កំពង់ឆ្នាំង៖ បន្ទាប់ពីធ្វើការស្រាវជ្រាវអស់រយៈពេលជាង១ខែកន្លងមកនេះ សមត្ថកិច្ចនគរបាលជំនាញនៃអធិការដ្ឋាននគរបាលក្រុងកំពង់ឆ្នាំង បានសំរេចបញ្ជូនភស្តុតាងពាក់ពន្ធ័នឹងការចរាចរណ៍ថ្នាំញៀនក្នុងក្រុងកំពង់ឆ្នាំង ទៅស្នងការនគរបាលខេត្តនិងតុលាការខេត្យ ដើម្បីសុំចេញ ដីកាចាប់ខ្លួនជនសង្ស័យការបញ្ជូនវត្ថុតាងនេះបានធ្វើឡើងនៅវេលាម៉ោង ៩និង១០នាទីព្រឹក ថ្ងៃទី២៨ ខែកក្កដា ឆ្នាំ២០១៤ នៅអធិការនគរបាលក្រុងកំពង់ឆ្នាំង។ 
លោក ញោក ប៊ុនធី អធិការរងនៃអធិការនគរបាលក្រុងកំពង់ឆ្នាំងបានអោយដឹងថា៖កាលពីវេលាម៉ោង១១និង៣០នាទីយប់ថ្ងៃទី២៦ ខែមិថុនា ឆ្នាំ២០១៤ កម្លាំងប៉ុស្តិរដ្ឋបាលប្អេរបានប្រទះឃើញម៉ូតូមួយគ្រឿងបានបើកមកឈប់នៅចំណុចមុខផ្ទះរបស់ ឈ្មោះ ហេង មយូរ៉ា ស្ថិតនៅក្នុងភូមិម៉ុងបារាំង សង្កាត់ប្អេរ ក្រុងកំពង់ឆ្នាំង។ដោយមានការសង្ស័យសមត្ថកិច្ចបានសុំត្រួតពិនិត្យ តែម្ចាស់ម៉ូតូជាជនសង្ស័យបានព្យាយាមបើកម៉ូតូគេចមិនអោយសមត្ថកិច្ចត្រួតពិនិត្យនោះទេ តែដោយកម្លាំងសមត្ថកិច្ចច្រើន ជនសង្ស័យក៍បានផ្តួលម៉ូតូចោលរត់ចូលទៅក្នុងផ្ទះឈ្មោះ ហេង មយូរ៉ា បាត់ទៅ។ 
លោកអធិការរងបានបន្តថា៖ក្រោយពេលឆែកឆេរនៅក្រោមកែបម៉ូតូរបស់ជនសង្ស័យ សមត្ថកិច្ចបានរកឃើញវត្ថុតាងមួយចំនួនរួមមាន៖ជញ្ជីងថ្លឹងថ្នាំញៀន ចំនួន២,ឧបករណ៍ប្រើប្រាស់ថ្នាំញៀន២ឈុត,ដបជ័រតូច១,ថង់ផ្លាស្ទីកសំរាប់ច្រកថ្នាំញៀន ១ដុំ,ទូរស័ព្ទ២គ្រឿង,ផ្លែទុល្វីស១ដើម,ផ្លែឡាម២,ម៉ូតូ១គ្រឿង,កាបូបដាក់សម្ភារៈ១,កាំបិតស្នៀត(កាំបិតត្នោត)ប្រវែង៤តឹកកន្លះចំនួន១,និងសម្ភារៈមួយចំនួនផ្សេងទៀត។
បន្ទាប់ពីរកឃើញវត្ថុតាងទាំងនេះ សមត្ថកិច្ចបានធ្វើការស្រាវជ្រាវជាង១ខែកន្លងមក និងបានកំណត់អត្តសញ្ញាណជនសង្ស័យរួចរាល់ហើយដែរ។ នៅព្រឹកថ្ងៃទី២៨ ខែកក្កដា នេះ សមត្ថកិច្ចនគរបាលក្រុងកំពង់ឆ្នាំងបានបញ្ជូនវត្ថុតាងទៅស្នងការដ្ឋាននគរបាលខេត្ត ដើម្បីសុំដីកាចាប់ខ្លួនជនសង្ស័យពីលោកព្រះរាជអាជ្ញាខេត្ត។ ប្រភពមួយពីសមត្ថកិច្ចក្រុងកំពង់ឆ្នាំងបានអោយដឹងដែរថា៖នៅក្នុងករណីនេះមានអ្នកចេញមុខរត់ការដោះស្រាយយកម៉ូតូជនសង្ស័យទៅវិញដែរ តែសមត្ថកិច្ចមិនព្រមអោយនោះទេ ព្រោះពេលនេះនគរបាលក្រុងកំពង់ឆ្នាំងបានត្រូវធ្វើទៅតាមនីតិវិធី៕
