ដោយ៖ឡុង សំបូរ ខេត្តស្ទឹងត្រែង៖ ក្រុមក្មេងទំនើងដែលគេតែងឃើញជិះម៉ូតូធុនធំៗ បំពងសម្លេងអុកឡុក និងធ្វើសកម្មភាព ប្រដេញកាប់ចាក់គ្នាគួរឲ្យញញើត និងព្រួយបារម្ភពីសន្តិសុខ សុវត្ថិភាព ពីសំណាក់ប្រជាពលរដ្ឋក្នុងក្រុងនោះ នៅថ្ងៃទី១៧មីនា នេះ ត្រូវបានមន្ត្រីនគរបាលជំនាញក្រុងស្ទឹងត្រែង 
បញ្ជូនខ្លួននិងវត្ថុតាងទៅតុលាការខេត្តនោះហើយ ក្រោយការឃាត់ខ្លួន បន្ទាប់ពីក្រុមនេះបានធ្វើសកម្មភាពជួបជុំគ្នា នៅសួនច្បារមុនសាលាខេត្ត កាលពីម៉ោង១១ និង៣០នាទីយប់ ថ្ងៃទី១៥ មីនា ឆ្នាំ២០២១ និងក្នុងគ្រាដែលប្រធានគណៈបញ្ជាការឯកភាពរដ្ឋបាលក្រុងស្ទឹងត្រែង លោក សាយ កុសល បានដឹកនាំកម្លាំងនគរបាលចុះធ្វើរដ្ឋបាលត្រួតពិនិត្យអាវុធជាតិផ្ទុះ និងបានឃាត់ខ្លួនក្មេងទំនើង ៣នាក់ ថែមទៀតផង។
មន្ត្រីនគរបាលក្រុងស្ទឹងត្រែង បានប្រាប់ឲ្យដឹងថា នៅក្នុងការចុះធ្វើរដ្ឋបាលត្រួតអាវុធជាតិផ្ទុះ ដែលដឹកនាំដោយ លោក សាយ កុសល អភិបាល នៃគណៈអភិបាលក្រុងស្ទឹងត្រែង កាលពីយប់ថ្ងៃទី១៥មីនា កន្លងមកនេះ កម្លាំងគណៈបញ្ជាការឯកភាពរដ្ឋបាលក្រុង បានប្រទះឃើញមុខសញ្ញាក្មេងទំនើង ៣នាក់ ដែលគួរឲ្យសង្ស័យ ដែលក្រុមក្មេងទាំងនោះ កំពុងជួបជុំគ្នានៅសួនច្បារមុខសាលាខេត្ត និងនៅក្នុងគ្រានោះ កម្លាំងសមត្ថកិច្ចបានរកឃើញភាពមិនប្រក្រតីជាច្រើន ព្រមទាំងបានឃាត់ខ្លួនមកសាកសួរ។
មន្ត្រីនគរបាលដដែលបានបន្តទៀតថា មុខសញ្ញាក្មេងទំនើងដែលត្រូវបានឃាត់ខ្លួនក្នុងយប់នោះ មានគ្នា ៣នាក់ ម្នាក់ឈ្មោះ អុន សុភារិទ្ធ អាយុ ២០ឆ្នាំ មុខរបរជាងដែក មានទីលំនៅភូមិឫស្សីកណ្ដាល ឃុំអូរឫស្សីកណ្ដាល ស្រុកសៀមបូក ខេត្តស្ទឹងត្រែង ,ឈ្មោះ សឿន ពៅ អាយុ ១៦ឆ្នាំ មុខរបរជាងដែក មានទីលំនៅភូមិភក់ ឃុំថាឡា ស្រុកថាឡាបរិវ៉ាត់ ខេត្តស្ទឹងត្រែង និង ឈ្មោះ សេង សី អាយុ ១៧ឆ្នាំ មុខរបរមិនប្រាកដ មានទីលំនៅភូមិរាជានុកូល សង្កាត់ស្ទឹងត្រែង ក្រុងស្ទឹងត្រែង ខេត្តស្ទឹងត្រែង។ យុវជនទាំង ៣នាក់ សមត្ថកិច្ចបានធ្វើតេស្ត រកឃើញមានសារធាតុញៀន ថែមទៀតផង។ លោកថា ក្រោយកាឃាត់ខ្លួន សមត្ថកិច្ចដកហូតបានដាវ ១ដើម ,ម៉ូតូធំ ៣គ្រឿង (ម៉ាកExter) នាំយកមកកាន់ អធិដ្ឋានការដ្ឋាននគរបាលក្រុងស្ទឹងត្រែង។
មន្ត្រីនគរបាលក្រុង បានបញ្ជាក់ថា ក្រោយចងក្រងឯកសារ និងប្រមូលបានវត្ថុតាងគ្រប់គ្រាន់ ក្នុងការដាក់បន្ទុកនោះរួចមក ក្រុមក្មេងទំនើងទាំង ៣នាក់ នៅថ្ងៃទី១៧មីនា នេះ ត្រូវបានបញ្ជូនខ្លួនទៅកាន់តុលាការខេត្តស្ទឹងត្រែង ដើម្បីចាត់ការបន្តទៅតាមនីតិវិធី។
ប្រជាពលរដ្ឋមានការសាទរ ចំពោះចំណាត់ការបង្ក្រាបក្រុមក្មេងទំនើងទាំងនោះ របស់អាជ្ញាធរក្រុង ដើម្បីលុបបំបាត់ភាពអនាធិបតេយ្យ ការឡុកឡុកបំភិតបំភ័យ ប្រដេញកាប់ចាក់គ្នាយ៉ាងសាហាវ បង្ករអសនិសុខសង្គម និងដើម្បីរួមគ្នាអនុវត្តគោលនយោបាយភូមិ ឃុំ សង្កាត់ មានសុវត្ថិភាព ទាំង ៧ចំនុច ដែលដាក់ចេញដោយ រាជរដ្ឋាភិបាល នាពេលកន្លងមកឲ្យមានប្រសិទ្ធភាព៕
