ខេត្តឧត្តរមានជ័យ. បន្ទាប់ពីហាងឆេងឈើគ្រញូងឡើងថ្លៃកប់ពពក និងមានថៃថៅកែចាំប្រមូលទិញ បានធ្វើឱ្យប្រជាពលរដ្ឋ ខ្មែររាប់រយនាក់ ក្នុងមួយថ្ងៃៗសម្រុកឡើងភ្នំដងរែក ទៅកាប់ឈើគ្រញូងនៅក្នុងទឹកដីថៃ ចំណុចបង្គោលឡាក់សីមាលេខ ១៣ នៃទិសទី៣សមរភូមិមុខ ក្រោមការបើកភ្លើងខៀវរបស់មេបញ្ជាការយោធាឈរជើងនៅតំបន់នោះ។ 
លោក សុផាន ណារស់ អ្នកយកព័ត៌មានឱ្យកាសែតកម្ពុជាសុវណ្ណភូមិ បានឱ្យដឹងនៅថ្ងៃសៅរិ៍នេះថា នៅថ្ងៃសុក្រទី៨ ខែសីហា ឆ្នាំ២០១៤ លោក បានធ្វើដំណើរតាមផ្លូវយុទ្ធសាស្ត្រខ្សែរក្រវ៉ាត់ព្រំដែន ទៅដល់ចំណុចបង្គោលឡាក់១៣ ក្នុងភូមិដងទង់ សង្កាត់កូនក្រៀល ក្រុងសំរោង ខេត្តឧត្តរមានជ័យ ដោយលឺសំលេងម៉ាស៊ីនជ្រៀកឈើគ្រញូង១កន្លែង ដែលការពារដោយកងកម្លាំងយោធា ដែលឯកសណ្ឋានជាប់ស្លាក់សញ្ញារបស់កងពលធអន្តរាគមន៍លេខ២ ម្នាក់ឈ្មោះ សី ហា ហៅតាម៉ៅ ប្រដាប់ដោយអាវុធAK១ដើមឈរការពារនៅខាងមុខកន្លែងជ្រៀកឈើគ្រញូង។ 
ហើយលោកក៏បានឈប់រថយន្តនៅលើដងផ្លូវ មួយសន្ទុះក្រោយមកក៏ឃើញមានឈ្មោះ រស់ ជុក ជាទាហានពាក់ស័ក្តិ៤មានតួរនាទីជាប្រធានការិយាល័យផ្នែកអភិវឌ្ឍន៍ក្នុងអង្គភាពកងពលតូចថ្មើរលេខ៤២ យកលុយមកឱ្យតែលោកបដិសេធន៍មិនយក ព្រោះថាលុយនោះជាលុយអ្វី។ ពេលនោះលោក រស់ ជុក ក៏បានផ្ទុះកំហឹងស្រែឡូឡារលឺដល់កងកម្លាំងដែលយាមនៅកន្លែងជ្រៀកឈើគ្រញូង និងកម្មករដែលកំពុងស៊ីឈ្មួលជ្រៀក នឹងលីឈើគ្រញូងជាច្រើននាក់នៅទីនោះ បានស្រែកថា មេទុកឱ្យខ្ញុំបាញ់វា ចោល ហើយកម្មករមួយចំនួនស្រែកថា ទុកឱ្យខ្ញុំវាយវាសម្លាប់ចោល។ 
លោក សុផាន ណារស់ បានបញ្ជាក់បន្ថែមទៀតថា លោក សី ហា ហៅតាម៉ៅ ដែលការពារនៅចំណុចកើតហេតុបានលើកឡើងថា នៅបង្គោលឡាក់១២ និង១៣ ក៏ដូចជានៅចំណុចទិសទី៣ទាំងមូល ថៅកែឈើគ្រញូងមកពីណាក៏មិនអាចចូលទិញបានដែរ ព្រោះតំបន់ខាងលើ លោក រស់ ជុក បានដេញថ្លៃប្រមូលទិញឈើគ្រញូងនៅបន់នោះទាំងអស់ ដែលត្រូវបានគេស្គាល់ថា ជាថៅកែឈើគ្រញូងដុះស្លែរដ៏ធំមួយនៅក្នុងក្រុងសំរោង។
គួរបញ្ជាក់ផងដែរថា ចរាចរឈើគ្រញូងឆ្លងដែនពីប្រទេសថៃចូលមកប្រទេសកម្ពុជា តាមចំណុចបង្គោលឡាក់១៣ ក្នុងទិសទី៣ នៃភូមិភាគ៤ ដែលមានអ្នកប្រមូលទិញនៅទីនោះផ្ទាល់ បើកមិនមានការបើកភ្លើងខៀវពីមេបញ្ជាការកងទ័ព ដែលឈរជើងនៅតំបន់ខាងលើទេនោះ គឺមិនអាចប្រព្រឹត្តបានទៅរលូនជាដាច់ខាត។ ប៉ែន នួន
