(អង្គស្នួល) ៖ គេសង្កេតឃើញថា នៅតាមបណ្ដោយផ្លូវជាតិលេខ៤ ក្រុមហ៊ុន អេហ្សិត ដែលជាក្រុមហ៊ុនជួសជុលថែទាំផ្លូវជាតិលេខ៤ បានកាយប្រឡាយអមសងខាងផ្លូវដើម្បីរំដោះទឹកលើតួផ្លូវ និងចេញពីតំបន់នានាៗនៅជាប់នឹងផ្លូវ ដើម្បីបញ្ជៀសនូវការលិចលង់ដែលធ្វើឲ្យប៉ះពាល់ 
និងខូចខាតដល់ដំណាំស្រូវ និងដំណាំផ្សេងៗ ក៏ដូចជាលំនៅដ្ឋានរបស់ប្រជាពលរដ្ឋដែលរស់នៅតាមបណ្ដោយផ្លូវជាតិលេខ៤ផងដែរ។ ថ្មីៗនេះ អាជ្ញាធរស្រុកអង្គស្នួលបានទទួលពត៌មានពីបងប្អូនប្រជាពលរដ្ឋថា មានការបង្ហូរនូវកាកសំណល់កង្វក់ពីក្នុងរោងចក្រចូលក្នុងប្រលាយទឹក ដែលធ្វើឲ្យប៉ះពាល់ដល់ដំណាំស្រូវរបស់ពួកគាត់ និងបង្កឲ្យមានក្លិនមិនល្អធ្វើឲ្យប៉ះពាល់ដល់បរិស្ថាន និងសុខភាព។ 
បន្ទាប់ពីទទួលបានពត៌មានភ្លាមអាជ្ញាធរស្រុកអង្គស្នួលបានធ្វើការចុះពិនិត្យមើលទីតាំងដែលមានបញ្ហានោះ និងធ្វើការសិក្សាស្រាវជ្រាវ ទើបដឹងថាបញ្ហានោះ គឺបណ្ដាលមកពីការបង្ហូរកាកសំណល់រាវកង្វក់ចេញពីរោងចក្រឈ្មោះ ដាយថៃ ដែលមានទីតាំងនៅក្បែរនោះ។ជាដំណោះស្រាយបន្ទាន់គឺអាជ្ញាធរស្រុកអង្គស្នួល ដែលមានឃុំចំនួន៣ មានផលប៉ះពាល់ រួមមានឃុំពើក ឃុំលំហាច និងឃុំព្រៃព្រួចបានសហការស្នើសុំឲ្យក្រុមហ៊ុន អេហ្សិត ជួយកាយបើកមុខទឹកប្រឡាយនៅឃុំពើក ចំណុចគីឡូម៉ែត្រលេខ ២៦, ២៧ ឲ្យទឹកបានហូរចេញពីឃុំទាំងនេះ។ ហើយក្រុមហ៊ុន អេហ្សិត ក៏បានធ្វើការកាយកាកសំណល់ស្អុយទាំងនោះចេញភ្លាមៗដើម្បីទប់ស្កាត់នូវផលប៉ះពាល់ដល់ដំណាំស្រូវ និងសុខភាពប្រជាពលរដ្ឋឲ្យបានទាន់ពេល។ 
លោក សមុទ្រ ធឿនតំណាងអាជ្ញាធរស្រុកអង្គស្នួល បានលើកឡើងថា អាជ្ញាធរស្រុកបានជួបប្រជុំជាមួយតំណាងរោងចក្រដែលមានទីតាំងនៅតំបន់នោះ ដើម្បីធ្វើការណែនាំ និងរកវិធានការទប់ស្កាត់កុំឲ្យមានបញ្ហានេះកើតឡើងតទៅទៀត។លោកក៏បានបញ្ជាក់ផងដែរថា កន្លងមកអាជ្ញាធរដែនដីបានធ្វើការណែនាំ និងដាក់លក្ខខណ្ឌចំនួន០៧ចំនុចដល់រោងចក្រដាយថៃនេះ ដើម្បីកែលំអរបរិស្ថាននៅតំបន់នោះឲ្យមានភាពប្រសើរឡើងវិញ ហើយលក្ខណះទាំងនោះរួមមាន ទី១រៀបចំឃ្លាំងដាក់សម្ភារៈដែលមានសារធាតុគីមីឲ្យមានរបៀបរៀបរយនិងស្របតាមបទដ្ឋានបច្ចេកទេសបរិស្ថានទី២ រកវិធីសាស្ត្រដើម្បីកាត់បន្ថយសំលេងម៉ាស៊ីន ដើម្បីការពារដល់ក្រដាស់ត្រចៀកកម្មករ ទី៣ 
ក្រុមហ៊ុនត្រូវស្ដារអាងប្រព្រឹត្តិកម្មសំណល់រាវដែលមានស្រាប់ ទី៤ ស្ដារ និងរៀបចំអាងស្តុកទឹក និងប្រព័ន្ធបង្ហូរកាកសំណល់រាវឲ្យបានត្រឹមត្រូវតាមលក្ខណៈបច្ចេកទេស ទី៥ រៀបចំជីកអាងប្រព្រឹត្តិកម្មបន្ថែមទំហំ (៣ម៉ែត្រ x ៣ម៉ែត្រ x ២) ដែលចេញពីឡចំហាយ ទី៦ ក្រុមហ៊ុនសន្យាមិនបង្ហូរប្រេងម៉ាស៊ីន និងសំណល់រាវមានសារធាតុគីមីទៅប្រឡាយរំដោះទឹកភ្លៀងរបស់ភូមិ ដោយមិនឆ្លងកាត់អាងប្រព្រឹត្តិកម្មទេ ទី៧ ក្រុមហ៊ុនឯកភាពស្ដារប្រឡាយរំដោះទឹកភ្លៀងនេះ ឲ្យមានលំហូរទឹកហូរចូលក្នុងប្រឡាយរបស់ក្រុមហ៊ុន អេហ្សិត អ៊ិនវេសមេន។
ប្រជាពលរដ្ឋដែលរស់នៅតាមបណ្ដោយផ្លូវជាតិលេខ៤ ទាំងអស់ក៏សូមសំណូមពរដល់គ្រប់បណ្ដារោងចក្រ និងសហគ្រាសទាំងអស់ មេត្តាបញ្ឈប់ការបង្ហូរកាក់សំណល់ស្អុយចូលទៅក្នុងប្រលាយទឹក ដែលអាចធ្វើឲ្យប៉ះពាល់ដល់ដំណាំស្រូវ បរិស្ថាន និងសុខភាពរបស់ពួកគាត់៕
