កីឡាករ Wayne Rooney (វ៉េន រ៉ូនី) ត្រូវបានតែងតាំងឲ្យក្លាយជាប្រធានក្រុមបិសាចក្រហម Manchester United (មេនឆេស្ទើ យូណាយធីត) ដោយគ្រូបង្វឹកថ្មី Louis van Gaal (ល្វីសវ៉ាន់ហ្គាអាល់) ។ លោក Van Gaal (វ៉ាន់ ហ្គាអាល់) បានប្រកាសក្រោយពេលក្លិបរបស់ខ្លួនប្រកួតឈ្នះ Valencia (វ៉ាឡេនសៀ) ២-១ ក្នុងការប្រកួតជាលក្ខណៈមិត្តភាពថា Rooney (រ៉ូនី) នឹងជំនួសតំណែង កីឡាករ Nemanja Vidic (ណេមេនចា វីឌីក) ក្លាយជាប្រធានក្រុមថ្មីខណៈដែលកីឡាករ Darren Fletcher (ដារ៉េន ហ្វ្លិចឈើ) គឺជាអនុប្រធានក្រុម ។
គ្រូបង្វឹកសញ្ជាតិហូឡង់រូបនេះប្រាប់គេហទំព័ររបស់ក្លិបថា “សម្រាប់ខ្ញុំ វាគឺជារឿងសំខាន់បំផុត ចំពោះការជ្រើសរើសប្រធានក្រុមហើយ Rooney (រ៉ូនី) គឺជាបុគ្គលដ៏សាកសមម្នាក់ព្រោះគេមាន សមត្ថភាពអាចធ្វើបានគ្រប់យ៉ាង” ។ លោកបានបន្តថា “Fletcher (ហ្វ្លិចឈើ) នឹងក្លាយជាអនុប្រធានក្រុម គេជាអ្នកដឹកនាំដ៏ល្អហើយគេនឹងដឹកនាំក្រុមពេលគ្មានវត្តមានរបស់ Rooney (រ៉ូនី)” ។ គួរបញ្ជាក់ថា ទន្ទឹមជាមួយគ្នានោះ Rooney (រ៉ូនី) ក៏កំពុងមានគោលបំណងចង់ធ្វើជា ប្រធានក្រុមជម្រើសជាតិអង់គ្លេសផងដែរបន្ទាប់ពីកីឡាករ Steven Gerrard (ស្តេវេន ជើរ៉ាដ) ប្រកាស ចូលនិវត្តន៍ ៕
