កំពង់ចាម៖ អំណោយរបស់គណៈកម្មាធិការគ្រប់គ្រប់គ្រងគ្រោះមហន្តរាយ និងអំណោយមនុស្សធម៌កាកបាទក្រហមកម្ពុជា តាមរយៈ ឯកឧត្ដម លន់ លឹមថៃ អភិបាលខេត្ត និងជាប្រធានគណៈកម្មាធិការគ្រប់គ្រងគ្រោះមហន្តរាយខេត្តកំពង់ចាម រួមជាមួយឯកឧត្ដម លោកជំទាវអភិបាលរងខេត្ត ថ្នាក់ដឹកនាំមន្ទីរអង្គភាពពាក់ព័ន្ធ ព្រមទាំងមន្ត្រីរាជការក្រោមឱវាទ និងអាជ្ញាធរស្រុក បាននាំយកទៅផ្ដល់ជូនប្រជាពលរដ្ឋរងគ្រោះដោយបាក់ច្រាំងទន្លេចំនួន ៦៣គ្រួសារ នៅស្រុកកងមាស ខេត្តកំពង់ចាម ព្រឹកថ្ងៃទី១១ ខែសីហា ឆ្នាំ២០១៤ ។ 
លោកមឿន ផាអភិបាលស្រុកកងមាស បានគូសបញ្ជាក់ថា ដោយភូមិសាស្ត្ររបស់ស្រុកកងមាស ស្ថិតនៅតាមបណ្ដោយដងទន្លេមេគង្គ បានធ្វើឲ្យស្រុកងាយរងឥទ្ធិពលពីទឹកជំនន់ ។ ជាក់ស្ដែង ទឹកជំនន់បានធ្វើឲ្យប៉ះពាល់ប្រជាពលរដ្ឋ ១១ឃុំ ស្មើនឹង ៣.៦៨៥គ្រួសារ មាន ៣.២២៤ខ្នងផ្ទះ ស្មើនឹងមនុស្ស ១៥.៧៨៥នាក់ ប្រជាពលរដ្ឋចំនួន ៦៣គ្រួសារបានផ្លាស់ទៅកាន់ទីទួលសុវត្ថិភាព លិចផ្លូវកៅស៊ូ ៣៥០ម៉ែត្រ ផ្លូវក្រួសក្រហម ៧.៤៥១ម៉ែត្រ វត្តចំនួន ៣ វិហារឥស្លាម ១ សាលារៀន ១៩ខ្នង អាគារសាលាឃុំ ១កន្លែង ។
ដោយឡែក ឃុំសូរគង់ និងឃុំពាមជីកង មានប្រជាពលរដ្ឋរងគ្រោះ ដោយសារបាក់ច្រាំងទន្លេធ្វើឲ្យស្រុតផ្ទះ ហើយបានរុះរើផ្ទះ ស្មើនឹង ៦៣គ្រួសារ។ ឯកឧត្ដម លន់ លឹមថៃ បានសម្ដែងនូវការសោកស្ដាយជាខ្លាំង ចំពោះប្រជាពលរដ្ឋដែលបានរងគ្រោះដោយធម្មជាតិ ជាពិសេស ប្រជាពលរដ្ឋដែលបានរងផល់ប៉ះពាល់ដោយសារបាក់ច្រាំង ស្រុតផ្ទះ និងបានរើផ្ទះ ទាំង ៦៣គ្រួសារ នៅក្នុងឃុំទាំងពីរនេះ ។រួមជាមួយគ្នានោះដែរ ឯកឧត្ដម លន់ លឹមថៃក៏បានពាំនាំនូវប្រសាសន៍សាកសួរសុខទុក្ខ ពីសំណាក់ប្រមុខរាជរដ្ឋាភិបាលកម្ពុជា និងសម្ដេចកិត្តិព្រឹទ្ធបណ្ឌិត ប៊ុន រ៉ានី ហ៊ុន សែន ប្រធានកាកបាទក្រហមកម្ពុជា ជូនចំពោះ ប្រជាពលរដ្ឋរងគ្រោះទាំង ៦៣គ្រួសារ ផងដែរ ។
ឯកឧត្ដម លន់ លឹមថៃមានប្រសាសន៍ដែរថា បងប្អូនប្រជាពលរដ្ឋដែលរស់នៅតាមដងទន្លេមេគង្គនៅរដូវទឹកជំនន់មកដល់ គឺតែងត្រៀមបង្ការសព្វបែបយ៉ាង តាំងពីស្បៀងអាហារ ទីកន្លែងសម្រាប់ដាក់សត្វពាហៈនៈ រួមទាំងស្មៅ ចំបើង សម្រាប់ជាអាហាររបស់សត្វទាំងនោះ ផងដែរ ។ឯកឧត្ដមបន្តថា ជីវិតអ្នកទន្លេ ពេលទឹកតូចពេក គឺមិនមានការសប្បាយចិត្តទេ តែបើទឹកធំ គឺសប្បាយចិត្តណាស់ ពីព្រោះថា ពេលទឹកឡើងធំ គឺបាននាំមកនូវដីល្បាប់ដ៏មានជីវជាតិសម្រាប់ដាំដុះពុំសូវមានសត្វល្អិត សំបូរត្រី និងសំបូរទឹកសម្រាប់ ការងារបង្កបង្កើនផលស្រែប្រាំងរបស់ពួកគេ ។ ប៉ុន្តែ ក៏មិនចង់ឲ្យទឹកឡើងធំ រហូតទៅមានជំនន់បំផ្លិចបំផ្លាញទ្រព្យសម្បត្តិ ផ្ទះសម្បែង បែបនេះទេ ។
ឯកឧត្ដម លន់ លឹមថៃបញ្ជាក់ដែរថា អំណោយសង្គ្រោះបន្ទាន់ទាំងអស់នេះ គឺសម្រាប់បងប្អូនប្រជាពលរដ្ឋទាំង ៦៣គ្រួសារ ដែលទទួលរងគ្រោះ តែប៉ុណ្ណោះ ។ហើយសូមមានការយោគយល់ផងដែរ សម្រាប់បងប្អូន ដែលគ្រាន់តែមានការទឹកលិចនៅក្រោមផ្ទះពុំមានរងគ្រោះរហូតដល់ស្រុតផ្ទះ និងរុះរើផ្ទះនោះទេ ។ បងប្អូនប្រជាពលរដ្ឋសូមមានការប្រុងប្រយ័ត្ន ចំពោះហេតុការណ៍ផ្សេងៗ ដែលធ្វើប៉ះពាល់ដល់អាយុជីវិត ពិសេស ការប្រុងប្រយ័ត្នខ្ពស់ ចំពោះ កុមារ ជនពិការ ចាស់ជរា ផងដែរ ។
មួយចំណែកទៀត ទាំងអស់គ្នាក៏ត្រូវចូលរួមចំណែកអនុវត្តនូវច្បាប់ចរាចរណ៍ ព្រមទាំងគោលនយោបាយភូមិឃុំមានសុវត្ថិភាព ផងដែរ ។ សូមបញ្ជាក់ដែរថា អំណោយដែលបានផ្ដល់ជូនប្រជាពលរដ្ឋទាំង ៦៣គ្រួសារ គឺមានពីរប្រភេទ ក្នុងនោះ ៖ អំណោយរបស់គណៈកម្មាធិការគ្រប់គ្រប់គ្រងគ្រោះមហន្តរាយ ដែលក្នុងមួយគ្រួសារៗទទួលបាន អង្ករ ៥០គ.ក្រ ស័ង្កសី ១៥សន្លឹក និងថវិកា ១៥ម៉ឺនរៀលរួមជាមួយនិងអំណោយមនុស្សធម៌កាកបាទក្រហមកម្ពុជាមី ១កេសតូច ត្រីខ ១០កំប៉ុងនិងឃីត ១កញ្ចប់ ដែលមាន៖ ក្រមា ១ មុង ១ និងសារ៉ុង ១ បន្ថែម ផងដែរ ៕
