រយហិកតាក្នុងឡូត៏លេខ១ជាប់ព្រំប្រទល់ស្រុកកណ្តាលស្ទឹង កំពុងត្រូវបានឈ្មួញមានអំណាចពីរក្រុម កំពុងឈ្លោះហែកហួរដណ្តើមគ្នាយកធ្វើជាកម្មសិទ្ធិរៀងខ្លួន ក្នុងនោះមានលោកជំទាវសារឿន លោកជំទាវលន់ ហៅយាយលន់ និងលោកជំទាវ សៀង ចាន់ហេង ប្រធានក្រុកហ៊ុនហេងអភិវឌ្ឍន៍ ដែលល្បីល្បាញសំបូរដីធ្លីជាងគេនៅខេត្តកណ្តាល សំបូរទាំងប្រាក់ សំបុរទាំងរឿងរ៉ាវទាស់ទែងគ្នារវាងក្រុមហ៊ុននិងក្រុមហ៊ុន និងជាមួយរាស្ត្រស្លូតត្រង់នៅស្រុកកណ្តាលស្ទឹង ហើយដីយាយហេងកន្លែងណាក៏មានប្លង់និងជាកម្មសិទ្ធិផងដែរ ព្រោះប្លង់គាត់សុទ្ធតែជិះយន្តហោះបាញ់ពីលើអាកាស់តែម្តង ។ ប្រភពពីប្រជាពលរដ្ឋពីភូមិព្រែកតានប់ ឃុំកំពង់ស្វាយ ស្រុកកៀនស្វាយ បានអោយដឹងថា ដីបឹងក្នុងឡូត៏លេខ៣រាប់រយហិកតាត្រង់ចំណុចប្រសប់ស្រុកកៀនស្វាយ និងស្រុកស្អាងក៏ឈ្មួញពីរក្រុមកំពុងហែកហួរគ្នាយកដែរ ហើយកំពុងប្តឹងផ្តល់គ្នាទៀតផង គឺក្រុមឯកឧត្តម ឈន សារីណេ និងក្រុម យូ ណារិន ជាមន្ត្រីយោធាដូចគ្នា ។
ខាងភាគីឈន សារីណេ បានអះអាងថា គាត់បានទិញដីនេះស្របច្បាប់ពីក្រុមហ៊ុន 7NG ដោយមានអាជ្ញាធរមូលដ្ឋានទទួលស្គាល់ ចំណែក យូ ណារិន អួតថា ទិញពីប្រជាពលរដ្ឋជាយូរឆ្នាំមកហើយដែរ ។ ទាក់ទិនការរំលោភបំពានទន្ទ្រានដីព្រៃលិចទឹកដែលជាសម្បត្តិខាងលើរបស់អ្នកមានអំណាច មានប្រាក់ខាងលើនេះត្រូវបានមន្ត្រីរដ្ឋបាលជលផលថ្នាក់ខ្ពស់អះអាងថា ទោះបីឡូត៏នេសាទត្រូវកាត់រំសាយក្តី ដីព្រៃក្នុងអតីតឡូត៏នេសាទនានាទាំងអស់ស្ថិតជាសម្បត្តិរដ្ឋដ៏ដែល ដែលគ្រប់គ្រងដោយអាជ្ញាធរដែនដីគ្រប់លំដាប់ថ្នាក់ ពិសេសគឺនាយកដ្ឋានរដ្ឋបាលជលផល រហូតខណ្ឌ ផ្នែក និងសង្កាត់ជលផលស្រុក ការទន្ទ្រានបំពានដីធ្លី ដីបឹងខាងលើគឺជារឿងខុសច្បាប់ស្ទើរទាំងស្រុង ៕ រ៉ាំបូរ
