ជនសង្ស័យម្នាក់ត្រូវបានសន្តិសុខនិងប្រជាពលរដ្ឋចាប់វាយទ្រោមខ្លួនទើបប្រគល់ឲ្យសមត្ថកិច្ច

ភ្នំពេញ៖     ជនសង្ស័យម្នាក់ក្នុងចំណោមបក្សពួក២នាក់ត្រូវបានប្រជាពលរដ្ឋចាប់បាន វាយ​ទ្រោម​​ខ្លួនទើប​​ប្រគល់ឲ្យសមត្ថកិច្ច ខណៈដែលពួកគេធ្វើសកម្មភាព​លួច​អាយកូម និងទូរស័ព្ទ កាលពី​​វេលា​​ម៉ោង​២​និង១០នាទី រំលងអាធ្រាតឈាន

ចូលថ្ងៃទី១៥ ខែសីហា ឆ្នាំ២០១៤ បន្ទាប់​ពី​បាន​ធ្វើ​សកម្ម​​ភាព​លួច​អាយកូម និងទូរស័ព្ទដៃម៉ាកអិន៩៥មួយ​គ្រឿង របស់សន្តិសុខយាមនៅមុខហាង​លក់​កុំព្យូ​ទ័រយីហោ​ឆាយ​ហុក នៅតាម​បណ្តោយផ្លូវព្រះសីហនុ ស្ថិតក្នុងសង្កាត់វាលវង្ស ខណ្ឌ៧មករា ។

        ជនសង្ស័យត្រូវបានគេស្គាល់ថា មានឈ្មោះអ៊ុំ វិសាល ភេទប្រុស អាយុ២៤ឆ្នាំ មានទីលំនៅ​ស្ថិត​ក្នុង​ភូមិថ្មី សង្កាត់ស្ទឹងមានជ័យ រីឯសន្តិសុខដែលយាមនៅហាង​លក់កុំព្យូទ័រយីហោ​ឆាយហុក មាន​ឈ្មោះ​​សោម សាលី ភេទប្រុស អាយុ២៥ឆ្នាំ បច្ចុប្បន្នស្នាក់នៅផ្ទះជួល ក្នុងសង្កាត់ទួលស្វាយព្រៃ២ ខណ្ឌ​ចំការមន ។

ប្រភពពត៌មានពីសន្តិសុខម្នាក់នោះបានឱ្យដឹងថា តាំងពីព្រលប់គាត់សង្កេតឃើញ​មានជនសង្ស័យចំនួន២នាក់ ដើរក្រវែងទៅក្រវែលមកជាច្រើនជុំ ប៉ុន្តែលោកមិនបានចាប់អារម្មណ៍ គឺបន្តយាមជាធម្មតាដូចជារៀងរាល់យប់ លុះម៉ោងប្រមាណជិត២ដោយសារតែងងុយដេកផងនោះ ក៏បានសំរាកមួយស្របក ហើយទុកអាយកូមនិងទូរស័ព្ទដៃម៉ាក់អិន៩៥មួយគ្រឿងចូលទៅក្នុងរឺម៉ក់​កង់បី ដែលចតនៅជិតនោះ បន្តិចក្រោយមកក៏បានលឺសម្លេងរុះរ៉ឺអ៊ីវ៉ាន់ រូបគេក៏បានក្រោកទៅមើល​ស្រាប់តែឃើញយុវជន២នាក់កំពុងតែធ្វើសកម្មភាពក៏បានស្រែកផ្អើលប្រជាពលរដ្ឋជិតខាងស្ទាក់ចាប់ បានម្នាក់និងម្នាក់ទៀតរត់គេចខ្លួនបាត់ដោយយកទាំងរបស់របរទៅជាមួយ ។ ភ្លាមនោះសមត្ថកិច្ច​មូល​ដ្ឋាន​បានមកធ្វើការអន្តរាគមន៍ រួចយក​ជន​សង្ស័យម្នាក់នោះទៅឃុំខ្លួនបណ្តោះអាសន្ន​នៅបុស្តិ៍នគរ​បាល​សង្កាត់បឹងព្រលឹត រង់ចាំការ​សាក​សួរបន្តទៀត ៕