ស្ទឹងត្រែង៖នៅព្រឹកថ្ងៃទី០២សីហានេះនេះទឹកទន្លេមេគង្គបានហក់ឡើងដល់១១ម៉ែត្រ២៥លើសកំរិតកំពស់ប្រកាសអាសន្ន គឺត្រឹមតែ១០;៧០តែប៉ុណ្ណោះ។ធ្វើឱ្យប្រជាពលរដ្ឋក្នុងក្រុងស្ទឹងត្រែង ក៏ដូចជានៅតាមបណ្តាស្រុងចំនួនបួនទៀត នៅប្រកដងទន្លេ រងផលប៉ះពាល់
យ៉ាងធ្ងន់ធ្ងរ។ ចាប់ពីដើមខែកក្កដារហូតមកដល់ដើមខែសីហានេះ គេសង្កេតឃើញថាមានភ្លៀងធ្លាក់យ៉ាងច្រើន គ្មានលោះថ្ងៃឡើយ ធ្វើឱ្យទឹកទន្លេទាំងបួនហក់ឡើងជាបន្តបន្ទាប់ គឺទន្លេសេកុង សេសាន ស្រែពក ជាពិសេសទន្លេមេគង្គនៅតែបន្តឡើង ធ្វើឱ្យអាជីវករលក់ដូរក្នុងផ្សារខេត្តស្ទឹងត្រែងមានការព្រួយបារម្ភយ៉ាងខ្លាំង ក្នុងការដឹកជញ្ជូនអីវ៉ាន់ចេញ ព្រោះបើតាមស្ថានភាពទឹក មិនយូរទេអាចលិចផ្សារ នៅ២-៣ថ្ងៃខាងមុខនេះ ដោយសារផ្លូវជាច្រើនខ្សែក្នុងក្រុង រួមនិងផ្ទះសម្បែងប្រជាពលរដ្ឋ បានលិចលុងជាបណ្តើរៗហើយសូម្បីតែធ្វើដំណើរចេញពីផ្ទះក៏ត្រូវជិះទូកដែរ។ 
លោកប៊ុន ណារី អភិបាលក្រុងស្ទឹងត្រែងបានឱ្យដឹងនៅថ្ងៃទី០២សីហានេះថា ដោយសារមានភ្លៀងធ្លាក់ច្រើនធ្វើឱ្យទឹកទន្លេទាំងបួននៅតែបន្តឡើង ធ្វើឱ្យផ្ទះសម្បែងប្រពលរដ្ឋក្នុងក្រុងស្ទឹងត្រែង និងទីផ្សារប្រឈមនិងការលិចលុងរងផលប៉ះពាល់យ៉ាងធ្ងន់ធ្ងរ ធ្វើឱ្យប្រជាពលរដ្ឋមួយចំនួន ត្រូវជលៀសទៅកាន់ទីទួលសុវត្ថិភាព។ចំណែកផ្លូវថ្នល់ ស្ពានលូក្នុងក្រុងថ្ងៃម្សិលមិញ មិនទាន់លិចនៅឡើយ។ដោយឡែកព្រឹកនេះថ្នល់ជាច្រើនខ្សែត្រូវបានលិច រួមទាំងស្រូវស្រែចំការ ដំណាំរួមផ្សំរបស់ពួកគាត់ ក៏ត្រូវរងការលិចលុងជាច្រើន ហិចតាផងដែរ។ 
លោកអភិបាលក្រុងស្ទឹងត្រែងបានបន្តឲ្យដឹងទៀតថាអាជ្ញាធរខេត្ត ក៍ដូចជាអាជ្ញាធរក្រុងនៅព្រឹកថ្ងៃទី០១ខែសីហាម្សិលមិញនេះ លោកបានយកអំណោយទៅចែកជូន ប្រជាពលរដ្ឋដែលរងគ្រោះទឹកជំនន់ ចំនួន១៥គ្រួសារក្នុងសង្កាត់សាមគ្គី ក្រុងសឹ្ទងត្រែង។ លោកក៏បានធ្វើការណែនាំដល់បងប្អូន ប្រជាពលរដ្ឋឱ្យលើកកំពស់ការប្រុងប្រយត្ន័ ចំពោះទឹកជំនន់ដែលប្រឈម និងការលិចលុងផ្ទះសម្បែង របស់បងប្អូន។
ដោយឡែកបើតាមការឲ្យដឹងពីអាជ្ញាធរគ្រប់គ្រងគ្រោះមហន្តរាយខេត្តបានបញ្ជាក់ថា មិនថាតែក្នុងក្រុងទេ សូម្បីស្រុកនៅជាប់ដងទន្លេក៏រងការលិចលុង ដូចជាស្រុកសៀមប៉ាង ស្រុកសេសាន ស្រុកថាបរិវ៉ាត់ ស្រុកសៀមបូក ធ្វើឱ្យផ្ទះប្រជាពលរដ្ឋរាប់សិបខ្នង រងការលិចលុង និងប្រជាពលរដ្ឋជាច្រើនគ្រួសារ ត្រូវជលៀសទៅកាន់ទីទួលសុវត្តិភាព។ចំំណែកស្រូវស្រែចំការនិងដាំណាំរួមផ្សំវិញ បើសិនជាទឹកនៅតែបន្តឡើង និងត្រូវរងការខូចខាតទាំងស្រុងនៅថ្ងៃខាងមុខនេះ។ 
នៅពេលមានមហន្តរាយកើតឡើងលោកកុល សំអុល អភិបាលខេត្តបានចុះពិនិត្យមើលស្ថានភាពទឹកនិងចុះសួរសុខទុក បងប្អូនប្រជាពលរដ្ឋនៅតាមបណ្តាស្រុក និងបានធ្វើការផ្តាំផ្ញើរ ដល់ប្រជាពលរដ្ឋយើងរស់នៅលើទីទួលសុវត្តិភាព ត្រូវចេះលើកំពស់ថែរក្សាសុខភាព ឲ្យបានល្អជាពិសេសគឺការហូបចុក ត្រូវមានអនាម័យ ហូបស្អាត ផឹកស្អាត រស់នូវស្អាត ម្យ៉ាងទៀតត្រូវការពារ ឲ្យមានសុវត្តិភាពបំផុតចំពោះកូនចៅ កុំឲ្យលេងទឹកខ្លាចមានគ្រោះថ្នាក់ដល់អាយុជីវិត ។
នៅព្រឹកថ្ងៃទី០២សីហានេះ លោកប៉ាង ប៉េង ប្រធានមន្ទីរធនធានទឹក និងឧតុនិយម ខេត្តស្ទឹងត្រែង បាននិយាយឱ្យដឹងថា ស្ថានីយ៍ជលសាស្ត្រទឹកទន្លេមេគង្គស្ទឹងត្រែង នៅព្រឹកថ្ងៃទី០២នេះទឹកមានកម្ពស់១១,២៥ ម៉ែត្រលើសកំរិតប្រកាសអាសន្ន លើសថ្ងៃល្ងាចទី០១ ទឹកមានកម្ពស់ត្រឹមតែ ១០,៥៥ ម៉ែត្រប៉ុណ្ណោះ៕
