ក្រុងទ្រីប៉ូលីៈ ការប្រយុទ្ធគ្នារវាងកងជីវពល និងកងកម្លាំងរដ្ឋាភិបាលលីប៊ីបានកាន់តែកើនឡើងតាំងពីពាក់កណ្តាលខែកក្កដាហើយមានសភាពកាន់តែសាហាវមកដល់ថ្ងៃអាទិត្យ នៅក្រុងនេះ ដើម្បីដណ្តើមកាន់កាប់ព្រលានយន្តហោះអន្តរជាតិទ្រីប៉ូលី បណ្តាលឲ្យមានផ្សែងហុយរាល់ថ្ងៃ។ ការណ៍នេះបានបង្ខំឲ្យអាមេរិកប្រកាសអាសន្នហើយអន្តរាគមន៍គាំទ្រពីអាកាសផងដើម្បីជម្លៀសបុគ្គលិកទូតចេញពីក្រុងនេះ ខណៈយន្តហោះប្រយុទ្ធ៩០ភាគរយត្រូវបានបំផ្លាញនៅទ្រីប៉ូលី។ 
តាមប្រភពពីវេបសាយបរទេសនានាបានឲ្យដឹងថា កងជីវពលបានវាយជាមួយកម្លាំងរដ្ឋាភិបាលដើម្បីដណ្តើមកាន់កាប់ព្រលានយន្តហោះអន្តរជាតិទ្រីប៉ូលីតាំងពីថ្ងៃ១៤ កក្កដា មក ដោយរិញទៅរុញមក ហើយការវាយឆ្មក់នានាបានបណ្តាលឲ្យយន្តហោះប្រយុទ្ធប្រមាណ ៩០ភាគរយត្រូវបានបំផ្លាញ ក្នុងនោះក៏មានយន្តហោះធំៗដឹកអ្នកដំណើរមួយចំនួនផងដែរ។
ឧបទ្ទវហេតុនេះបាមជំរុញឲ្យអាមេរិកដែលមានស្ថានទូតរបស់ខ្លួននៅក្បែរព្រលានយន្តហោះ នេះបង្ខំចិត្តធ្វើការជម្លៀសបុគ្គលិកទូតចេញជាបន្ទាន់ ដែលប្រតិបត្តិការអន្តរាគមន៍នេះ មានការគាំទ្រការពារពីទ័ពអាកាសថែមទៀតផង។ បើតាម លោក ចន ឃើរី រដ្ឋមន្ត្រីការបរទេសអាមេរិក បាននិយាយថា អាមេរិកបានជម្លៀសបុគ្គលិកស្ថានទូតនៅលីប៊ីកាលពីថ្ងៃសៅរ៍ ដោយសារតែពួកគេបានប្រឈមនឹងគ្រោះថ្នាក់ នៃការប្រយុទ្ធគ្នាដ៏សាហាវនៅជុំវិញព្រលានយន្តហោះក្រុងទ្រីប៉ូលី។ 
ការប្រកាសនេះ បានកើតឡើងប៉ុន្មានម៉ោងក្រោយពីរដ្ឋាភិបាលបណ្តោះអាសន្ន នៃប្រទេសនេះបានព្រមានថា ការប៉ះទង្គិចគ្នា រវាងកងជីវពលដែលកំពុងដណ្តើមការគ្រប់គ្រងព្រលានយន្តហោះជាយុទ្ធសាស្ត្រនោះ កំពុងគំរាមកំហែងលីប៊ីទាំងមូល៕ 
