បន្ទាយមានជ័យ ៖ជម្លោះទាមទារដីផ្លូវមួយ១កន្លែងនៅត្រង់ជាប់អតីតរណ្តៅដីឬស្រះខាងក្រោយសាលាក្រុងប៉ោយប៉ែត នាភូមិផ្សារកណ្តាលសង្កាត់ផ្សារកណ្តាលក្រុងប៉ោយប៉ែត ភាគីពលរដ្ឋម្ខាងថា ពួកគេអត់ផ្លូវដើរខាងក្រោយផ្ទះ ។ហើយទាមទារអោយម្ចាស់ដីដែលស្ថិតនៅខាងក្រោយផ្លះរបស់ពួកគេនោះ ត្រូវតែបើកផ្លូវ ។
ប៉ុន្តែភាគីម្ខាងទៀត ឆ្លើយតបថា ពលរដ្ឋភាគីម្ខាងនោះ មានចេតនាបង្កជម្លោះព្រោះមានផ្លូវនៅខាងមុខផ្ទះរួចទៅហើយ ហើយនៅខាងក្រោយក៏មានផ្លូវថ្មើរជើងដែរ ។ ប៉ុន្តែពួកគេលោភលន់បែរជាមកបង្ខំភាគីខ្លួន អោយទម្លុះរបងកាត់ដីខ្លួនធ្វើផ្លូវទៅវិញ។
ពលរដ្ឋភាគីម្ខាងដែលតវ៉ាមានអ្នកស្រីអួង ទៀង អាយុ៣៥ឆ្នាំ ,អ្នកស្រីឆែ សុជាតិហៅឡូត ,អ្នកស្រីសាប់ អ៊ានថូ ដែលអះអាងថាតំណាងអោយ៨គ្រួសារបានប្រាប់សារព័ត៌មានថា៖ ដីឡូតិ៍ពួកគាត់មានទទឹង១០ទៅ១៥ម៉ែត្រនិងបណ្តោយ៣០ម៉ែត្រ ហើយបានសាង់សង់ផ្ទះរួចហើយបែរមុខទៅរកផ្លូវដែលមានទទឺង១០ម៉ែត្រ ។
ហើយការចេញ ចូលសំខាន់ក៏ធ្វើដំណើរតាមផ្លូវខាងមុខផ្ទះនោះដែរ ។
ទោះយ៉ាងណា ពួកអ្នកស្រីដែលបានទាមទារទុកផ្លូវទទឺង៦ ទៅ ៧ ម៉ែត្រខាងក្រោយផ្ទះនោះ ព្រោះមកពីទីតាំងមាត់អតីតស្រះតូច និងស្រះធំ (ឬរណ្តៅដីដែលក្រុមវិស្វកម្មនៃអ៊ុនតាក់ថៃកាយធ្វើផ្លូវជាតិលេខ៥) នៅចំពីខាងក្រោយផ្លូវបំបែកពីផ្លូវជាតិលេខ៥ ចន្លោះសាលាក្រុងនិងការិយាល័យកសិកម្មក្រុងទៅក្រោយទៅខាងក្រោយ ធ្លាប់មានផ្លូវចេញ ចូល ។ប៉ុន្តែ ពេលលោកអ៊ុំ សុផល ភាគីម្ខាងទៀត បានទិញដីនិងចាក់ដីនៅប្លុកនោះ ក៏បានបិទផ្លូវ ។
ហេតុនេះបានជាពួកគេបានដាក់បណ្តឹងទៅអាជ្ញាធរក្រុង ហើយលោក គាត ហ៊ុល អភិបាលក្រុងប៉ោយប៉ែត រួមដំណើរដោយលោក ហឿន វីរៈ អភិបាលរងក្រុង និងកម្លាំចម្រុះ បានដឹកនាំក្រុមការងារ មន្រ្តីពាក់ព័ន្ធចុះពិនិត្យ សម្របសម្រួលនិងរកដំណោះស្រាយ ជូនបងប្អូនប្រជាពលរដ្ឋជាភាគីជម្លោះ ។
លោក អ៊ុំ សុផល ភាគីម្ចាស់ដីម្ខាងទៀតដែលរងការចោទប្រកាន់បានបំភ្លឺថា ៖ ដីនៅប្លុកនោះជាអតីតរណ្តៅដីដែលគេកាយអាចម័ដីធ្វើផ្លូវជាតិលេខ៥ ។ ប៉ុន្តែដីនោះ មានមានពលរដ្ឋម្នាក់ជាម្ចាស់ ។និងជាបន្តបន្ទាប់និងចុងក្រោយ ទើបលោកបានទិញ ហើយមានបង្កាន់ដៃបញ្ជាក់កម្មសិទ្ធិពីអាជ្ញាធរ និងជំនាញសុរិយោដីតាមនិតិវិធី ។ទោះជាយ៉ាងណា វាក៏មានលំនាំផ្លូវតូចនិងទាល់មួយខ្សែត្រង់ មាត់ស្រះដែលពលរដ្ឋធ្លាប់ធ្វើដំណើរចេញ ចូលចូលដែរ ។
លោកបានបន្តថា ៖ មកទល់បច្ចុប្បន្នផ្លូវតូចនោះ ក៏មិនបានបិទឬរំលោភយកដែរ ។ ប៉ុន្តែ លោកបានកាយប្រឡាយប្រុងដាក់លូប្របនោះ ។ ហើយនៅពេលណា គេលុបដីលើលូរួចរាល់ ពលរដ្ឋឬអ្នកណាក៏ដោយអាចធ្វើដំណើរលើផ្លូវតូចនោះឡើងវិញ ។
ប៉ុន្តែ លោកអ៊ុំ សុផល បានបដិសេធថា លោកមិនអាចទម្លុះរបងបេតុងនិងទ្វារដែក កាត់ដីកម្មសិទ្ធិរបស់លោក អោយពលរដ្ឋភាគីម្ខាងយកធ្វើជាផ្លូវនៅឡើយ ។លោកបានបន្តថា ៖ តាមលោកយល់ ពលរដ្ឋភាគីម្ខាងមានផ្លូវធំខាងមុខផ្ទះរៀងៗខ្លួនសម្រាប់ធ្វើដំណើរ ចេញ ចូលហើយ ។ប៉ុន្តែពួកគេទាំងនោះ មានចេតនាបង្កជម្លោះ ហើយយកលំអានប្រវត្តិទ្រឹស្តី “ឈ្នះបានដី ចាញ់បានលុយ “ មកប្រើប្រាស់ ហេតុនេះ ទើបពួកគេបង្កជម្លោះនេះឡើង ហើយអាចធ្វើអោយសាធារណជនមានការភាន់ច្រឡំ ។
ឃើញស្ថានភាពទាល់ច្រកដូច្នេះ លោកគាត ហ៊ុល អភិបាលក្រុង ប៉ោយប៉ែត ដែលក៏បានទទួលអនុសាសន៍ពីថ្នាក់លើផងដែរ បានស្នើទិញដីលោកអ៊ុំ សុផល ក្នុងទំហំទទឺង៤ម៉ែត្រ ដើម្បីបើកផ្លូវដែលពលរដ្ឋភាគីម្ខាងចង់បាន អោយធ្លាយទៅផ្លូវម្ខាងទៀត ។ប៉ុន្តែ បញ្ហាតម្លៃដីនិងទីតាំង មិនអាចធ្វើទៅបានទេ ។ហេតុនេះ លោកគាត ហ៊ុល បានអោយដឹងថា ៖ បើលើកនេះ មិនអាចសម្របសម្រួលរកដំណោះស្រាយបាន ។គឺមានតែរង់ចាំ ចុះដោះស្រាយលើកក្រោយទៀតនៅរដ្ឋបាលថ្នាក់ក្រុងនិងរដ្ឋបាលថ្នាក់ខេត្ត ៕ដោយ៖ឃិន គន្ធា
