ស្ទឹងត្រែង៖ប្រជាពលរដ្ឋជាច្រើនគ្រួសារ នៅភូមិរាជានុកូល សង្កាត់ ក្រុង ស្ទឹងត្រែងបានរងនូវផល ប៉ះពាល់យ៉ាងធ្ងន់ធ្ងរដោយមានការលិចទឹកខូចផលដំណាំនិងសត្វចិញ្ចឹមជាច្រើនម៉ឺនក្បាលពីការចាក់ដីដើម្បីអភិវឌ្ឍន៍ផ្សារទំនើបនិងសំណង់ផ្ទះល្វែងរបស់ក្រុមហ៊ុនមួយ ដោយគេដឹងថាមានភាគហ៊ុនរបស់ស្ត្រីម្នាក់ឈ្មោះតាំង សៀមហួង ដែលជាអ្នកមានទ្រព្យសម្បត្តិមួយរូបក្នុងខេត្តស្ទឹងត្រែង ។ លោកស្រេន លីគួង អាយុ៤២ឆ្នាំជាប្រជាពលរដ្ឋក្នុងភូមិរាជានុកូល និងជាអ្នកចិញ្ចឹមត្រីនិងកង្កែបបានប្រាប់ឲ្យដឹងថាគាត់ជាប្រជាពលរដ្ឋម្នាក់ ក្នុងចំណោមប្រជាពលរដ្ឋដែលរងនូវផលប៉ះពាល់ជាច្រើនគ្រួសារ ។ 
គាត់បានបាត់បង់កូនត្រីនិងកង្កែប អស់ជាច្រើនម៉ឺនក្បាលនិងដំណាំផ្សេងៗទៀត ក៏ដូចជាស្រូវរបស់ប្រជាពលរដ្ឋក្នុងភូមិជាមួយគាត់ ត្រូវបានខូចខាតដោយសារការចាក់ដីលុបលើលូនិងប្រឡាយទឹកក្នុងភូមិ បណ្តាលឲ្យស្ទះលូនិងប្រឡាយទឹក ហើយពេលភ្លៀងធ្លាក់ធ្វើឲ្យទឹកលិចប្រៀបពេញភូមិ និងផ្ទះសំបែងខូចខាតផលដំណាំរបស់អ្នកភូមិ ក៏ដូចជាការចិញ្ចឹមសត្វកង្កែបត្រីរបស់គាត់ ដែលវាជិតទទួលបានផលហើយនោះ ។
លោកស្រេន លីគួង បានបន្តថា៖រូបគាត់រួមនិងប្រជាពលរដ្ឋដែលរងនូវផលប៉ះពាល់ ជាច្រើនគ្រួសារខាងលើនេះបានជំនុំគ្នា និងស្នើរសុំទៅអជ្ញាធរភូមិ ឃុំ គឺសុំឲ្យមកជួយពិនិត្យមើលនិងជួយដោះស្រាយ តែពុំឃើញអាជ្ញាធរថ្នាក់ណាមួយមកអើតមើលនោះឡើយ។ គាត់សំណូមពរឲ្យអាជ្ញាធរមេត្តាជួយចាត់វិធានការណ៍ឲ្យបានឆាប់ផងដែរ ពីព្រោះពួកគាត់ ពិបាករស់នៅ ក្នុងជីវភាពទឹកលិចនេះខ្លាំងណាស់ ហើយក៏ត្រូវខាតបង់ប្រាក់កាសពីការលិចទឹកនេះ ក៏មិនតិចដែរ ។
ជុំវិញរឿងនេះ លោកអភិបាលក្រុងមិនបានដឹងឮអំពីបញ្ហាដែលមានក្រុមហ៊ុន ចាក់ដីអភិវឌ្ឍន៍ធ្វើឲ្យប៉ះពាល់ដល់ផ្ទះសំបែងប្រជាពលរដ្ឋខាងលើនោះឡើយ ។ លោកជួរ ជិនសុធា ប្រធានមន្ទីររៀបចំដែនដី នគររូបនីយកម្មសំណង់ និងសុរិយោដី បានបញ្ជាក់ថាខាងមន្ទីរនៅមិនទាន់ឃើញមានឯកសារឫលិខិតស្នាមពីខាងក្រុមហ៊ុនចូលមកស្នើរសុំនោះនៅឡើយទេ ។ អ្នកស្រីតាំង សៀមហួង ជាអ្នកមានភាគហ៊ុន នៅក្នុងការអភិវឌ្ឍន៍ផ្សារទំនើប និងសំ ណង់ផ្ទះល្វែងនៅលើដីទំហ៊ំជាង៤ហិកតាខាងលើនេះ បាននិយាយថាប្រជាពលរដ្ឋ ដែល រងនូវផលប៉ះពាល់នោះ គឺមានតែ២គ្រួសារតែប៉ុណ្ណោះទេ ហើយអ្វីដែលប្រជាពលរដ្ឋចោទ ថាខូចផលដំណាំនិងអាងចិញ្ចឹមត្រីក៏តិចតួចដែរ ហើយអ្នកស្រីនឹងសង បើសិនជាមានការ ទាមទារពីប្រជាពលរដ្ឋ អ្នកស្រីមិនចង់អភិវឌ្ឍន៍ ដែលមានការប៉ះពាល់ដល់ប្រជាពលរដ្ឋនោះទេ ។
ឆ្លើយតបនឹងបញ្ហានេះអ្នកស្រីតាំង សៀមហួង បាននិយាយថា អ្នកស្រីកំពុងរៀបចំឯកសារទៅស្ថាប័នពាក់ព័ន្ធក្នុងខេត្ត ដើម្បីដាក់សុំបង្កើតច្បាប់ ។ មូលហេតុយឺតយ៉ាវដោយសារអ្នកស្រីឲ្យខាងជំនាញគូរប្លង់មិនទាន់រួច ។ ឯចំពោះការលិចទឹកនេះ អ្នកស្រីក៏កំពុងឲ្យ ខាងគ្រឿងចក្រ របស់គាត់ទៅជីកកកាយ ឲ្យមានប្រព័ន្ធទឹកឡើងវិញ។ បញ្ហាចំរូងចំរ៉ាស់រវាងប្រជាពលរដ្ឋនិងក្រុមហ៊ុនអភិវឌ្ឍន៍ផ្សារទំនើបនិងសំណង់ផ្ទះល្វែងក្នុងភូមិរាជានុកូលខាងលើនេះ ប្រជាពលរដ្ឋដែលរងនូវផលប៉ះពាល់ កំពុងរង់ចាំ ចាំមើលថា តើអាជ្ញាធរនឹងមានវិធានការណ៍យ៉ាងណា ?ក្នុងការដោះស្រាយ និងសំរួលជូន ប្រជាពលរដ្ឋ នៅក្នុងភូមិនេះ ឲ្យបានស្រួលបួលឡើងវិញ៕
