កំពង់ស្ពឺ ៖ មុខសញ្ញាជួញដូរ និងប្រើប្រាស់គ្រឿងចំនួន២នាក់ ជាគូរសង្សានឹងគ្នា ត្រូវបានសម្ថកិច្ចឆ្មក់ចាប់បាន កាលពីវេលាម៉ោង២១ និង៤០នាទីយប់ ថ្ងៃទី២៦ ខែកក្តដា ឆ្នាំ២០១៤ ស្ថិតក្នុងបន្ទប់លេខ៣ នៃផ្ទះសំណាក់មូលមិត្ត ផ្សារត្រពាំងអំពិល ឃុំត្រពាំងគង ស្រុកសំរោងទង ខេត្តកំពង់ស្ពឺ ។
ជនជាប់សង្ស័យជួញដូរ និងប្រើប្រាស់គ្រឿងញៀន ដែលត្រូវសមត្ថកិច្ចចុះបង្ក្រាបបាននោះ ត្រូវបានមន្ត្រីកងរាជអាវុធហត្ថ ស្រុកសំរោងទង ប្រាប់ឱ្យដឹងថា ទី១ ឈ្មោះពេជ្រ កក្តដា ភេទ ប្រុស អាយុ ២៦ ឆ្នាំ មានទីលំនៅភូមិព្រៃផ្តៅ ឃុំត្រពាំងគង និងស្ត្រីជាសង្សាមានឈ្មោះកែវ ចិត្រា អាយុ ២៨ ឆ្នាំរស់នៅភូមិអូរក្រាំងអំបិល ឃុំត្រពាំងគង ។ សមត្ថកិច្ចបានបន្តថា ក្នុងប្រតិបត្តិការនោះ កំលាំងអាវុធហត្ថដកហូតបានថ្នាំញៀនប្រភេទម៉ាទឹកកក ចំនួន២កញ្ចប់តូច និងសម្ភារៈសម្រាប់សេពគ្រឿងសារធាតុញៀនមួយឈុតផងដែរ ។
សមត្ថកិច្ចប៉េអឹម ស្រុកសំរោងទង បាននិយាយថា មុនពេលកើតហេតុ មានបុរស និងស្ត្រី ២នាក់ ជាគូរសង្សានឹងគ្នា បានជិះម៉ូតូឌុបមួយគ្រឿង មិនស្គាល់ស្លាកលេខ បានមកជួលស្នាក់នៅក្នុងបន្ទប់លេខ៣ ផ្ទះសំណាក់មូលមិត្ត ក្នុងផ្សារត្រពាំងអំបិល ឃុំត្រពាំងគង ដោយភាពមិនស្រក្រតីទើមកំលាំងភ្នាក់ងារសម្ងាត់បានរាយការណ៍សកម្មភាពនេះ ។ បន្ទាប់ពីទទួលព័ត៌មាននេះភ្លាម កំលាំងអាវុធហត្ថស្រុក បានឆ្មក់ចូលធ្វើការឆែកឆេ ក្នុងបន្ទប់លេខ៣នោះ ស្រាប់តែប្រទះឃើញពួកគេកំពុងតែសេពគ្រឿងញៀន ក៍ឃាត់ខ្លួនតែម្តង ។
សមត្ថកិច្ចបានបញ្ជាក់ថា ក្នុងផ្ទះសំណាក់មូលមិត្តនេះ តែងសង្កេតឃើញមានក្រុមក្មេងស្ទាវចូលស្នាក់ទាំងយប់ថ្ងៃ ដើម្បីលេងល្បែងស្នេហា និងសំងំសេពគ្រឿងញៀន ហើយកន្លងមកផ្ទះសំណាក់មួយនេះ សមត្ថកិច្ចធ្នាប់បង្ក្រាបការជួញដូរ និងប្រើប្រាស់គ្រឿងញៀនជាច្រើនលើ ប៉ុន្តែអាជ្ញាធរហាក់គ្មានវិធានការក្តៅ ដើម្បីទប់ស្កាត់ទាល់តែសោះ គឺនៅតែកើតមានដដែល ។ បច្ចុប្បន្នជនជាប់សង្ស័យទាំង២នាក់ ត្រូវបានកងរាជអាវុធហត្ថ ស្រុកសំរោងរៀបចំក៍សាងសំណុំរឿងឱ្យបានគ្រប់គ្រាន់បញ្ជូនទៅកាន់សាលាដំបូង ខេត្តកំពង់ស្ពឺចាត់ការតាមផ្លូវច្បាប់ ៕
