ក្រុមហាម៉ាសបានព្រមអោយមានបទឈប់បាញ់ថ្មីរយៈពេល២៤ម៉ោង ចាប់ពី ម៉ោង២រសៀល ដល់ម៉ោង១៤ថ្ងៃទី២៨ខែកក្កដាណ ក្រុមហាម៉ាសទើបតែបដិសេធមិនពន្យារពេល បទឈប់បាញ់ ជាមួយកងទ័ពអ៊ីស្រាអែលប៉ុណ្ណោះ។ ការបាញ់រ៉ុកកែតរបស់ ក្រុមហាម៉ាស បានធ្វើអោយ
អ៊ីស្រាអែលបន្តប្រតិបត្តិការយោធា នៅតំបន់ហ្កាហ្សា នៅព្រឹកថ្ងៃអាទិត្យនេះ។ ជិត៣សប្តាហ៍មកនេះ តួលេខជនរងគ្រោះក្នុងការប្រយុទ្ធរវាងទ័ពអ៊ីស្រាអែល និងក្រុមហាម៉ាស បានឡើងដល់១ ០៥០នាក់ហើយ ភាគច្រើនជាជនស៊ីវិលប៉ាឡេស្ទីន។ បទឈប់បាញ់មនុស្សធម៌ ដាក់ចេញនៅហ្កាហ្សា តាំងពីម៉ោង៨ ព្រឹកថ្ងៃសៅរ៍ម្សិលមិញ មានពេលមិនដល់២៦ម៉ោងទេ។ ដំបូងឡើយ អ៊ីស្រាអែលព្រមពន្យារពេលបទឈប់បាញ់ទៀត តែក្រុមហាម៉ាសទាត់ចោល ព្រោះថា យោធាអ៊ីស្រាអែលមិនបានដកថយចេញពីតំបន់ហ្កាហ្សាទេ។
ក្រុមហាម៉ាសដាក់លក្ខខណ្ឌដាច់ខាត ថាព្រមឈប់ប្រយុទ្ធប្រឆាំងអ៊ីស្រាអែល លុះត្រាតែអ៊ីស្រាអែលឈប់បិទខ្ទប់តំបន់ហ្កាហ្សាទៀត។ ប៉ុន្តែ ថ្ងៃអាទិត្យនេះ ក្រោយយោធាអ៊ីស្រាអែលបន្តប្រតិបត្តិការ នៅហ្កាហ្សា បានបន្តិច ក្រុមហាម៉ាសបានប្តូរចិត្តវិញ ដោយព្រមអោយមានបទឈប់បាញ់ថ្មីមួយទៀត មានរយៈពេល២៤ម៉ោង គិតចាប់ពីម៉ោង២រសៀលក្នុងស្រុកថ្ងៃអាទិត្យនេះទៅ។ ក្រុមហាម៉ាសប្រាប់ថា ព្រមដូច្នេះ ដោយសារចង់អោយប្រជាជនប៉ាឡេស្ទីនបានបិទបញ្ចប់បុណ្យសាសនារ៉ាម៉ាដង់។
ល្បែងនៃបទឈប់បាញ់រវាងក្រុមហាម៉ាស និងយោធាអ៊ីស្រាអែល សបង្ហាញពីបរាជ័យរបស់សហគមន៍អន្តរជាតិ ក្នុងការរកដំណោះស្រាយជម្លោះអ៊ីស្រាអែល-ប៉ាឡេស្ទីន។ ម្សិលមិញ ក្នុងកិច្ចប្រជុំអន្តរជាតិនៅក្រុងប៉ារីស ក្រោមវត្តមានប្រមុខការទូតអាមេរិកឃែររី ប្រមុខការទូតកាតា និងប្រមុខការទូតអឺរ៉ុបច្រើនប្រទេសនោះ ភាគីប្រជុំទាំងអស់រកមិនបានដំណោះស្រាយអ្វីជាក់ស្តែងទេ បានត្រឹមតែអំពាវនាវអោយពន្យារពេលបទឈប់បាញ់ប៉ុណ្ណោះ។ ដោយឡែក ម្សិលមិញ ក្រុមហាម៉ាសបានប្រកាសថា ខ្លួនស្វាគមន៍អោយមានអន្តរាគមន៍ពីសំណាក់ប្រទេសក្នុងតំបន់ រឺក៏អន្តរាគមន៍អន្តរជាតិ ដើម្បីទប់ស្កាត់ការឈ្លានពានរបស់អ៊ីស្រាអែលលើប៉ាឡេស្ទីន និងដើម្បីរុញអោយអ៊ីស្រាអែលឈប់បិទខ្ទប់តំបន់ហ្កាហ្សាទៀត៕
