ក្រុងញូវដែលី៖ យ៉ាងហោចណាស់មានមនុស្សចំនួន២០នាក់ រួមទាំងអ្នកបើកបររថយន្តដឹកសិស្សានុសិស្សទាំងនោះផងត្រូវបានស្លាប់ និងរបួសជាច្រើននាក់ក្នុងឧបទ្ទវហេតុ រថភ្លើងបុកជាមួយរថយន្តក្រុងដឹកសិស្សនៅភាគខាងលិច រដ្ឋតេឡង់ហ្គាណា ប្រទេសឥណ្ឌា កាលពីថ្ងៃព្រហស្បតិ៍ ។ 
នាយរងប៉ូលិសម្នាក់បាននិយាយថា ឧបទ្ទវហេតុកើតឡើងនៅម៉ាស្ហាយ៉ាប៉េតា ស្ថិតក្នុងស្រុកមេដាក ជិតរដ្ឋធានីហ៊ូដេរ៉ាបាដ ខណៈពេលអ្នកបើកបររថយន្តក្រុងដែលដឹកសិស្សចំនួនប្រមាណ៤០នាក់ មិនបានប្រុងប្រយ័ត្ន ហើយជ្រុលទៅបុកជាមួយរថភ្លើងដែលកំពុងមានល្បឿនលឿន។
មន្ត្រីដែលសុំមិនបញ្ចេញឈ្មោះបាននិយាយបន្ថែមទៀតថា ខណៈពេលសិស្ស និងអ្នកបើកបរ រថយន្តក្រុង២០នាក់បានស្លាប់បាត់បង់ជីវិតភ្លាមៗនៅកន្លែងកើតហេតុនោះ សិស្សដែលរងរបួសផ្សេងទៀតត្រូវបានដឹកទៅសង្គ្រោះព្យាបាលនៅមន្ទីរពេទ្យក្បែរនោះ តែចំនួនអ្នកស្លាប់អាចកើនឡើងបន្ថែមទៀតដោយសារស្ថានភាពអ្នករបួសមានសាពធ្ងន់ធ្ងរ៕
