បន្ទាយមានជ័យ៖ នារីវ័យក្មេងម្នាក់ បានត្រូវឃាតក អារ ក បណ្តាល ឱ្យស្លាប់ ក្នុងថ្លុកឈាម នៅក្នុងបន្ទប់ នៃផ្ទះជួលមួយ ម្តុំគ្លីនិកនគររាជ្យ ស្ថិតក្នុងភូមិក្បាលស្ពាន១ សង្កាត់ប៉ោយ ប៉ែត ក្រុងប៉ោយប៉ែត កាលពីវេលាយប់ ថ្ងៃទី២ ខែមីនា ឆ្នាំ២០២១ ។
អាជ្ញាធរមានសមត្ថកិច្ចពាក់ព័ន្ធ បានឱ្យដឹងនៅព្រឹក ថ្ងៃទី៣ ខែមីនា ឆ្នាំ២០២១នេះថាៈ នារីរងគ្រោះ ឈ្មោះ ហួន
ស្រី អាយុ ២២ ឆ្នាំ ជាបុគ្គលិក បម្រើការងារ ក្នុងកាស៊ីណូ ពូលី ម្តុំនាគទិព្វ២ ផ្នែក Slot Super Machine (កាស៊ីណូក្រៅប្លុក កាស៊ីណូចាស់ ដែលជនជាតិខ្មែរ អាចចូលលេងបាន ឬហៅក្រុមកាស៊ីណូខ្មែរ) ។
ប្រភពនោះ បានបង្ហើបឱ្យដឹងថាៈ រឿងនេះ ត្រូវបានគេព្យាយាមបិទ ប៉ុន្តែទោះបីជាយ៉ាងណា វាក៏បានបែកធ្លាយបាន ពោលគឺការស្លាប់របស់នាង ស្រីស្រស់ រូបស្អាតក្មេងខ្ចីនោះ បានត្រូវគេដាក់ការសង្ស័យថា អាចនឹងកើតឡើង តាំងពីព្រឹកមកម្ល៉េះ ប៉ុន្តែដល់ពេលល្ងាចហើយ ទើបដឹង គឺនៅពេលមានមនុស្ស ទៅគោះទ្វារ រកនាងដល់បន្ទប់ជួលនោះ។
ប្រភពមួយទៀត បានអះអាងថាៈ មុនពេលមានការភ្ញាក់ផ្អើល នូវហេតុការណ៍នេះ ពាលគឺ នៅវេលាម៉ោង ៨ យប់ ថ្ងៃទី២ ខែមីនា ឈ្មោះ ប៉ាត ស្រីល័ក្ខ អាយុ ២៩ ឆ្នាំ ភេទស្រី ត្រូវជាមិត្តរួមការងារជាមួយនារីរងគ្រោះ បានវិលត្រឡប់ មកពីធ្វើការវិញ ហើយបានទៅរកនារីរងគ្រោះ ដល់បន្ទប់។ លុះមកដល់បន្ទប់ ឈ្មោះ ប៉ាត ស្រីល័ក្ខ បានឃើញបិទទ្វារចាក់សោរ ខ្ទាស់ជាប់ ទោះបីគោះទ្វារយ៉ាងណា ក៏មិនឮ ទើបឈ្មោះ ប៉ាត ស្រីល័ក្ខ យកកូនសោរ ពីម្ចាស់ផ្ទះជួល ចាក់ទ្វារ ក៏ស្រាប់តែឃើញ ឈ្មោះ ហួន ស្រី ដេកស្លាប់លើគ្រែពូក ដោយមានឈាម ជាប់នឹងដងខ្លួននិង ក ផង ។
ប្រភពពីអ្នកជិតស្និទ្ធ ជាមួយនារីរងគ្រោះ បានបញ្ជាក់ឱ្យដឹងថា៖នារីរងគ្រោះ ធ្លាប់មានទំនាក់ទំនង ស្នេហាស៊ីជម្រៅ ជាមួយបុរសជនជាតិចិនម្នាក់ ហើយនៅពេលមានករណីឃាតកម្ម លើនារីរងគ្រោះ បុរសជនជាតិចិនម្នាក់នោះ ក៏បានបាត់ខ្លួនដែរ។
សមត្ថកិច្ចនគរបាល កងរាជអាវុធហត្ថ និងមន្ត្រីអាជ្ញាធរដែនដី បានកំពុងតែដុតដៃដុតជើង អង្កេតស្រាវជ្រាវ ដើម្បីបំបែករឿងក្តី ឃាតកម្មនេះហើយ ៕ដោយ៖ ឃិន គន្ធា
