រាចធានីភ្នំពេញ៖ ដំណើរការកំណែកិច្ចការបេក្ខជនប្រឡងសញ្ញាបត្រមធ្យមសិក្សាទុតិយភូមិ (បាក់ឌុប) ឆ្នាំនេះ បានប្រព្រឹត្តទៅដូចការគ្រោងទុក មានដំណើរការរលូនល្អ និងមានសុវត្ថិភាពថែមទៀតផង ខណៈបេក្ខជនខ្លះហាក់ដូចជាអង្វរករសុំឲ្យមានការអនុគ្រោះសម្រាប់បេក្ខជនឆ្នាំនេះ។ 
តាមទំព័រហ្វេសប៊ុករបស់អង្គភាពប្រឆាំងអំពើពុករលួយ ក៏ដូចជារបស់ក្រសួងអប់រំ យុវជន និងកីឡាបានបង្ហាញពីដំណើរការកំណែ និងមតិនានាយ៉ាងច្រើន ដោយយើងសូមលើកយកប្រភពនេះមកផ្សាយបន្តដូចខាងក្រោមនេះ គិតត្រឹមថ្ងៃទី១០ សីហា ២០១៤ ម៉ោង១៧គត់។ នៅមណ្ឌលកំណែវិ.វត្តកោះ៖ រហូតមកដល់ល្ងាចថ្ងៃនេះ គណ:កម្មការក្រុមមុខវិជ្ជា និងគណ:កម្មការកំណែបានដំណើរការកិច្ចការរបស់ខ្លួនយ៉ាងរលូនដោយសម្រេចបាននូវលទ្ធផល: ការផ្ទៀងផ្ទាត់សន្លឹកកិច្ចការ ១០០% ការកាត់ក្បាលសន្លឹកកិច្ចការ ១០០% ការចុះអក្សរសម្ងាត់ ១០០% កំណែបាន ២០% និងពិនិត្យរួចបាន ៦,៨%។ 
នៅមណ្ឌលវិ. ជាស៊ីមបឹងកេងកង: លទ្ធផលកែសន្លឹកកិច្ចការទទួលបានប្រហែល 35% ហើយ។ រីឯនៅមណ្ឌលវិទ្យាល័យ ហ៊ុន សែន ប៊ុនរ៉ានី វត្តភ្នំ៖មណ្ឌលកំណែមុខវិជ្ជា ប្រវត្តិវិទ្យា៖ថ្ងៃអាទិត្យ ទី១០ ខែសីហា ឆ្នាំ២០១៤រសៀលថ្ងៃទី៣ ម៉ោង១៧:២០នាទី៖សន្លឹកកិច្ចការបេក្ខជន ដែលមិនទាន់កែចប់ ត្រូវយកមករក្សាទុកនៅតាម បន្ទប់នៃក្រុមបែងចែកសន្លឹកកិច្ចការ ដោយមាន scellerនិងចុះហត្ថលេខា។បរិយាកាសក្នុងរយៈពេលប៉ុន្មានថ្ងៃកន្លងមកនេះ មានលក្ខណៈល្អប្រសើរ។
នៅមណ្ឌលកំណែវិទ្យាល័យបាក់ទូក (គណិតវិទ្យា)គឺលោកគ្រូអ្នកគ្រូដែលជាក្រុមកំណែបានបញ្ចប់នូវការកែសន្លឹកកិច្ចការនៅម៉ោង 17:00 pm ដោយការយកចិត្តទុកដាក់។ មណ្ឌលកំណែវិទ្យាល័យទួលទំពូង: ក្រុមការងារ អ.ប.ព. សង្កេតឃើញថា ទន្ទឹមនឹងការចាប់យករូបភាពវីដេអូតាមរយ:កាំមេរ៉ារបស់ អ.ប.ព. លោកគ្រូអ្នកគ្រូនៅក្នុងបន្ទប់កំណែទាំងអស់អនុវត្តភារកិច្ច និងគោរពវិន័យយ៉ាងល្អ ដូចខាងក្រោម :1. ប្រមូលទូរស័ព្ទមកដាក់លើតុខាងមុខទាំងអស់2. កាបូបគ្រប់ប្រភេទប្រមូលមកទុកមួយកន្លែងខាងមុខ 3. ប្រើបានតែប៊ិចក្រហមក្បាលវិលតែមួយមុខគត់4. ពិភាក្សាជាមួយប្រធានក្រុមយ៉ាងល្អិតល្អន់ក្នុងការដាក់ពិន្ទុលើសន្លឹកកិច្ចការ។ 
ដំណើរការសំណេរសម្រាប់ការប្រឡងសញ្ញាបត្រមធ្យមសិក្សាទុតិយភូមិ (បាក់ឌុប)កាលពីថ្ងៃទី៤ និងទី៥ សីហា ២០១៤ បានបញ្ចប់ទៅ ដំណើរការកំណែកំពុងតែ ប្រព្រឹត្តទៅតាមប្រតិទិនការងារ ក្រោមការឃ្លាំមើល តាមដាន និងអង្កេតយ៉ាងហ្មត់ចត់ពី គណៈមេប្រយោគ គណៈកម្មការតាមកម្រិតដោយមានការចូលរួមយ៉ាងសកម្មពីមន្ត្រី និងអ្នក សង្កេតការណ៍នៃអង្គភាពប្រឆាំងអំពើពុករលួយ។
កាន់តែពិសេសថែមទៀតនោះ ដំណើរការ កំណែឆ្នាំនេះមានដាក់កាមេរ៉ាសុវត្ថិភាពសម្រាប់អង្កេតមើលសកម្មភាពនៃការកែតាមបន្ទប់ ថែមទៀតផង។ សូមបញ្ជាក់ថា ការប្រឡងសញ្ញាបត្រមធ្យមសិក្សាទុតិយភូមិ (បាក់ឌុប)ឆ្នាំសិក្សា២០១៣ ២០១៤ នេះសរុបមាន១៥៤មណ្ឌល មាន៣៦៨៣បន្ទប់ មានបេក្ខជនសរុប៩១៣៧៣នាក់ ក្នុងនោះមានថ្នាក់វិទ្យាសាស្ត្រ១៤០មណ្ឌល មាន៣៤៦១បន្ទប់ (ដកសិស្សពិការភ្នែក៥បន្ទប់ សល់៣៤៥៦បន្ទប់) មានបេក្ខជនសរុប៨៥៩៩៥នាក់ និងថ្នាក់វិទ្យាសាស្ត្រសង្គម១៤មណ្ឌល មាន២២២បន្ទប់ មានបេក្ខជនសរុប៥៣៧៨នាក់។ ការប្រកាសលទ្ធផលអាចប្រព្រឹត្តទៅនៅចុងខែសីហានេះ ៕
