ខេត្តក្រចេះ : ស្ថានភាពទឹកជំនន់ទន្លេមេគង្គ នៅក្នុងខេត្តក្រចេះ នៅតែបន្តរការហក់ឡើង ដោយឥតឈប់ឈរ និងនូវតែបន្តរជនលិច ផ្ទះសំបែង ដីស្រែចំការ ស្ពានថ្នល់ និងប្រព័ន្ធ ធារាសាស្ត្រ ផ្សេងៗទៀត នៅក្នុងខេត្តក្រចេះជាបន្តរ បន្ទាប់ ហើយនៅក្នុងចំណោមស្រុក៤នៃក្រុង១នៅតាមបណ្ដោយដងទន្លេមេគង្គដែលកំពុងទទួលរងនូវគ្រោះមហន្តរាយនៃទឹកជំនន់ ក្នុងរដូវនេះ មានតែស្រុកព្រែកប្រសព្វមួយទេ ដែលទទួលរងនូវការលិចលុងនិងផលប៉ះពាល់ ធ្ងន់ធ្ងរជាងបណ្ដា ស្រុកផ្សេងៗទៀត ។ 
ចំណែក កំពស់ទឹកជំនន់ទន្លេមេគង្គនៅខេត្តក្រចេះក្នុងថ្ងៃទី ៥ខែ សីហា ឆ្នាំ២០១៤នេះ បានហក់ឡើងរហូតទៅដល់កំពស់ 22m 76 cm ពោលគឺខ្ពស់ជាង ថ្ងៃទី៤ខែសីហាឆ្នាំ២០១៤ ។ ចំណែកឯ ផលប៉ះពាល់ដល់ផ្ទះសំបែង ផ្លូវថ្នល់ ស្ពាន ស្រែចំការ មណ្ឌលសុខភាព សាលារៀននិង ដំណាំដាំដុះផ្សេងៗ ដែលកំពុងតែទទួលរងនូវការ លិចលង់ ដោយសារតែគ្រោះមហន្តរាយនៃទឹកជំនន់ នៅក្នុងរដូវនេះ នៅតាមបណ្ដាស្រុកផ្សេងៗ លោកខាន់ ចំណាន អភិបាលរងខេត្ត និងជាអនុប្រធានអចិន្ត្រៃយ៍គណ:កម្មការគ្រប់គ្រងគ្រោះមហន្តរាយខេត្តក្រចេះ បានប្រាប់ភ្នាក់ងារ កាសែត កម្ពុជាថ្មី ឲ្យដឹងថា ពាក់ព័ន្ធទៅនឹងវិស័យកសិកម្ម គឺលិចសន្ទូងវស្សាអស់ចំនួន ៤២៣៤ហិចតា និងសំណាប១៣ហិចតា ។
វិស័យ ហេដ្ឋារចនាសម្ព័ន្ធ ផ្លូវស្ថិតនៅចំណុចសាលាឃុំផ្សោត ទទួលរងនូវការលិចលុងចំនួន១០គីឡូម៉ែត្រ ផ្លុវ៣៧៧ ស្ថិតនៅចំណុច ឃុំសណ្ដាន់ទទួលរងនូវការលិចលុង ចំនួន ១គីឡូម៉ែត្រ ។ ផ្លូវលំកសាងដោយមន្ទីរអភិវឌ្ឍន៍ជនបទទទួលរងនូវការលិចលុងចំនួន ៧១៧០០ម៉ែត្រ ។
ប្រព័ន្ធធារាសាស្ត្រ ទទួលរងនូវការលិចលុង ចំនួន៦៩៧២១ម៉ែត្រ ផ្ទះរបស់ប្រជាពលរដ្ឋ ទទួលរងនូវការលិចលុងអស់ចំនួន១៥១១៤ខ្នង ។ ចំណែកអាជ្ញាធរ និងកងកម្លាំងប្រដាប់អាវុធគ្រប់ប្រភេទនៅក្នុងខេត្ត នៅតែបន្តរ ការដុតដៃដុតជើងយ៉ាងមមាញឹក ក្នុងការជំលាសប្រជាពលរដ្ឋ ព្រមទាំងឧបត្ថម សំភារប្រើប្រាស់ និងគ្រឿងឧបភោគបរិភោគមួយចំនួនដល់ដល់ប្រជាពរដ្ឋដែលកំពុងខ្វះខាតនៅក្នុងខណ:ពេលដែលទឹកជំនន់កំពុងតែវាយប្រហាយ៉ាងគំហ៊ុកនៅក្នុងពេលនេះ៕
