សៀមរាប ៖ ជនសង្ស័យភេទប្រុសម្នាក់នេះនិងវត្ថុតាងរួមមានប្រភេទគ្រឿងញៀនខុសច្បាប់ម៉ាទឹកកក ចំនួន ៦ កញ្ចប់តូច និង ឩបករណ៍ច្នៃជក់គ្រឿងញៀនខុសច្បាប់មួយចំនួនទៀតត្រូវបានសមត្ថកិច្ចធ្វើការចាប់ឃាត់ខ្លួននិងដកហូតបានពីជនសង្ស័យរួចយកមកកាន់ការិយាល័យនគរបាលជំនាញដើម្បីការសួនាំជាប់ពាក់ព័ន្ធក្នុងករណីជួញដូរដោយខុសច្បាប់នូវសារធាតុញៀន ។ លោកវរសេនីយ៍ឯក អ៊ុំ អមរា ស្នងការរងនិងជាប្រធានការិយាល័យកណ្តាលនគរបាលប្រឆាំងបទល្មើសនិងលោកវរសេនីយ៍ទោ អ៊ុំ សាអាត នាយការិយាល័យប្រឆាំងគ្រឿងញៀននៃស្នងការដ្ឋាននគរបាលខេត្តសៀមរាបបានឲ្យដឹងថាដោយអនុវត្តជាប្រចាំតាមការយកចិត្តទុកដាក់ខ្ពស់ពីសំណាក់លោក ឩត្តមសេនីយ៍ទោ សត ណាឌី ស្នងការនគរបាលខេត្តសៀមរាបក៏ដូចជាដើម្បីធ្វើឲ្យការអនុវត្តនូវគោលនយោបាយភូមិឃុំមានសុវត្ថិភាពឲ្យកាន់តែមានប្រសិទ្ធភាពខ្ពស់ផងនោះ ។
ជាក់ស្តែងនៅថ្ងៃទី០៦ខែសីហាឆ្នាំ២០១៤កន្លងទៅកម្លាំងការិយាល័យប្រឆាំងគ្រឿងញៀននៃស្នងការដ្ឋាននគរបាលខេត្តសៀមរាបសហការណ៍ជាមួយកម្លាំងប៉ុសិ៍្តនគរបាលរដ្ឋបាលសង្កាត់ស្វាយដង្គំ ក្រុងសៀមរាប បានធ្វើការតាមដានស្រាវជ្រាវនិងឈានដល់ការបង្ក្រាបចាប់ឃាត់ខ្លួនជនសង្ស័យភេទប្រុសម្នាក់នេះបាននិងវត្ថុតាងទាំងអស់ខាងលើនៅក្នុងភូមិបណ្ឌល ២ សង្កាត់ស្វាយដង្គំ ក្រុងសៀមរាប តែម្តង។
ក្នុងកិច្ចចុះប្រតិបត្តិការណ៍ខាងលើសមត្ថកិច្ចបានបន្តឲ្យដឹងទៀតថាបន្ទាប់ពី សមត្ថកិច្ចជំនាញបានធ្វើការចាប់ឃាត់ខ្លួនជនសង្ស័យព្រមទាំងវត្ថុតាងទាំងអស់បានហើយនោះរួចយកមកធ្វើការសួរនាំបន្តនៅការិយាល័យជំនាញរួចមកនៅមុខសមត្ថកិច្ចជនសង្ស័យបានឆ្លើយសារភាពថារូបគេពិតជាបានប្រព្រត្តឹនៅករណីទាំងអស់ខាងលើពិតប្រាកដមែនដោយបច្ចុប្បន្នទាំងជនសង្ស័យនិងវត្ថុតាងរួមមានប្រភេទគ្រឿងញៀនខុសច្បាប់ម៉ាទឹកកក ចំនួន ៦ កញ្ចប់តូច និង ឩបករណ៍ច្នៃជក់គ្រឿងញៀនខុសច្បាប់មួយចំនួនទៀតត្រូវបានសមត្ថកិច្ចកសាងសុំណុំរឿងបញ្ជូនទៅកាន់សាលាដំបូងខេត្តសៀមរាបហើយកាលពីព្រឹកថ្ងៃទី០៨ខែសីហាឆ្នាំ២០១៤នេះដើម្បីចំណាត់ការទៅតាមនិតិវិធីបន្ត ៕ 
