សៀមរាប: កងយោធពលខេមរៈភូមិន្ទ ប្រចាំយោធភូមិភាគ៤ បានប្រារព្ធធ្វើពិធីដាំកូនឈើចម្រុះប្រមាណ១ម៉ឺនដើម នៅក្នុងទីបញ្ជាការកងយោធពលខេមរៈភូមិន្ទយោធភូមិភាគ៤ ខខេត្តសៀមរាបនាព្រឹកថ្ងៃ ទី០១ ខែមិថុនា ឆ្នាំ២០២១។
ការដាំកូនឈើចម្រុះប្រភេទបេង ធ្នង់ គ្រញូងនិងនាងនួន លើផ្ទៃដីទំហំជាង២.៥ហិកតារនេះ មានស្ថាប័នជាច្រើនមកចូលរួម ដូចជាមន្ត្រីសាលាខេត្តសៀមរាប មន្ទីរកសិកម្មរុក្ខា ប្រមាញ់និងនេសាទខេត្តសៀមរាប មន្ត្រីនគរបាលនិងក្រុមចលនាយុវជន១៥៧ផង។
លោកឧត្តមសេនីយឯក ពៅ ហេង មេបញ្ជាការរងកងទ័ពជើងគោក និងជាមេបញ្ជាការនៃកងយោធពលខេមរៈភូមិន្ទយោធភូមិភាគ៤ ដែលជាគណអធិបតីក្នុងពិធីដាំកូនឈើនេះមានប្រសាសន៍ថា៖ការដាំកូនឈើនៅក្នុងខេត្តសៀមរាបពេលនេះ គឺជាការរួមចំណែកការពារបរិស្ថាននិងជួយលើកកំពស់សោភ័ណភាពខេត្តសៀមរាប ព្រមទាំងធ្វើឱ្យប្រាសាទបុរាណកាន់តែមានសម្រស់ទាក់ទាញភ្ញៀវទេសចរណ៍ ឱ្យមកទស្សនាបានកាន់តែច្រើនថែមទៀត។
លោកឧត្តមសេនីយឯក មានប្រសាសន៍ទៀតថា៖ការដាំកូនឈើនេះ លោកមិនត្រឹមតែចង់ឱ្យដាំនៅក្នុងខេត្តសៀមរាបប៉ុណ្ណោះទេ គឺចង់ឱ្យខេត្តចំនួន៤ មានខេត្តឧត្តរមានជ័យ ខេត្តព្រះវិហារនិងខេត្តកំពង់ធំ ដែលស្ថិតនៅក្រោមចំណុះយោធភូមិភាគ៤ បានដាំកូនឈើឡើងវិញ ក្នុងគោលបំណងជួយកាត់បន្ថយការឡើងកំដៅលើផែនដីនិងការប្រែប្រួលអាកាសធាតុ ឱ្យប្រសើរឡើង។
សូមរំលឹកថា៖នេះជាលើកទី២ហើយ ដែលអាជ្ញាធរជាតិអប្សរា បានផ្ដល់កូនឈើចម្រុះចំនួន១ម៉ឺនដើម ឱ្យកងយោធពលខេមរៈភូមិន្ទនៃយោធភូមិភាគ៤ ដាំនៅក្នុងទីបញ្ជាការ។
កាលពីអំឡុងខែឧសភា ឆ្នាំ២០២០កន្លងទៅ អាជ្ញាធរជាតិអប្សរាធ្លាប់បានផ្ដល់កូនឈើចម្រុះ ចំនួនមួយម៉ីនដើម ឱ្យកងយោធពលខេមរៈភូមិន្ទ នៃយោធភូមិភាគ៤ យកទៅដាំនៅក្នុងទីបញ្ជាការដដែលនេះម្ដងមកហើយ។
គួរបញ្ជាក់ថានៅក្នុងឱកាសដាំកូនឈើ កាលពីព្រឹកថ្ងៃទី១ខែមិថុនានោះទីបញ្ជាការនៃយោធភូមិភាគ៤ ក៏បានប្រគល់វត្ថុបុរាណចំនួន៥ដុំ ដែលកងទ័ពបានរកឃើញពីតាមទីបុរាណដ្ឋាននានា ជូនដល់អាជ្ញាធរជាតិអប្សរា ឱ្យយកទៅរក្សាទុកផងដែរ៕
