កំពង់ឆ្នាំង៖ទឹកជំនន់ទន្លេសាបនៅតែមានការកើនឡើងជារៀងរាល់ថ្ងៃ ធ្វើអោយប្រជាពលរដ្ឋរស់នៅតាមដងទន្លេនិងអាជ្ញាធរនៅតាមមូលដ្ឋានកំពុងមានការព្រួយបារម្មណ៍យ៉ាងខ្លាំង។ តាមរបាយការណ៍របស់ មន្ទីរធនធានទឹកនិងឧតុនិយមខេត្តបានអោយដឹងថា៖កំពស់ទឹកនៅព្រឹកថ្ងៃទី
១២ ខែសីហា ឆ្នាំ២០១៤ទឹកមាន កំពស់ខ្ពស់ជាង ០,៥១ ម៉ែត្រ បើប្រឿបធៀបនិងថ្ងៃខែ ដូចគ្នានិងឆ្នាំ២០១១ ជាឆ្នាំ មានទឹកជំនន់ធំ។
ប្រភពព័ត៌មានពីប្រជាពលរដ្ឋរស់នៅតាមដងទន្លេក្នុងខេត្តកំពង់ឆ្នាំងបានអោយដឹងថា៖រយះពេលជាងមួយអាទិត្យកន្លងមកនេះទឹកបានជំនន់ឡើងជារៀងរាល់ថ្ងៃ មានកំពស់ពី០,១៥ម៉ែត្រ ទៅ០,២០ម៉ែត្រក្នុង១ថ្ងៃៗ។ ដោយឡែកផ្លូវលំតាមភូមិ និងតាមខ្នងចំការមួយចំនួនត្រូវបានទឹកទន្លេជន់លិចហើយចំណែកដំណាំដុះតាមខ្នងចំការមួយចំនួនធំត្រូវបានប្រជាកសិករយើងប្រមូលផលរួចរាល់ហើយដែរ។
លោក ដោក ប៊ុនថុន ប្រធានមន្ទីរធនធានទឹកនិងឧតុនិយមខេត្តកំពង់ឆ្នាំងបាននិយាយអោយដឹង ថា៖កំពស់ទឹកទន្លេនៅស្ថានីយ៍ផ្សារក្រោមនៅព្រឹកថ្ងៃទី១២ ខែសីហា ឆ្នាំ២០១៤ នេះមានកំពស់៨,៦៦ ម៉ែត្រ បើប្រៀបធៀបនិងថ្ងៃ ខែ ដូចគ្នាក្នុងឆ្នាំ២០១៣ ទឹកមានកំពស់៧,៥៣មែត្រ ( គឺខ្ពស់ជាង១,១៣ ម៉ែត្រ) និងបើប្រៀបធៀបថ្ងៃ ខែដូចគ្នាក្នុង ឆ្នាំ២០១១ជាឆ្នាំទឹកធំ ទឹកមានកំពស់៨,១៥ម៉ែត្រ( គឺខ្ពស់ជាង០,៥១ម៉ែត្រ) កំពស់ទឹកដែលត្រូវប្រកាសអាសន្នសំរាប់ខេត្តកំពង់ឆ្នាំងគឺទឹកមានកំពស់១១ម៉ែត្រ។
សូមបញ្ជាក់ថា៖កាលពីដើមខែ សីហា ឆ្នាំ២០១៤ ទឹកទន្លេមេគង្គបានឡើងជន់លេចបណ្ដាលខេត្ត មួយចំនួននៅប៉ែកឥសានប្រទេស បន្ទាប់មកទឹកជំនន់នេះបានហូរចាក់មកដងទន្លេសាបធ្វើអោយខេត្តជាប់ដៃទន្លេសាបមានដូចជាខេត្ត កំពង់ចាម កណ្ដាល កំពង់ឆ្នាំង កំពង់ធំ ទឹកបានជន់ឡើងជាបន្តបន្ទាប់។
ដើម្បីឆ្លើយតបគ្រោះទឹកជំនន់ខាងលើនេះនៅព្រឹកថ្ងៃទី០៥ ខែសីហា ឆ្នាំ២០១១ គណះកម្មាធិការ គ្រប់គ្រងគ្រោះមហន្តរាយខេត្តកំពង់ឆ្នាំង ដឹកនាំដោយលោក ឈួរ ច័ន្ទឌឿន អភិបាលខេត្តបានបើកកិច្ចប្រ ជុំបន្ទាន់មួយនៅក្នុងសាលាខេត្តកំពង់ឆ្នាំង ដើម្បីដាក់វិធានការណ៍និងផែនការណ៍ដល់ប្រធានមន្ទីរ អង្គភាព ជុំវិញខេត្ត កងកម្លាំងប្រដាប់អាវុធ និងអាជ្ញាធរមូលដ្ឋានគ្រប់ស្រុក សាខាកាកក្របាទក្រហមស្រុកនិងខេត្ត ត្រៀមលក្ខណះឆ្លើយតបនិងត្រៀមសង្គ្រោះបន្ទាន់ដល់ប្រជាពលរដ្ឋរងគ្រោះ។ក្នុងនោះផងដែរត្រូវ ត្រៀម មធ្យោបាយដឹកជញ្ជូនមានទូកកាណូត រថយន្ត ដើម្បីជម្លៀសប្រជាពលរដ្ឋរងគ្រោះដោយទឹកជំនន់មកកាន់ ទីទួល សុវត្ថិភាព។ទន្ទឹមនេះដែរអាជ្ញាធរមូលដ្ឋាននៅ តាមស្រុក ត្រូវត្រៀមលក្ខណះរកទីទួលសុវត្ថិភាពនៅតាមសាលារៀន ឬវត្តអារាម ដើម្បីទុកអោយប្រជាពលរដ្ឋរងគ្រោះស្នាក់នៅ។ចំណែកមន្ទីរពេទ្យ និងមណ្ឌលសុខភាព ត្រូវត្រៀមថ្នាំពេទ្យ សំរាប់ព្យាលជម្ងឺ ជូនប្រជាពលរដ្ឋ និងក្នុងនោះដែរក៏ត្រូវត្រៀមរកទីទទួលសុវត្តិភាពសំរាប់សត្វពាហនៈផ្សេងពីទីទួលរបស់មនុស្សផងដែរ។
គណៈកម្មាធិការគ្រប់គ្រងគ្រោះមហន្តរាយខេត្ត ក៍បានអំពាវនាវផងដែរដល់ប្រជាពលរដ្ឋយើងសូមអោយមានការប្រុងប្រយត្ន័ ចំពោះសត្វមានពិស និងការពារដោយប្រុងប្រយត្ន័កុំអោយកូនចៅតូចៗលង់ទឹក ហើយត្រូវមានអនាម័យហូបស្អាត ផឹកស្អាត និងរស់នៅស្អាត កុំអោយមានជឺម្ងបៀតបៀននាំអោយខាតបង់ថវិកានៅក្នុងគ្រួសារ៕ ( ឈៀង ថារិទ្ធ ) កំពង់ឆ្នាំង,ថ្ងៃទី១២.០៨.២០១៤
