លោក Filippo Inzaghi (ហ្វីលីប៉ូ អ៊ីនហ្សាគី) ជឿជាក់ថា AC Milan (អេស៊ី មីឡេន) នឹងទទួលជោគជ័យសម្រាប់រដូវកាលថ្មីនេះ គ្រូបង្វឹកក្លិបបិសាចក្រហមអ៊ីតាលី AC Milan (អេស៊ី មីឡេន) លោក Filippo Inzaghi (ហ្វីលីប៉ូ អ៊ីនហ្សាគី) បាននិយាយថា លោកមានទំនុកចិត្តយ៉ាងមុតមាំថាក្លិបរបស់លោកនឹងទទួលបានជោគជ័យសម្រាប់ការប្រកួតរដូវកាលថ្មីនេះ ។ AC Milan (អេស៊ី មីឡេន) លេងមិនបានល្អសោះកាលពីរដូវកាលមុនដោយពួកគេបានបញ្ចប់ នៅចំណាត់ថ្នាក់ទី៨ក្នុងតារាងក្របខណ្ឌអ៊ីតាលី Serie A ប៉ុន្តែក្រោមការដឹកនាំថ្មីរបស់លោក Inzaghi (អ៊ីនហ្សាគី) លោកបានសន្យាថា លោកនឹងស្តារក្រុមនេះឡើងវិញ ។
លោកបានប្រាប់អ្នកសារព័ត៌មានថា “ក្រុមការងារបច្ចេកទេសទាំងអស់នៅក្នុងក្លិបរួមទាំងរូបខ្ញុំ ផងដែរនោះមានទំនុកចិត្តយ៉ាងមុតមាំថាយើងនឹងធ្វើបានល្អជាងមុនសម្រាប់រដូវកាលថ្មីនេះហើយយើងត្រូវតែឈ្នះដាច់ខាតសម្រាប់ការប្រកួតបើករដូវកាលថ្មី” ។ គួររម្លឹកឡើងវិញថា លោក Inzaghi (អ៊ីនហ្សាគី) ធ្លាប់លេងឲ្យ AC Milan (អេស៊ី មីឡេន) រយៈពេល១១ឆ្នាំហើយស៊ុតបញ្ចូលទីឲ្យក្លិបនេះបានចំនួន១២៦គ្រាប់ ៕
