កំពង់ចាម: ឯកឧត្ដមទេសរដ្នមន្ត្រី ស៊ុន ចាន់ថុល រដ្នមន្ត្រីក្រសួងសាធារណៈការ និងដឹកជញ្ជូន បានប្រកាសថា ស្ពានស្ទឹងត្រង់-ក្រូចឆ្មារ ត្រូវបានសម្តេចអគ្គមហាសេនាបតីតេជោ ហ៊ុន សែន អនុញ្ញាតបេីកឲ្យប្រជាពលរដ្ឋ ធ្វើដំណើរឆ្លងកាត់ជាបណ្ដោះអាសន្ន ចាប់ពីពេលនេះតទៅ ការថ្លែងយ៉ាងដូច្នេះក្នុងឱកាសចុះពិនិត្យស្ពានមិត្តភាពកម្ពុជាចិន ស្ទឹងត្រង់-ក្រូចឆ្មារ នាព្រឹកថ្ងៃទី២៣ ខែមិនា ឆ្នាំ២០២១ ដោយមានការអញ្ជើញចូលរួមពី ឯកឧត្ដម អ៊ុន ចាន់ដា អភិបាលខេត្តកំពង់ចាម និងឯកឧត្ដម ជាម ចាន់សោភ័ណ អភិបាលខេត្តត្បូងឃ្មុំ ។
ឯកឧត្ដមទេសរដ្នមន្ត្រី ស៊ុន ចាន់ថុល រដ្នមន្ត្រីក្រសួងសាធារណៈការ និងដឹកជញ្ជូន មានប្រសាសន៍ថា ស្ពានមិត្តភាពកម្ពុជា-ចិន ស្ទឹងត្រង់-ក្រូចឆ្មារ នេះ គឺមានគម្រោងសម្ពោធដាក់ឲ្យប្រេីប្រាស់ជាផ្លូវការនៅថ្ងៃទី២៤ ខែមិនា ឆ្នាំ២០២១នេះ ក្រោមអធិបតីភាពដ៏ខ្ពង់ខ្ពស់សម្តេចអគ្គមហាសេនាបតីតេជោ ហ៊ុន សែន នាយករដ្ឋមន្ត្រីកម្ពុជា ប៉ុន្តែដោយសារបញ្ហាព្រឹត្តិការណ៍២០កុម្ភៈ ដូច្នេះមិនត្រូវប្រារព្ធពិធីសម្ភោធតាមការគ្រោងទុកនោះទេ ទេីបឯកឧត្ដមទេសរដ្ឋមន្ត្រី ចុះមកពិនិត្យ ដេីម្បីគោរពស្នេីសុំទៅសម្តេចតេជោហ៊ុន សែន ដេីម្បីបេីកឲ្យប្រជាពលរដ្ឋប្រេីប្រាស់ជាបណ្ដោះអាសន្ន ចាប់ពីពេលនេះតទៅ ចំពោះស្ពានមិត្តភាពកម្ពុជា-ចិន ដ៏រឹងមាំនេះ ជាពិសេស គឺនៅពេលចូលឆ្នាំថ្មីប្រពៃណីជាតិខ្មែរ នាពេលខាងមុខនេះ គឺឯកឧត្ដម មិនចង់ឲ្យប្រជាពលរដ្ឋ ប្រេីប្រាស់សាឡាងទៀតទេ ព្រោះវាអាចមានហានិភ័យខ្ពស់តាមរយៈការកកស្ទះផងដែរ ។
ឯកឧត្ដមទេសរដ្ឋមន្ត្រី បានបញ្ជាក់ថា ស្ពានមិត្តភាពកម្ពុជា-ចិន ស្ទឹងត្រង់-ក្រូចឆ្មារ នេះ គឺធ្វើលឿនជាងការគ្រោងទុក រយៈពេល២ខែ ចំពោះសាឡាងដែលធ្លាប់បម្រើការនៅទីនេះ គឺត្រូវបង្វែយកទៅស្រុកកំពង់លែង ខេត្តកំពង់ឆ្នាំងវិញ ដោយសារនៅទីនោះមិនទាន់មានស្ពាននៅឡើយ ។
ជាមួយគ្នានោះ ឯកឧត្ដមទេសរដ្ឋមន្ត្រី ស៊ុន ចាន់ថុល ក៏បានអំពាវនាវដល់បងប្អូនប្រជាពលរដ្ឋ ឲ្យខិតខំយកចិត្តទុកដាក់ថែទាំសុខភាព គឺត្រូវអនុវត្តតាមកន្លងថ្មីរបស់សម្តេចអគ្គមហាសេនាបតីតេជោ ហ៊ុន សែន នាយករដ្ឋមន្ត្រីកម្ពុជា ៣ការពារ ៣កុំ ដេីម្បីជៀសផុតពីជំងឺកូវីដ-១៩ ដ៏កាចសាហាវនេះផងដែរ ។
គួររំលឹកផងដែរថា ស្ពានស្ទឹងត្រង់-ក្រូចឆ្មារនេះ ត្រូវបានបើកការដ្ឋានសាងសង់ជាផ្លូវការកាលពីថ្ងៃទី៩ ខែកុម្ភៈ ឆ្នាំ២០១៨ ក្រោមអធិបតីភាពដ៏ខ្ពង់ខ្ពស់សម្តេចនាយករដ្ឋមន្រ្តី ហ៊ុន សែន ដោយស្ពាននេះមានប្រវែងសរុប ១១៣១ ម និង ទទឹង១៣,៥០ ម ជាប្រភេទស្ពានបេតុងសរសៃដែក គ្រោងចំណាយថវិកាសរុប ៥៦,៩៩៨ លានដុល្លារសហរដ្ឋអាមេរិក ជាហិរញ្ញប្បទានសម្បទាន ពីរដ្ឋាភិបាលនៃសាធារណរដ្ឋប្រជាមានិតចិន រួមជាមួយថវិកាបដិភាគ របស់រាជរដ្ឋាភិបាលកម្ពុជា ៕
