សៀមរាប : កម្លាំងកងរាជអាវុធហត្ថ ខេត្តសៀមរាប បានបង្ក្រាបករណីរក្សាទុក ជួញដូរដោយខុសច្បាប់ នូវសារធាតុញៀន និងឃាត់ខ្លួនជនសង្ស័យភេទប្រុស បានចំនួន ៦នាក់ កាលពី យប់ម៉ោង២១ ថ្ងៃទី៣០ ខែកក្កដា ឆ្នាំ២០១៤ កន្លងទៅនៅ ឃុំក្រឡាញ់ ស្រុកក្រឡាញ់
ខេត្តសៀមរាប ។ យោងតាមបទបញ្ជា របស់ លោកឧត្តមសេនីយ៍ត្រី ម៉ន សាម៉ុន មេបញ្ជាការកងរាជអាវុធហត្ថខេត្តសៀមរាប កម្លាំងការិយាល័យស្រាវជ្រាវ ប្រឆាំងគ្រឿងញៀន នៃមន្ទីស្រាវជ្រាវ និងយុត្តិធម៌ ជាមួយកម្លាំង អាវុធហត្ថ មូលដ្ឋានស្រុកក្រឡាញ់ ដែលមានលោកវរសេនីយ៍ឯក ស្រី យូរ៉ា មេបញ្ជាការរង និងជាប្រធានមន្ទីរស្រាវជ្រាវ និងយុត្តិធម៌ នៃទីបញ្ជាការដ្ឋានកងរាជអាវុធហត្ថខេត្តសៀមរាប បានដឹកនាំបញ្ជាផ្ទាល់ ចុះបង្ក្រាបករណីរក្សាទុកដឹកជញ្ជូន ជួញដូរ ដោយខុសច្បាប់នូវ សារធាតុញៀន បាន ១ ករណីខាងលើ ។
ក្នុងនោះសមត្ថកិច្ច បានដកហូតនូវសារធាតុញៀន សម្ភារ និងវត្ថុតាង ដែលមាន ម្សៅគ្រឿមពណ៌សថ្លា (ម៉ាទឹកកក) ៣កញ្ចប់តូច និង ២កញ្ចប់ធំ ស្មើនឹង ៦,២៩ក្រាម និង យ៉ាម៉ា ចំនួន ៣០០គ្រាប់ ។ រថយន្ដកាម៉ារី ឆ្នាំ៩១ មួយគ្រឿង ម៉ូតូ ២គ្រឿង ទូរស័ព្ទដៃ ៥គ្រឿង ព្រមទាំងឧបករណ៍វេចខ្ចប់ និងឧបករណ៍ជក់គ្រឿងញៀនមួយចំនួនទៀត ។ បច្ចុប្បន្នជនសង្ស័យនិងវត្ថុតាងត្រូវបានកងរាជអាវុធហត្ថ ខេត្តសៀមរាប កសាងសំណុំរឿង បញ្ជូន ទៅកាន់សាលាដំបូងខេត្តសៀមរាបហើយកាលពីថ្ងៃទី ៣១ ខែ កក្តដា ឆ្នាំ២០១៤ នេះដើម្បីចំណាត់ការទៅតាមនិតិវិធីជាបន្ត ៕
