ភ្នំពេញ ៖ បុរសវ័យចំណាស់ម្នាក់ជិះម៉ូតូចេញពីធ្វើការត្រឡប់ទៅផ្ទះតែមកដល់ពាក់កណ្តាលផ្លូវត្រូវបុរសម្នាក់ទៀតបើករថយន្តលឿនដូចហោះជ្រុលទៅបុកពីក្រោយពេញទំហឹង និងកិនទាំងអ្នកជិះម៉ូតូបណ្ដាលឲ្យស្លាប់ភ្លាមៗនៅនិងកន្លែង បង្កការភ្ញាក់ផ្អេីលកាលពីវេលាម៉ោង ៧និង ៥០នាទីយប់ថ្ងៃទី១៥ ខែឧសភា ឆ្នាំ២០២១ ស្ថិតនៅតាមបណ្ដោយផ្លូវជាតិលេខ១ ក្នុងសង្កាត់និរោធ ខណ្ឌច្បារអំពៅ។
សពជនរងគ្រោះមានឈ្មោះ យឿន ឈីវហុង អាយុ៥៤ឆ្នាំមុខរបរចង់ភៅ ស្នាក់នៅសង្កាតវាលស្បូវ ខណ្ឌច្បាអំពៅ ។
យោងតាមប្រភពព័ត៌មានពីប្រជាពលរដ្ឋដែលបានឃើញហេតុការណ៍ខាងលេីបានប្រាប់ឲ្យដឹងថា មុនពេលកើតហេតុគេឃើញបុរសជាជនរងគ្រោះបានជិះម៉ូតូម៉ាកវ៉េវពណ៌ខ្មៅ ពាក់ស្លាកលេខកណ្ដាល 1S-1848 ជិះតាមបណ្ដោយផ្លូវជាតិលេខ១ ក្នុងទិសដៅពីលិចទៅកើតស្រាប់តែមកដល់ចំណុចកើតហេតុក៏មានបុរសម្នាក់បើករថយន្ត FUSO ដឹកហ្គាស់ ពណ៌ស ពាក់ស្លាកលេខ ភ្នំពេញ 3B-2485 មកពីក្រោយក្នុងល្បឿនលឿនដូចហោះជ្រុលទៅបុកពីក្រោយពេញទំហឹងនិងកិនបុរសម្នាក់ជនរងគ្រោះបណ្ដាលឲ្យស្លាប់ រួចក៏បើករត់គេចអូសម៉ូតូជាច្រើនម៉ែត្រ តែពេលនោះក៏ត្រូវបានប្រជាពលរដ្ឋសហការជាមួយនឹងកងកម្លាំងនគរបាលខណ្ឌច្បារអំពៅដេញតាមចាប់បាននៅភូមិជ្រោយអំពិល សង្កាត់ក្បាលកោះ ខណ្ឌច្បារអំពៅ រួចបានយកមកសួរនាំនៅអធិការដ្ឋាននគរបាលខណ្ឌច្បាអំពៅ តែម្ដង ។
តាមប្រភពព័ត៌មានពីសាច់ញាតិបុរសជនរងគ្រោះ បានប្រាប់ឱ្យដឹងថា ជនរងគ្រោះបានជិះម៉ូតូចេញពីកន្លែងធ្វើការនៅម្ដុំផ្សារដីហុយខណ្ឌសែនសុខ គោលបំណងត្រឡប់មកផ្ទះតែជាអកុសល់មកដល់ពាក់កណ្តាលផ្លូវក៏ជួបគ្រោះថ្នាក់ចរាចរណ៍ស្លាប់បាត់បង់ជីវិតយ៉ាងដូច្នេះ។
ក្រោយពេលកើតហេតុ សមត្ថកិច្ចមូលដ្ឋានសហការជាមួយសមត្ថកិច្ចជំនាញចរាចរណ៍ខណ្ឌច្បាប់អំពៅចុះទៅដល់កន្លែងកើតហេតុធ្វើការវាស់វែងរួចក៏ប្រគល់រថយន្តនិងម៉ូតូរួមទាំងអ្នកបើកបររថយន្តបង្កឲ្យទៅខាងជំនាញការិយាល័យចរាចរណ៍ផ្លូវគោករាជធានីភ្នំពេញយកទៅរក្សាទុករង់ចាំធ្វើការដោះស្រាយគ្នានៅពេលក្រោយ។ ដោយឡែកសពជនរងគ្រោះត្រូវបានសមត្ថកិច្ចធ្វើលិខិតប្រគល់ទៅឱ្យក្រុមគ្រួសារយកទៅធ្វើបុណ្យតាមប្រពៃណី ៕ ដោយ ៖ ជីម ភារ៉ា
