កំពង់ចាម: លំនៅឋាន១ខ្នង រួមជាមួយនឹងទ្រព្យសម្បត្តិក្នុងផ្ទះ ត្រូវបានអគ្គីភ័យលេបត្របាក់អស់ទាំងស្រុង ខណៈម្ចាស់ផ្ទះរៀបចំសែនកុងម៉ាក្នុងឱកាសចូលឆ្នាំចិនថ្ងៃទី១ ហើយបិទទ្វារទៅលេងផ្ទះដន្លងនៅភូមិផ្សេង ដោយមិនបានពន្លត់ភ្លើងទៀន។ ហេតុការណ៍នេះបានកេីតមានឡើងកាលពីវេលាម៉ោង២និង៣០នាទី រសៀលថ្ងៃទី១១ ខែកុម្ភះ ឆ្នាំ២០២០ ស្ថិតនៅក្នុងភូមិសារ៉ាយ ឃុំបុសខ្នុរ ស្រុកចំការលើ ខេត្តកំពង់ចាម ។
ក្រោយពីទទួលបានពត៌មាន លោកឧត្តមសេនីយ៍ទោ ឯម កុសល ស្នងការនគរបាលខេត្តកំពង់ចាម បានបញ្ជាអោយកម្លាំងជំនាញអធិការដ្ឋាននគរបាលស្រុក ដឹកនាំដោយលោកវរសេនីយ៍ឯក ប៉ែន ទៀងចំរើន អធិការនគរបាលស្រុក និងចេញរថយន្ដពន្លត់អគ្គីភ័យ០១គ្រឿង របស់អធិការដ្ឋាននគរបាលស្រុកចំការលើ ចុះទៅអន្ដរាគមន៍ជួយពន្លត់ភ្លាមៗ ដោយមិនមានគ្រោះថ្នាក់ដល់ប្រជាពលរដ្ឋឡេីយ ។
សមត្ថកិច្ចបានឲ្យដឹងថា ម្ចាស់ផ្ទះដែលរងគ្រោះដោយអគ្គីភ័យនេះមានឈ្មោះ សួង រដ្ឋា ភេទប្រុស អាយុ៥៥ឆ្នាំ ជាតិខ្មែរ រស់នៅក្នុងភូមិកេីតហេតុខាងលើ ។ ដែលបណ្ដាលឲ្យផ្ទះទំហំ ៦ម៉ត្រ × ៨ម៉ែត្រ សង់អំពីឈើ ប្រក់ក្បឿង ជញ្ជាំក្ដា ថ្មក្រោម ឆេះអស់ទាំងស្រុង ។ រួមនឹងទ្រព្យសម្បត្តិមានដួចជា ទូរទស្សន៍០២គ្រឿង ស្រូវ១០បេ ប្រាក់៣០០ដុល្លា ខ្សែរកមាស៥ជី កង់ដៃ២១ធ្វើពីផ្លាកទីន និងសម្ភារៈប្រើប្រាស់មួយចំនួនទៀត។
សមត្ថកិច្ចបានបញ្ជាក់ថា ចំពោះមូលហេតុ: ម្ចាស់ផ្ទះសែនរួចបិតទ្វារទៅលេងផ្ទះដន្លង នៅភូមិថ្លុកក្រវ៉ាន់ ឃុំបុសខ្នុរ ដោយមិនបានពន្លត់ភ្លើងទៀននៅលើហ៊ឹងកុងម៉ា ។
គួរបញ្ជាក់ថា ក្នុងកិច្ចប្រតិបត្តិការណ៍នោះ លោកឧត្តមសេនីយ៍ស្នងការ ក៏បានបញ្ជាអោយរថយន្ដពន្លត់អគ្គីភ័យរបស់ស្នងការដ្ឋាននគរបាលខេត្ត ចំនួន០២គ្រឿង និងរថយន្ដរបស់អធិការដ្ឋាននគរបាលស្រុកកំពង់សៀម ០១គ្រឿង ចុះជួយអន្ដរាគមន៍ ដោយប្រើប្រាស់ទឹកអស់០៤រថយន្ដ ក្នុងការជួយអន្តរាគមន៍ពន្លត់ មិនបណ្ដាលឲ្យឆាបឆេះទៅផ្ទះប្រជាពលរដ្ឋផ្សេងទៀតឡើយ ៕
