ខេត្តបាត់ដំបង ៖ ប៉ុន្មានឆ្នាំចុងក្រោយនេះ គេសង្គេតឃើញថា ក្បាលស្ពានវត្តគរត្រើយខាងកើត មានការបាក់ស្រុតកាន់តែធ្ងន់ធ្ងរទៅៗ ដែលស្ទើរតែអ្នកធ្វើដំណើរទាំងឡាយមានការព្រួយបារម្ភយ៉ាងខ្លាំង នៅពេល
ដែលពួកគេមកដល់ត្រង់កន្លែងនេះ ព្រោះមិនត្រឹមតែបាក់ដីដល់ខឿនក្បាលស្ពានប៉ុណ្ណោះទេ វាថែមទាំងបាន
បាក់លុងដល់សាច់ថ្នល់ថែមទៀតផង ដែលបញ្ហានេះអាចប្រឈមនឹងការខូចខាតយ៉ាងធ្ងន់ធ្ងរបំផុត ប្រសិនបើ
អង្គភាពជំនាញ នៅតែបន្តអូសពេល និងមិនសូវយកចិត្តទុកដាក់អោយបានហ្មត់ចត់ ។
គួរបញ្ជាក់ថា ស្ពានវត្តគរគឺបានសាងសង់ឡើងដោយមូលនិធិ របស់រាជរដ្ឋាភិបាល ដែលមានទីតាំងស្ថិត
នៅលើកំណាត់ផ្លូវជាតិលេខ ៥៧ ឆ្លងកាត់ស្ទឹងសង្កែ ក្នុងភូមិសាស្ត្រភូមិវត្តតាមិម ឃុំអូរដំបង១ ស្រុកសង្កែ
ខេត្តបាត់ដំបង តភ្ជាប់ពីខេត្តបាត់ដំបង ឆ្ពោះទៅកាន់ខេត្តប៉ៃលិន ។
លុះនៅប៉ុន្មានឆ្នាំចុងក្រោយនេះ គេសង្គេតឃើញថា ក្បាលស្ពានប៉ែកត្រើយខាងកើតស្ទឹង មានការបាក់ស្រុត
យ៉ាងខ្លាំង ដោយលូតមកដល់ខឿនក្បាលស្ពាន និងសាច់ថ្នល់ផងដែរ ដែលបញ្ហានេះ បានបង្កអោយមានការគ្រោះថ្នាក់ចរាចរណ៍ជាញឹកញាប់ ប៉ុន្តែសម្រាប់អង្គភាពជំនាញហាក់ដូចជាមិនសូវចាប់អារម្មណ៍ប៉ុន្មាននោះឡើយ ទំនងជាមានការដោះដូរប្រធានញឹកញាប់ពេកក៏មិនដឹង ព្រោះការបាក់ស្រុតនេះ បានឆ្លងកាត់ប្រធាន
ចំនួន ៣ ជំនាន់មកហើយ ។
ប្រភពជាច្រើនបានរិះគន់យ៉ាងចាស់ដៃ ទៅលើមន្ត្រីជំនាញ ដែលកាន់កាប់មុននាទីនេះ ដោយគេបានចំណាយ
លុយឥតប្រយោជន៍យ៉ាងច្រើនសន្ធឹកសន្ធាប់ ក្នុងការយកទៅប្រើប្រាស់ខុសទិសដៅ លើបញ្ហានេះ ដោយគេបានយកលួសសំណញ់មករុំព័ទ្ធជាមួយដុំថ្មធំៗ ដាក់តម្រៀបគ្នាជាជួរហោយអះអាងថា ដីដែលបាក់មិនអាចរុញឈ្នះថ្មដែលគេតម្រៀបនោះឡើយ ប៉ុន្តែទីបំផុតការធ្វើរបៀបនេះបានប៉ើងទៅក្នុងស្ទឹងទាំងអស់ បើទោះបីជាគេខំប្រឹងព្យាយាមម្តងហើយ ម្តងទៀតយ៉ាងណាក៏ដោយ គឺមិនខុសអីពីយកលុយទោជះចោលនៅក្នុងទឹកស្ទឹងយ៉ាងដូច្នេះដែរ ។
លោក ព្រួញ រិទ្ធថា ប្រធានមន្ទីរសាធារណការ និងដឹកជញ្ជូនទើបឡើងកាន់តំណែងថ្មី បានលើកឡើងថា
ដោយសារតែឆ្នាំនេះ ប្រាក់គម្រោងត្រូវបានលោកប្រធានមុនៗ សុីញ៉េយកមកប្រើប្រាស់អស់ហើយ ដូច្នេះ
ពេលដែលលោកមកកាន់តំណែង គឺមានតែការស្នើសុំទៅលើគម្រោងថ្មីតែប៉ុណ្ណោះ ដើម្បីសុំទៅក្រសួងយកថវិកាមកប្រើប្រាស់ទៅលើចំណុចខាងលើនេះ ព្រោះថវិកាតូចតាច គឺមិនអាចយកមកប្រើប្រាស់គ្រប់គ្រាន់ឡើយ ហើយលោកក៏បានស្នើសុំអោយខាងជំនាញវិស្វករចុះមកសិក្សារួចហើយដែរ ដើម្បីរិះរកវិធីនៃការជួសជុលអោយមានប្រសិទ្ធិភាព ប៉ុន្តែនៅពេលនេះ បើវាមានការបាក់ស្រុតតទៅមុខ ក៏តាមដំណើរសិនទៅ
គឺលោកគ្រាន់តែអោយរថយន្តដឹកដីមកចាក់បំពេញជង្ហុកបណ្តោះអាសន្នសិនតែប៉ុណ្ណោះ ៕ សោ និយមរដ្ឋ
