ខេត្តកំពង់ធំ៖ ឧត្តមសេនីយ៍ទោសោម ស៊ុន ប្រធានក្រុមការងាររបស់រាជរដ្ឋាភិបាល ចុះជួយឃុំបន្ទាយស្ទោង បាននាំយកអំណោយរបស់ព្រះសង្ឃ និងសប្បុរសជន ចែកជូនបងប្អូនប្រជាពលរដ្ឋ ដែលទទួលរងគ្រោះដោយសារទឹកជំនន់ ចំនួន១០០ គ្រួសារ នៅឃុំបន្ទាយស្ទោង ស្រុកស្ទោង ខេត្តកំពង់ធំ នៅព្រឹកថ្ងៃអង្គារ៍ ទី០៣ ខែវិច្ឆិកា ឆ្នាំ២០២០។
វិស័យព្រះពុទ្ធសាសនាត្រូវបានលើកតំម្កើង និងជាសាសនារបស់រដ្ឋ ដោយពុទ្ធចក្រ និងអាណាចក្របានដើរទទឹមគ្នា ព្រះសង្ឃមានតួនារីសំខាន់បំផុតនៅក្នុងកិច្ចការងារសង្គម ប្រកាន់ខ្ជាប់គុណធម៌ល្អប្រពៃ មានភាពបរិសុទ្ធ ចិត្តមេត្តាធម៌ សុភាពរាបសា និងមានសីលធម៌រស់នៅសុក្រិតក្នុងជីវិត មិនជាប់ជំពាក់បញ្ហាទ្រព្យសម្បត្តិ ទូន្មានអប់រំពុទ្ធបរិស័ទឱ្យជឿអំពើល្អ ប្រព្រឹត្តតែអំពើដែលជាកុសល ជួយមនុស្សឱ្យចេះអាន ចេះសរសេរ រួមចំណែកដើម្បីស្វែងរកកសន្តិភាពជូនប្រទេសជាតិ ជួយដោះស្រាយទំនាស់ដោយធម៌អហិង្សា បច្ចុប្បន្នព្រះសង្ឃបានដើរតួនាទីសំខាន់ក្នុងការចូលរួមជាមួយកិច្ចការសង្គម ផ្តល់ស្បៀងអាហារនិងសម្ភារៈ ជួយដល់ជនរងគ្រោះ ជាមួយនឹងរាជរដ្ឋាភិបាល ដូចពាក្យមួយឃ្លាពោលថា ” ចេះជួយគ្នាក្នុងគ្រាក្រ ស្គាល់មនុស្សល្អក្នុងគ្រាលំបាក ” ។
ជាក់ស្តែងកងកម្លាំងអន្តរាគមន៍៥០ នាក់ ជញ្ជូនគ្រឿងឧបភោគបរិភោគ ជាការចូលរួមចំណែករបស់ព្រះសង្ឃ និងពុទ្ធបរិស័ទ ចំនួន ០៤ ខេត្ត-រាជធានី ក្នុងនោះមានខេត្តក្រចេះ ,ខេត្តកំពង់ចាម ,ខេត្តកំពង់ធំ និងរាជធានីភ្នំពេញ តាមរយៈ ឧត្តមសេនីយ៍ទោ សោម ស៊ុន មេបញ្ជាការតំបន់ប្រតិបត្តិការសឹករងកំពង់ធំ មកផ្តល់ជូនប្រជាពលរដ្ឋ ទទួលរងផលប៉ះពាល់ដោយគ្រោះទឹកជំនន់ ចំនួន ០៤ ភូមិ ( ភូមិពន្លាជ័យ,ភូមិពោធិ៍ ,ភូមិចន្លុះ និងភូមិបេង ) ស្ថិតក្នុងស្ពានដែកបាឡេ នៅភូមិបន្ទាយស្ទោង ឃុំបន្ទាយស្ទោង ស្រុកស្ទោង ខេត្តកំពង់ធំ ។
ឧត្តមសេនីយ៍ទោ សោម ស៊ុន បានពាំនាំប្រសាសន៍ ការផ្តាំផ្ញើពីសំណាក់ សម្តេចអគ្គមហាសេនាបតីតេជោ ហ៊ុន សែន នាយករដ្ឋមន្ត្រីនៃព្រះរាជាណាចក្រកម្ពុជា ដែលជានិច្ចកាលសម្តេចតែងតែគិតគូរពីសុខទុក្ខរបស់បងប្អូនប្រជាពលរដ្ឋនៅទូទាំងប្រទេស បងប្អូនដែលទទួលរងផលប៉ះពាល់ដោយសារទឹកជំនន់ ដូចជាខេត្តពោធិ៍សាត់ ,បាត់ដំបង ,ឧត្តរមានជ័យ ,ប៉ៃលិន ជាពិសេសខេត្តកំពង់ធំ មានផលប៉ះពាល់ស្រុកមួយចំនួន ក្នុងមានស្រុកស្ទោង មានឃុំទ្រា និងឃុំបន្ទាយស្ទោង មានប្រជាពលរដ្ឋរងគ្រោះ ដោយសារទឹកជំនន់ច្រើនជាងគេក្នុងទូទាំងខេត្តកំពង់ធំ ។
ប្រជាពលរដ្ឋបានទទួលអំណោយក្នុងមួយគ្រួសារ ទទួលបានអង្ករ២០ គ.ក្រ មីជាតិ០១កេស,ទឹកត្រីទឹកស៊ីអ៉ីវ០២យួរ,ប៊ីចេង០១កញ្ចប់ ,អំបិល០១កញ្ចប់,ស្ករស០១ កញ្ចប់,ប្រេងឆា០១ដប,សៀង០១ដប, ភួយ០១,កន្សែង០១,ខោអាវ០១សម្រាប់ ,ចានស្រាក់មួយឈុត ( សម្រាប់ចាស់ៗ ) និងថវិកាមួយចំនួន និងបានសំណូមពរឲ្យបងប្អូនប្រជាពលរដ្ឋទាំងអស់ត្រូវ ថែរក្សាសុខភាព អនាម័យខ្លួនប្រាណ ដូចជាពាក់ម៉ាស់ ,ប្រើទឹកសម្អាតដៃ ដោយអាល់កុល ឬចែល ដើម្បីជៀសវាងពីជម្ងឺកូវីដ-១៩ ព្រោះថាយើងអាចភ្លេចជម្ងឺកូវីដ-១៩ ប៉ុន្តែកូវីដ-១៩ វាមិនអាចភ្លេចពួកយើងឡើយ ។ 
ឧត្តមសេនីយ៍ទោ សោម ស៊ុន និងអាជ្ញាធរដែនដី ពិតជាមានសេចក្តីរំភើបឥតឧបមា ដោយទឹកចិត្តរបស់ព្រះសង្ឃ និងពុទ្ធបរិស័ទ ដែលនិមន្តមកពី០៤រាជធានីខេត្ត បានរួចចំណែកគ្នាក្នុងការជួយឧបត្ថម្ភជាគ្រឿងឧបភោគបរិភោគដល់បងប្អូន ដែលទទួលរងផលប៉ះពាល់ដោយសារទឹកជំនន់ និងសូមជូនពរ និងសូមប្រគេនពរ ដល់ព្រះសង្ឃនិងពុទ្ធបរិស័ទ ទាំងអស់ សូមជួយប្រទះនូវពុទ្ធពរទាំងឡាយ បួន ប្រការ គឺអាយុ វណ្ណៈ សុខៈ និង ពលៈកុំបីឃ្លៀងឃ្លាតឡើយ ៕ដោយ ប៊ុន រដ្ឋា
